¹ Yané sowa mono nuwe bhima bhino, nisowa taa muneko kuwe. ² Bhané bubu nuwe asemele na sinagogi; ká evfumbu iyo ikianiye mushe unoolu nuwe ni kpaa unkambilie Mbali. ³ Ká, bha kiie dyito nisowa taa bha ndje djibhiabho Tita ao emi. ⁴ Ené sowwa mono nuwe bhima bhio, nisowa taa, dya evfumbu yeekiye nunedjulie toku inesowa mono nuwe. Sibhá mwali enesowe nuwe pikie, mungusa ibhá mono nanu egula temoi. ⁵ Ketetino, yakena anga mushe undjo wituma mono, ká, indjese na mushe toomoyi winindiya: ukeni niya? ⁶ Ngé, mungusa inesawa mo nuwe bhima bhiyo, bhu kuku bha neidjala nuwe a mipumatima. ⁷ Ngó, yanesowa nuwe angili: ibha bhusumba anganu taa ekini, ngo, ani sikenie, Mpumatima ya Kengo indje ni idjiliese nuwe; ngé, ani yakena, inetumili nuwe. ⁸ Ká, dyaa wiidjie, idjibhishia kisi isowa lá: bhubhi, ya angili, ka na ya bhutumba: ⁹ nisowa la bhubhi, mungusa bhandje ni djeliabho emi; ¹⁰ Angali, nisowa taa yakena anga Tita, ka mundje ni ndeni bhyanu kaamo; ¹¹ á bhutumba, nisowa taa mona nkota wakisi ino éta a bhutumba. ¹² Ina bhima bhigi bhine sowa nuwe, ngee mundje djibhi anu ketetino. ¹³ Dyaa Mpumatima wa angili unevfanishi nuwe minguso ma angili; ngo, andje vfiese idje mukulao; nge uvfie mitopa miyo wooka mono, ka une kokolie nuwe minguso miyo mi idjie. ¹⁴ Wi bhibhie nisowa taa, manga ugeiye mavfia mami, ka abha kokolia. ¹⁵ Bhitopi bhiyo Tita unao, inao dyokwito; mungusa, ivfia mono taa, ugeiye mitopa miyo inao, ka manga unekokolie nuwe. ¹⁶ Kaamo evfumbu ta bhuwa, ka mundjeni ndeni tanu; ka, ka, kaamo kotiyo, evfumbu ta buwa; munindeniye, nisowa taa ikeni anga Tita. ¹⁷ Dyaa, bhatende bhese bhaamo bha sowana ibho ngungu: indjeyo atu sowa? : kaamo nevfumbu ta buwa nundje nindeni taanu ; ka, kaamo kotiyo, na evfumbu ta buwa, ka nunindeniye? ka: mungusa ikenie anga Tita? ¹⁸ Bhuvfia natá: kamo nevfumbu ta buwa? tundje djibhiasu miyo avfia. ¹⁹ Yesu, adjibha taa bha toti inemiya, abha sowa: neiyana nuwe ngungu miyo ivfia mono: kaamo evfumbu ta buwa, ka mundji ndeni tanu; ka, kaamo na evfumbu ta buwa, ka, nunindeniye. ²⁰ Angili, angili, yane sowa nuwe, nu lilie ka nutelebhanie, ka kisi iseiye: mugwalie na bhukuku, ngé, bhukuku bhanu bhu bashianiye ni seeya. ²¹ Mwali, dyaa ubhutakiiyo, ugwagwalie na bhukuku, nisowa taa evfumbu yese ya kiana; ngee, ambusa nidji bhuta mona, andje djúú tese mpuli wibhuta nisowa lata yasea ibhutala la mushe a kisi. ²² Nuwe kotiyo dyo kwito a evfumbu ino, muna bhukuku; ngee, inenie nuwe kaamo, ka mipumatima manu mi seie, ka indjese na mushe undjo unaagie nuwe iseya lanu. ²³ A bhusi bhuo, nundjo ndiietanu ema teemoyi. Angili angili, yanesawa nuwe, iyoo muvfemie anga Tita, mango no uwe na linya lami. ²⁴ Mpaka saa ino, mundjanu bha vfeme ema tee moyi na lina lami. Vfemai, ka bha nouwe, mungusa iseya lanu likambisiana. ²⁵ Yane sawa mono nuwe minguso miyo na mbendo evfumbu yakiana eyo indje ne sauwe taai nuwe na mbendo, ngee, inesawu nuwe abari ya Tita na bheeto. ²⁶ Bhusi bhuo, mu vfemie na lina lami, ka indje nesawami nuwe taa ivfemie Tita mungusa anu; ²⁷ ngo, Tita kubhanene anonda nuwe, mingusa nuwe mwindunda mono, ka nudjelia mono taa iidja anga Mbali. ²⁸ Yeeka mono anga Tita, ka, yiidja a kisi ino, ketetino yeesa akisi, ka yakena anga Tita. ²⁹ Bha tende bhese bhansowa: weena, toku wa vfia na bheto, ombese na mbhendo. ³⁰ Ketetino tadjibha na taa wadjibha minguso mitopi, kaa, undjaayi na kulu ya mushe iniya; nisowa taa takolia taa weeka anga Mbali. ³¹ Yesu ubha kpetania: na kolia kotiyo? ³² Anai, evfumbu ya kiana, kaa yakiana leli, dyaa nuwe mugwali bha vfandjalé, kila mushe ikena opasika lese ka munitikiye kukalesi; ngee, indjami kalesi, ngo, Tita u nami. ³³ Inesawa mono nuwe bhima bhiyo nisowa taa nugwali guwe angami. Nueni mpuli a kisi ino, seyai, toku itoka kisi.