¹ Dyáá úvfia bhimá bhio, Yesu akéná na bhatende bhesé a moli wa dyabhá la Kidurani, dyaa ibhia na bholé, dyaa bhutángana idjé ká na bhatende bhesé. ² Yuda, undjo un'kulusia, udjibha egula éyo, mungusa Yesu ká na bhatende bhesé bhubhi kumanakila dyaa. ³ Yuda kotio ageya dyombo lá bha askari, ká bhushe bhá mokamba bhaa bha dumunga bhá bhakoli bhúbhá tu má ká na bha Farisayo, iidja na djobélá, ká na mbámbá dji tshuana ká na mishiè. ⁴ Yesu, udjibhá mitopi miyo mibhinkyanila, abhá bhámbá ká ni bhasowa: nunvfungúngali neni ? ⁵ bhaá munyula: Yesu wa Nazareti. Yesu abha sowa: emi djono. ká Yuda, undjo unkulusia, ubhá nabhó. ⁶ Dyaa Yesu umala ibhá sowa: emi djono, bhané tútúlia ambusa ká bhá kúwá á misiá. ⁷ A bha éyá kaamo: nunvfungali neni ? ká bha vfia: Yesu wa Nazareti. ⁸ Yesu á kpetánia: yasowa nanú taá émi djono. ani kotio kwemi undjo nunvfungalie, ubhá tikilai bhánò bha keni. ⁹ Avfia étò, nisowa látaa livfiá lio uvfia lá akisiana: sibholi siami toomoi abhaá winduwa. ¹⁰ Simoni Petro, undjo ubhia ná kpúmá, á luta aegbotolo, a movfula mushé wa mokambo wan'dumanga wa bha koli, ká aantinà otoi wilume. Mushe wamokamba undjo ubhisiana taa Malko. ¹¹ Yesu avfia na Petro : kpudhusia kpúma yai asemele na egbotolo.indje nyuami kilongi undjo Tita induwá ta ényu? ¹² dyombo lá bha asikari na undjo n'dumanga abho, ká bhushe bha mokambo bhá bha Yuda, bha n'dunga Yesu ká bhá nsangá. ¹³ bhá kénisia pikilie anga Anasi; ngo ubhia inyamoto wa Kayafa, undjo ubhia un'dumanga wa bha koli áedjo éyò. ¹⁴ Ká Kayafa undjo obhówá bhá Yuda makoko maa: yeekpie taa mushe tomoi ooláná nisowa lá bhushé. ¹⁵ Simoni Petro, na wómó n'tende, bhá miká Yesu. n'tende undjo ubhia undji bhikiane na n'dumanga wa bhakòli, ká bhá tangana á bwandja bhá nkota wa bhakoli; ¹⁶ Nge Petro atikalá ábovfo ankpángbá we kùsé. ntende undjomo, undjo ubhiá undjibhikiane na n'dumanga wa bhakoli, avfundua, ansowa Sindili, ká alumusia Petro. ¹⁷ Ngo, mushe wa mokambo, Sindili ansowa Petro: owe dyukuto undjai á bhatende bha mushé uno? avfia: indjami wááò. ¹⁸ Bhushe bha mokamba ká na bháámó, bhaá, bhubhiá dyaa bhá melia isálá; ngo ibhya na lugwe, ká okániá dyokuto. ¹⁹ N'dumanga wa bhakóli amiá Yesu nisowa lá bhatende bhésé ká tókú u gulusakie . ²⁰ Yesu an'kpetania: evfia mono tá vfólóló á kisi inò; ébhi gulusia á sinagogi ká ná yavfúlú ya Mbali, dyáa bha Yuda bhubhá bhakumanile, sivfie mwami ékobhé. ²¹ wiindie naendje? indiya nikúlú lá bhio ebhá sowa: ²² Na mavfia maa, tomoi wa bhushe bha mokambo, undjo ubhia dyáá, a'movfulá Yesu ebhágá, nivfia: édyitó tókù omanyulue n'dumanga wabha koli? ²³ Yesu ansowa: Ani yavfia ebhibhi isoowa iyo yavfia ya ébhibhi; ká ani yavfia ekima, windovfula nendje? ²⁴ Anasia, anenisia, n'sangaké anga Kayafa, n'dumanga wa bhakoli. ²⁵ Simoni Petro ubhia dyaa, ká Sokanie isala. bhaa nsowa: owé dyokutò, undjai a'bhatende bhaa? a'lambulá, ká avfia: indjami iiyo. ²⁶ Tomoi wa bhushe bha mokambo bha n'dumanga wa bhakoli, m'bhutia wa undjo Petro untiná ótói, avfia: Sinénámi owé nana a'bholé? ²⁷ Petro a'lambula kaamó. ká dyokáá éki ikokolia. ²⁸ Bha kenisia Yesu iesa anga Kayafa ká nine kenisia, áalaitolio: ibhya pindi.bhalúmile taabhó ibho bhakulu bhaao a' Palaitolio, ambusa nata bhané gwalé súlú, niena taa bhá toti idhia Pasaka. ²⁹ Pilato avfundua kotiyo ni bhá kénila, ká avfia: indje bhubhi bhúó neena anga mushe uno? ³⁰ bha kpetania: Ani sbhiese mushe wa'bhibhi amba tunédisilású nānā. ³¹ Naeyo Pilato abhasowa: un-geiyai nuwe bhakulu bhááó, ká un-sambisiai iye kanaka na bhutumba bhwanu. Bha Yuda bha nsowa: tundjasu nalokúlú tá lúmoi liné mulusia mushé. ³² Ibbia na taa ya akikisiana livfia lio Yesu uvfia mono, dyaa ubhi vfanishia indje ligwa lio mango ugúè. ³³ Pilato igánaká á Palaitolio, am-bhisia Yesu ká ansowa: owé nkota wa bha Yuda? ³⁴ Yesu ankpetania: ii owé mukulao undjo wa vfia étó, ao bhámó bháa bhane sowa, ikulu lámi? ³⁵ Pilato a'mqnyula: Emi, mu Yuda? ekita yai ká bha dumanga bhá bhakoli bhané kulusia angami: ukia mono endje? ³⁶ Bhukótá bhami bhundjese bhá kisi adjono, Yesu akpetania. Ani bhukota bhami bhubhá gwala bha kisi uno, ambá bha kambia bhami bhusianila, ukulu lámi nataa enegwaliami n'kulusiane ángá bha Yuda; nge bhukota bhwami bhundjese bhwichi ano. ³⁷ Pilato ansowa: owé kotiyo nkóta? Yesu ansowa: wa vfia, emi nkota. ébhutala á kisi ká yeeka á kisi evfanisia bhusamboli bwa angili. Undjo waasemélé na angili wokie dyoi lámi. ³⁸ Pilato ansowa: angili iindje? ambusa na idjé evfia étò, avfundua kaamo nikena ikobhena bha Yuda, ká abha sowa: sénéami bhubhi ta bhúmoi angaese. ³⁹ Nge, tókù asiliwaanganu iii taa inowa nuwe mushe e'vfaya ya Pasaka, noondúwe enowa núwe nkota wa bha Yuda? ⁴⁰ ká kukáámo bha topá bha dyòmá: Mbese, mbésé idje, nge Balabasa. ngo, Balabasa úbha aaga bhúshé bhimà.