¹ Bhusi bho otátikó bhá pósó, Malia Madelena ukena kpálá á bhudjákō bhusi bhù kena livfue, ká manga éná libhoi bhá lugushia ikúlú lá bhúdjako. ² Akéna mavfi anga Simoni Petro ká anga n'tende omoi undjo Yesu ubhii múndhà ká abha sowa: bha mbia Bwana asemélé na bhudjako, ká túndji djibhiasu egula eyo bha mavfishià ³ Ká Petro na n'tende wómó bha kena á bhudjako. ⁴ Ibwikena mavfi ibho ta bha vfili; ká n'tende undjomó amita Petro na mavfi, akiáná a pele á bhudjako; ⁵ Idji ibgalia, kidji bhónà na semele, idji énā ngombe ya melekani miyo bhumúnā nao, satanganésè. ⁶ Simoni Petro, idjikiana ká atángáná na sémélé ya bhúdjako, éná ngombé yamelekani iyavfisie á misià, ⁷ ká étati ya ngombeyo bhu avfishia na ntuwese ibha iavfishie kuvfi. ⁸ Ká n'tende undjo, ukiana a pele na Petro a bhudjako, idjiena , ká idji djelia. ⁹ Mungusá bhá djibhabó iyo ikpaluana taa Yesu ú umúwè. ¹⁰ Ká bha tende bhiganaka angabho. ¹¹ Ngee, Malia ubhià un'teme á bhovfó na nkpngbá bhudjako idje suliliè, tuku ubhi lila, idje ibgalia, idji bhóna asemele na bhudjako; ¹² Ká nidjiénā bha tambia ta bha vfili bha sala ngombe ya mpémbé, bhadjumane egula éyō bhu malilia Yesu; undjomo opasiká lá ntuwe, wómó á makulu. ¹³ Bhine sowa: Mwali, ulili indje? idje ibha manyula: mungusa bhá lugushia Bwana bhámi, indjé djibhiami egula éyò bhakò mavfishià. ¹⁴ Dyaa manga mala ivfia mavfia māā, idje inebashia, idje sumena Yesu n'témé ombésé idje idjibha taa Yesu undjo. ¹⁵ Yesu ausowa: Mwali, olili indje? unvfungali neni? idje akpaa taa ubhá n'kambia wa mabhúlú, idjé ine sowa: Bwáná, oni owe undjo wá géyá, insowá egula èyò wako mavfishia, ká ekó géyā. ¹⁶ Yesu ansowa: Malia! idjé ine bhashia, ká idji vfia nana na ki hebrania: labuni maana maao, Mwéli. ¹⁷ Yesu ansowa: ombésé ini bukula, mungusa indjami mu bhinué anga Tita; nge kená anga bha monima bhami, ukó bhá sowa: ya bhinua anga Tita, ká nidjaanú; anga Mbali wámi ká na wanu dyo kútò. ¹⁸ Malia Madelena akéna ibhá djibhishia bha tende bhatopá nataa, manga ménà Bwáná, ká manga sowa maa mavfia matopá. ¹⁹ Idjakolo lá bhusi bhuò, bhubhá mono bhusi bwi tátika posho, bhikuse bha yavfulu bhio, bhatende bhubha mono bha kobhane, bhibhá bhe egilané nisowa lionduwa bha Yuda; Yesu ibha djanila ká atémá á bhaligogo bhabho idji vfia nabho: bhuguwe bhu gwali nanu. ²⁰ Ká dyaa manga amala ivfia étò, idje ibha vfanishia mabhó mésé ká lopambá lésé. bhatende bha séà ni néméná Bwáná. ²¹ Yesu abha sowa kaamo: bhu guwé bhu gwali nanú, tókù Tita wituma, emí ya ne tindikila nuwe dyo kwitò. ²² Ambusa na mavfia maa, idje ibha vfumbila ká ibha suwa: udhai mpumantima wa kengo. ²³ bhatopa bhaa ubha eshishie bhubhi, bhi eshishianie, ká na bhaa mubha sangie bhubhi bha sangilanie. ²⁴ Tomasi ubhibhisiana taa Mupacha, umoi wa bhatende sabise nabho dyaa uhba djania. ²⁵ Batende bhamó bha sowa Tomasi taméná Bwáná. nge, abha kpetania: ani sienéami bhi pii bha misumali á mabho mésé ká ani sikinge mwandakala wami, ká, nikinga óbhó wami alopamba lésé, indje djeliami kuna táá bhua. ²⁶ Ambusa na masi éfú nikinga ndala ta bhisaso (8), bhatende bha Yesu bhabha kaamo na yavfúlú bhegilane, dyaa, Tomasi ubha nabho. Yesu abha djanila, bhikuse bhubhá kú bhegiláné, atdma a bholigogo bhábhó ká avfia: bhu guwe bhu gwali nanu. ²⁷ Yesu ansowa Tomasi: disia evfandakala yae ká bhóná mabhó mami, ká disia obho wae ká ombésé igwálá mbese idjelia, nge, gwala ni djelia. ²⁸ Tomasi aukpetia: bwáná ká na Mbali wami ! ²⁹ Yesu ansowa: mungusa owé ini ndena, wa djelia. bhusumba bhábháá djelie ombese, iena. ³⁰ Yesu ukia kaamó ápēlé, na bha tende bhésé bhékákó bhimó bhigii bhió bhi kpaluaniésé na ma lúbhá mano. ³¹ Nge, minguso minò mikpaluana ni sowa taa nu djeliá taa Yesu uu klisto, monà Mbali, ká ni djelià, nupati ibhika na linya lésé.