¹ Ombese m'pumatima wai igbegba djelia Mbali ka neemi. ² Ayavfulu ya Tita, ina bhigula bhigi bhi djumana. ani iyo sibhese dyito, amba yanesowa nuwe. yakena iko tukulia nanu egula. ³ ka dyaa ikeni bhiyo, itukulia nanu egula iidji ka inegeya nuwe, na mungusa dya igwalie nuwe nugwali dyo kuito. ⁴ Nudjibhie dyoowa ikenie, ka nudjibhi ku napaki. ⁵ Thomasi ansowa: Bwana, tudje djibhiasu dyuwa okenie, tuko djibhi paki titani ? ⁶ Yesu ansowa: emi paki, angili, ka emi kuntubhu tomoi andje keniese anga Tita nge kwa ngami. ⁷ Nubhi djibhia mono emi amba nu ndjibha mono Tita. ka ketetino na n'djibha ka na mena. ⁸ Filipo ansowa: Bwana utu vfanishia na Tita, ka dyaa ituakiye. ⁹ Yesu ansuwa: na bhungbé bhuno tumó nanú, ángó nundjé mwanu nunedjibhe? Filipo ! undjo windenie, amena Tita; toku titani wavfia taa enevfanishia Tita? ¹⁰ undje djibhiyai taa emi asemele na Tita? ká, Tita w'asemele nami? mavfia maa inesuwa nuwe, ombese emi mukulao, Tita undjo w'asemele nami idje mukuláo. ¹¹ Idjelia emi, mungusa emi asemele na Tita ká, Tita w'asemele nami, djeliai mekambo mino. ¹² Angili, angili, ya nesowa nuwe, okundjo midjelie, ukiiye mekambo dyokuito emi ikiiye ká mangokiye bhi bhigi ietá, mungusa ikenie anga Tita; ¹³ na bhitopa bhio nu vfemie bhiyo na linya lami, ikiiye, mungusa Tita abhibhiana anga mona. ¹⁴ Ani na vfema ema na linya lami, inouwe. ¹⁵ Ani nindundá, ngbelai mami. ¹⁶ ká emi ivfemie angá Titá, anedisilie nuwe umpumatima wa kengo undjo nugwali bhi nabhó masimatopa, ¹⁷ Umpumatima w'angili, undjo kisi andji patiese, mungusa andje meniese, ká andje n'djibiese, ngó nuwe nundjibhiye mungusa udjumani nanú egula temoi, ka ugwalie nanu. ¹⁸ Indjenetikianu nuwe bha shana, yekie anganu. ¹⁹ Káámo evfumbu yatikala ta buwa, kisi indji ndeni tese, ngó nuwe nuindenie mungusa ekuwe na nuwe nugwali dyokuto. ²⁰ Na bhusi buwo nudjibhi taa emi anga Tita, ka nuwe nu angami, ka emi anganu. ²¹ Undjo una makoko mami ká n'ingbela undjo uindunduwe ka undjo w'indunduwe Tita umundu dyokuto; inemunduwe ka inevfanisie angese. ²² Yuda undjo mbese Iskariota, ansowa: Bwana livfia lio loówe idji vfanisia angasu, ká mbese a kisi? ²³ Yesu amanyula: ani mushe indunda, ungdelie livfia lami, ka Tita umundú bhiye tu ekie angese, na tukiie bhugualo bwasu angese. ²⁴ undjo ani ndunduese andji ngbeliese mavfia mami. ká mavfia maa nuokie indjese mami, ngó ma Tita undjo wituma mono. ²⁵ Inesowa mónó bhima bhiyo dyaa lbhi gwala mono nanu. ²⁶ Ngee, ungbeli mpumatima wa kengo, uwo Tita udishie na linya lami, une gulushakie bhi nuwe bhima bhitopá ká uneigaishie nuwe mavfia matopa maa inesowá mono nuwe. ²⁷ Ya netikila nuwe bhu guwe, ya noowá nuwe bhu gúwé. sinowami nuwe tokú kisi wouwe. ombesé mpumatima mánú igbegba ká ombese nuwe igwala na bhùwá. ²⁸ Nóókà mono toku inesowa nuwe: yakena ká y'idjie angonu kààmo. ani nubhindunda mónó, bhubhà bhushe bhii seya tokú ya kena anga Tita mungusa Tita uun'dumángá ini ndeta émi. ²⁹ Kétetinò yane sowa nuwe bhimá bhiyo pikiye ibhi ikokiana, na mungusa dyaa, ukokiani yoó, nudjelia. ³⁰ Indje vfii taami nanu kaamó, n'kotá wa kisi ino akiyana.andjese nalokúlú angami, ³¹ ngéé, kisi idjibhi taa ine mundu Tita, ká ekiie tókú Tita winduwa, temai, twesi dyano.