¹ Ká ná Pilato an-geya Yesu, ká bha bhitilá na ma mbaka. ² Bha soda bhaluwa dyuguma la mabhio, bha n'salisia an'tuwe, ka bha n'salisia kandjo ya dhü ya ngula ngula; nine bhamba. ³ Bha vfia: ishamba, nkota wa bhayunda! ka bhwiné movfakula bhibhaga. ⁴ Pilato avfundua kaamo, ka avfia na bhayuda: Énai, yam-bhiya nanu a bovfo, nisowa taa nudjibhi taa, sigbokiami bhùbhi ta bhúmoyi angésé. ⁵ Yezu a vfunduwa kotiyo a bhovfo, n'sale dyúgúmá la mabhio ka na kandjo ya dhu ya ngulangula. ka Pilato ábhá sowa: Énai mushe n'no. ⁶ Dyaa bhadumanga bha bhakoli ka na bhushebha mokambo bhúmèná, bha dyomá: Agogilana! agogilana! Pilato abha sowa: un'geyai nuwe bhakulu bhaao; ka kon'gogilai; ngo emi, sieniami bhubhi ta bhumoyi angésé. ⁷ Bha Yuda bha manyula: Tuna selia yasu, ka, iyekana na selia yasu, o kpéiè ligwa, mungusa úndji bhisia mónà Mbali. ⁸ Dyaa Pilato woka livfia lio, bhuwá bhésé bha gbukumiana. ⁹ Aiganaka a Palatalio, ka ansowa Yezu: owé mushe wania? nge Yesu san'kpetanie tésé. ¹⁰ Pilato ansowa: undje vfiai nami? undje djibhia na taa émi ena lokulu ninólisia, ka éna lokulu linétikila? ¹¹ Yesu a kpetania: undjai na lokulu taa lúmoi angami, ani soowanai kwi kulu la nguvfá. asinge kuu undjo ikulusia angai akia djambi témoi ta dhene. ¹² Na evfumbu yokwiyo, Pilato avfúngálá inetikia. Ngee bhayuda bha dyoma: ani wántikila undjai mbeni wa kaisala úndjo adji bhisia taa úú n'kota an'siká kaisala. ¹³ Dyaa Pilato oká mavfia máá, an'vfundusia yezu a bovfó: ka adjumáná a agimá wa bhútúmbá, a égula éyo ebhisiana taa égulá ya mabhoi, naki Balania Gabnata. ¹⁴ Ibhá iandja libhongisia Pasaka, ka ibha iyekanka nü témà lá dyúvfà. Pilato avfia na bhayuda: un'geyai n'kota wanu. ¹⁵ Ngee bha dyóóma: un'bhia, un'bhia a gogiláná! Pilato a bha sowa: émenisia mpuli nkótá wánu? bha dumanga bha bhakdinbha kpetania: Tuwású na n'kotaku kaisala. ¹⁶ dyaa abhowa nabho taa bha kon'gogilá. Bha geya kotio Yesu, ka bha kena nabho. ¹⁷ Yesu á vfevfa musalabha wésé, bha kianá á égula eyo ebhisiana taa dyaló la un'tuwe iyo ibhisianie na ki Balania Gologota. ¹⁸ Ibha dyaa bhu n'gogilá ka na bhámó ta bha vfili. yezu a bholigogo bhamó ta bha vfili a pámbá djèsé. ¹⁹ Pilato a kpalua livfia lio a bhambisia ikulula musalabha lio livfiana taa: Yezu wa Nazareti, nkota wá bhayúda. ²⁰ Bhayúda bhàgü bhééná ékpalua lio, mungusa egula éyo Ysu wógwá ibha tchekedhé na ndei ya dhénè: ibhia ekpáluané na Kibalania, Kigiliki ka Kilatini. ²¹ Bhadúmángá bhábhakoli bha bhayuda bha vfia na Pilato: mbésé ikpalua itò: N'kotá wa bhayuda. Ngee kpalua tókù avfia: Emi n'kota wa bhayuda. ²² Pilato a kpetania: éyo ékpalúà, yákpalúa. ²³ Bhasudha ambusa niné múlà Yesu, bha gia ngombe djésé, ka bha vfakana kebhu tünyai, kila sodha na kébhu ésé. Bha géya dyokwito kándjo eyésé eyo sibiésé iyandja ikulu mpaka itchi. Ka bhavfia ibho ngungu: ²⁴ Mbésé dyuwe ivfunda na, nge tuengai bhu kanga ani néni undjo wóodhue. Éyo ya kiana ambusa taa ya a kisiana livfia la ma kpalia: bhu vfakana ngombe djami, ka bheenga bhukanga bha kandjo yami. Enai eyo bhasudha bhukia. ²⁵ Atchekedhe na musalabha wa Yezu, bhubhia bhatémé inyésé ka na wányá inyésé wa mwali, Malia, madja Kolopasa, ka Malia ma Magadala. ²⁶ Yesu, a mèná inyésé, ka na m'bhongo wa nyinyésé, ntende undja u-bhi munda, avfia na nyinya wésé: Mwali, un'no u-mona wai. ²⁷ Kaamo, ansowa ntende: un'no u-anó. ka dyokáa, n'tende kéná náná angese. ²⁸ Ambusa ni yaa, Yesu, undjo udjibha taa étopá ya mala iyakisia, avfia: ambusa taa ma kpaluwa ma akisiana : éná yámá. ²⁹ Ibhia dyaa lungu ta lumoi liudjale na n'soso. Bha sudha bha ovfusia malulu na n'soso, ka, bha kpatania malulu an'kálámbá, bha m'bhambisia áanyuwa. ³⁰ Ka dyáa Yesu ubhúmá n'soso, avfia: Étopa ya a kisiana. ka ádhulusia n'tuwe, ka ni tinà mpúma n'tima. ³¹ Nabhua taa mebhi minokotikale a musalabha bhusi bha Sabható, ngo ibha bhusi ta dhène bheévfala, bhayuda bham-vféma Pilato taa bha bhúnáká makúlú mabho bhaa bhubha gogilá ka bha bhá esisia. ³² Bha sodha bhiidja kotiyo, ka bha bhúná mabháá tabhavfili bhaa bhubha olá nana. ³³ Nübhamba anga Yesu? ka bha mena sogwa leli, bham-bhuné taa bho makulu. ³⁴ Nge sodha tomoi an'kpita n'sie a lopamba, ka dyo kaa manyika ka na malivfa ivfumdua. ³⁵ Undjo ú mená á sambulá, ka adjibha taa ú vfia angili nataa mudjelia dyokuto. ³⁶ Bhima bhio bhikiana nataa, makpalua ma-akisiana: dyolo lésé á malomésé lindje bhunaniésè. ³⁷ Ka égula iyómó ikpalua lavfia kaamó: Numenie úndjo bhun'kpita. ³⁸ Ambusa niyáá, Yozefu wa Limataya, undjo ubhia n'tende wa Yezu, nge taa nkobhané ni ónduwa bhayuda, avféma Pilato lúúsa lü géyà mobhi wa Yesu. ka ágeya mobhi wa Yesu. ³⁹ Nikodema, úndjo ukena pikilie bhotiyo ikoné ména Yezu, éká dyokuto, ádisia mokondjo wésé iekana na bhilinge mia témoi ka na malasi. ⁴⁰ Bhágéyá mobhi wa Yesu, ka bha m'bhingaka n melekani, ka bha midúlá malasi, toku ibha asili ya bhayuda ya iyona bhushe. ⁴¹ Angó ibhia na bhole na égula eyo Yesu ubhia un'gogilane, ka á bholé ibhá na bhudjako bha basi, dyáá mushe toomoi sabhésé mu-onané. ⁴² Ebhá dyaa bhu muná Yesu nisowa li itukulia la bhayuda, mungusá bhúdjako bhi bhia tchekedhé.