¹ Ambusa na dyaa, Yesu á kena á Galilea, ngo sa onde ese iyosala á Yudea mungusa Bhayuda bhubhi n'vfungala ta bha múlú. ² Ngo evfaya ya Bhayuda, evfaya ya Tabelenekele, ibhia tshekedhe. ³ Ka bha monima bhese bhunsowa: ésæ áno ká kena áyudhea, mungusa bhatende bhai bha eni dyokuto mekambo miyo okiie. ⁴ Mushe ta omoi andje vfiese n'kobhané, dyaa úondue idjanila: ani ókie bhima bhio, undji vfanisia owe mukula aao á kisi. ⁵ Ngo bha monima bhese bhandjeli abho. ⁶ Yesu abhasowa: saa yami undjèsè múouwé, nge saa yanganu imasi ku matopa. ⁷ Kisi andje nu bhilièse múwe; émi, wiibhilie, mungusa esambolie á kisi n'no mekambo mèse ma mibhibhi. ⁸ Kénai, núwe, á evfaya iyo, angami, undje kenaimi, mungusa saa yami indjèse káámó muàké. ⁹ Ambusa naibhá sowa eyo, átikalá á Galilea. ¹⁰ Dyaa bhamonimá bhèse bhukénà á evfaya, ákená dyokuto idje mukulu aao, mbèse na bhushe inéménà, nge tókù n'kobhané. ¹¹ Bhayuda bhubhi i'vfungala wakati wa évfaya, ka bhavfia: Úmia? ¹² Ibhia a'semele na dyombo, mengúngúmo ta dhène dyulu lèsè. Bhamó bhúbhi vfia: mushe umo ún'kima. Ka bhaamo bhuvfia: mbèse, Ú nubholé dyokano á dyombo. ¹³ Mushe ta omoi, savfièse na uhulu, dyululèse, na iondua Bhayuda. ¹⁴ Dyaa évfayaikianá á katikati, Yesu á tama ka ákpata á yavfulu ya Mbali. Ka à gulusia. ¹⁵ Bhayuda bha sangala, na ivfia: namna yania adjibha ma kpalua, idje undjo sa somé èse? ¹⁶ Yesu abha kpetania: asili yami andjèse wámi, nge i wa úndjo wiitumá. ¹⁷ Ani mushe úondue ikia iyonda lèsè, údjibhie taa asili ami iwa Mbali, aao evfie ikulu la nkota wàmi. ¹⁸ Undjo úvfie ikulu la nkota wa èse úvfungalie obibò lèse ku bhanéne; nge undjo uvfungalie obibo la indjese na iyo iékande endjini angese. ¹⁹ Musa sanoúwe mwese núwé selia? Ka ta omoi wànú andjé esimièse selia. Na éndje nuvfungali ini ndúla? ²⁰ Dyombo la kpétania: úna múgú angai ná mobhi. Néni undjo úvfungali taa ánéólú? ²¹ Yesu ábhá manyula: ékii mokambo, ká núè bhatopa nú bhasangalé. ²² Musa únoowá núwe dhúdhá, mbèse taa iidjá angá Musa, ngo yeidjá anga bha inyangulú, ka nan'tina mushe dhúdhábhusi bha sabhato. ²³ Ani mushe tomoi átinisiana dhúdhá bhusi bhá sabható, náisowa taa selia ya Musa inebhuniè, mungusa wa éndje nú isumilie na dyaa ébhikisia mushe ku n'tubhú bhùsi bhási bhá sabható. ²⁴ Sú sambisia na iyekànà na úndjo ú énekanie, nge sambisia iyekànà na éndjini. ²⁵ Bhamó bhàà bhúbhia bha gwalé a'Yelusalema bhúvfia: indjèsè úndjo bham'vfungala taa bha múlú? ²⁶ Ka énai, úvfie na úhúlú, ka bhansowa bhó ta éma! E ángili taa bhakota bhúndjibhà taa ú Kilisito? ²⁷ Tókù ito úno, tudjibhie dyaa ú iyo; nge Kilisito, dyaa ú idji iyo; mushe andje djibhièsè dyaa manga ú idjie. ²⁸ Ka Yesu á gulusia á semele na yavfulu ya Mbali, á tubhula dyoi: nùni djibhie,ka nú djibhie dyaa ya idja! si idjiami émi mukúlu ááo: nge úndjo úitumá únkima, ká núndje n'djibhianu. ²⁹ Emi, éndjibhie; ngo ye idja angèsè, ká idjé úndjo úitumá. ³⁰ Bhúvfúngala kotio bhán'dhungu, ka mushe san'dúngèsè, mungusá, sàà yésè sibha èse moúwé. ³¹ Bhági á dyombo bhúndjelia, ka bhúvfia: Kilisito, dyaa úidji iyo úkü bhikakó bhigi inémita únò? ³² Bha Falisayo bhaóka bhanengungumaka isowa la bhima bhio. Ngo dyaa bhadumanga bhá bhakoli ká na bha Falisayo bhá tumá bhushe bhá mokambo ta bhan'dungu. ³³ Yesu ávfia: émbá kú nanú évfumbu ta djàà, ambusà ekénie anga úndjo ú ituma. ³⁴ Nú ivfungalie bhiyo ká núndji ndeni ta bhi ànú, ká núndjé tokianu ikuàna dyàà égwali bhiowá. ³⁵ Ikúlúlá étó Bhayuda bhá sowana: Úkeni nia, ta tundjé méniasu? úkenié anga bhàà bhuvfandjala angá bha Giliki, ká ú gúlusie bhá Giliki? ³⁶ Livfia lio manga vfia kókó ááò indje: nu ivfungali bhiyo ká núndje indeni ànú, ká núndje tókianu ikiana dyaa égwali iyo? ³⁷ Bhusi bha tútútú, bhusi bhwa dhène bhwa évfaya, Yesu, átemá, á tubhulá dyoi: úndjo ú na yàmà, kia áédji angami, ká únyúwè. ³⁸ Úndjò ú idjelie, tu lángá ta malivfa na ibhika tukpalalie angèse na n'tima tókù makpalua múvfia. ³⁹ Avfia éyo em'pumatima ta bha ódhú bháá bhúndjelia; ngo mpumatima subhièse kaamo, mungusa Yesu sabhièse mbani múbibané. ⁴⁰ Bhushé bhá dyombo, na iyoka mavfia náá, bha vfia: úno únkanga mènèménè. ⁴¹ Bhaamó bhú vfia: i Kilisito. Ka bhaamó bhúvfia: Eébhongé ta Kilisito úèkie á Galilaya? ⁴² Makpalúa mavfièse ta ubhoti la Dauda, ka na ándei ya Betheleemu, dyaa Daudu, úbhia mono, dyàà Kilisito ú pasie ièká? ⁴³ Ikúlú lèsè, ivfa ka naka loúwá kotiyo á dyombo. ⁴⁴ Bha àmó bha ónda ta bhán'dungu, nge mushé san'dungèse. ⁴⁵ Na éto bhushé bhá mokambo bhakpudha angá bha dumanga bhá bhakoli ka nabha Falisayo. Ka ibho bhábhásowa: na éndje nú idjiànú nabho? ⁴⁶ Bhushé bhá mokambo bhá kpetania: tá bhúwa mushé úno. ⁴⁷ Bha Falisayo bha bhaibha iganisia livfia: núe dyokuto, núbhá bha kómbané? ⁴⁸ Ibhia na bhakota aó bhaFalisaya bhaa bhúndjelia? ⁴⁹ Nge dyombo lio lidjibhaèse selia bhú tunànà! ⁵⁰ Nikodhema, úndjo úkiàna bhatio angá Yesu, ká úndjo úbhá na bhó, a'bha sowa: ⁵¹ Selia yaásu édungu mushe a'pèlé ni né moká ká na idjibha iyo a'kia? ⁵² Bha n'kpetania: owé údyo kuto Mugalilea? Bhónà, ká úénie taa á Galilea indje vfundu ta mono èse bha kanga. ⁵³ Ká kila mushé a'kpudhá angese na yavfúlú.