¹ Masi tiifu ni kinga ndálá, ápele na Pasaka , Yesu ukena a Betania, egulaiyo Lazaro ubha mono umuwá ká umesisia aligwa. ² Dyaa bhukambisia nána bhima bhii dhia bhii djakolo. Martha a vfakania, ká Lazaro ubha umoi wa bhaa bhu djumane ikulu dya meza. ³ Malia a geya ekulu ya mada membia ya likoli likoli, unsabia Yesu mada a makulu mese káa ngbili djesee, ká yavfulu iidjālà na embia ya maba ma embia. ⁴ Omoi wa bhatende bhesé Yuda Eskariota mona wa Simoni, undjo unekakilia ni ne kulusia uvfia: ⁵ Mungusa wendje mada maembia mono bhusika ikulusia na likoli labhilinge mikama ta misaso ká bha ko bhoowa bhá bhóbhóká? ⁶ uvfia dyito mbese nisowa dya taa, uménéā mushe wa bhobhoká bhukuku, nge tókû ubha mono na lobhia ká udunga étchédhé, ká agéya bhitopi bhiyo ibhamono na semele. ⁷ Nge Yesu ivfia: utikiayi aavfishia mada ma embia maa abhusi bhami bha ligwa. ⁸ Tókù una bha bhobhoka masi kumatopi angai, yeni na taa nundjanu nami egula tomoi. ⁹ Dyombo dya bhaYuda bhaa bhuvfia nata Yesu ubha Bethania; ká bhaa bhéná ombese kwisowa dyese ngee, nata bha komeni Lazaro undjo uumua mono. ¹⁰ Bhadumanga bha bhakoli bha kena ekumbe taa bha mulu Lazaro; ¹¹ bhamó bhagi bha bha Yuda bha kenayabho na munguso wese, ka bhá kokolia Yesu. ¹² Kapuaao, itulumelo bwidja bhu kokiana evfaya iyó bhuoka ivfianata Yesu uiganakie a Yelusalema. ¹³ Bhalólomisia mangalala mpaka apele nana, ká bha kpatisia dyoi: Hozana, Totchibho anga undjo uidjie na linya la Bwana, n'kota wa Israeli. ¹⁴ Yesu abgoka Ngamia tomoi ká adjumana ikulu dyese, dyito ikpluana mono: ¹⁵ Ombese iyonduwa nseke wa Sayuni; n'kota wai akiana, adjumana ni ikulu ya mona ngamia. ¹⁶ Bhatende bhese bha djibhe mwabho munguso miyo wiidja nao; nge evfumbu iyo Yesu ukoliana, bha djuwa kotio nata minguso miyo mikpalwana mono ká menekana ikulu dyese. ¹⁷ Bhatopa bhaa bhūbhá mono na Yesu evfumbuiyo, ubhishia Lazaro ta adjelia ka uumusia apele na bha samboli; ¹⁸ Ka itulumelo bhooka mono n'apele nana, tokú bhooka monataa ukakú bekákò. ¹⁹ Bha Farisayo bha vfia ibho ngungu: neena dyito mutoke mwanu, bhonai tòkú kisi n'topi ya mika kwidje. ²⁰ Bhaamo bha Griki bhaa bhu kpata mono ikokolia evfumbuye evfaya. ²¹ Bhako sowa Filipo Andei ya Betesaida a Galilea, ká uvfia nabhó ta buwa; djuwe tuondue tumeni Yesu. ²² Filipo ikena ikovfia na Andrea ká Andrea ibho na Filipo bha bhakovfia na Yesu. ²³ Yesu abha kpetiá: evfumbu youwa iyo mono mushe ubibanie. ²⁴ Angili angili yanesowa nuwe; ani lopúma la ngano lakua amisia, indje ugwuésé, itikali kalesi; ngé ani yogwa, ibhutu puma ta djigii. ²⁵ Mushe undjo ondu ibhika lese ubholisie, ka undjo usikie ibhika lese a kisi ino, usibhakie ibhika dya masi matopi. ²⁶ Ani mushe wikambia, indikaka; ka dyaa egulaeyo igwalie, dyaa dyokuto, ugwali mushe wa mokambo. Ani mushe undjo wikambilie, Tita um'bibie. ²⁷ Ketetino, mpumatima wanu wa gbegba ká emi evfia titani? Tita indavfishia obo ne vfumbuino? nge, nisowa lio yako kiana na evfumbu ino. ²⁸ Tita, linya libhibiana! ka dyoi dyai idulu dya nguvfa: ya libibisia, ka elibibisie kukamo. ²⁹ Etulu melo lio libhamo dya, ka bha bhookamo mokuma. bhamo bhu vfiamo: avfia nana. ³⁰ Yesu avfia: dyoi dyoi dyokana sibhaese mungusa omi; ngé dyulu lanu. ³¹ Ketetino youwa evfumbu ya bhutumba akisi ketetino n'kota wa kisi uno utuoanie abhovfo. ³² ka emi, dya egwalie n'tubhule ikulu la kisi, etulu la kisi, elutu bhio bhushe bhatopi angami. ³³ N'ivfia nata, indje ligua lio ogu bhio. ³⁴ Etulumelo dyankpetania: djuwe tooka a sheria nataa klisto odjumani masi ka matopi tii a tututu wa kisi; wavfia thitani: igwali nata mono mushe utubhulani ? neni kotio undjo ü mona mushe ? ³⁵ Yesu abha sakua: m'pena umba kunanu evfumbu ta bhua a bhaligogo bwanu. livfia dyoka nukumena m'pena,mungusa livfuwe linekunesigile nuwe: undjo uluvfu a livfu andjedjibhiese nia ukeni. ³⁶ Evfumbu iyo nuna mpena djeliai m'pena, mungusa nuguali bhana. Yesu abha sakua miyo, ka idje ikena, ka idje ibha kobhanila. ³⁷ Imbiese toku abhavfanisia abhugi bhikako, bha ndjelie mo abho. ³⁸ Mungusa ilondula livfia la Isaka, n'kanga, lio uvfia mono: Bwana, neni undjo udjelia mo minguso miasu? ka, neni undjo Bwana umavfisia mo obho? ³⁹ mungusaao bhatoke mo abho idjelia, mungusa Isaya uvfia kukaamo: ⁴⁰ ABasiga madjo mabho, akpingbimanisia mipumatima n'puma n'tima mabhô mungusa bhanekoidje ikoena na madjo mabho ngé bhanekodjibhe a m'puma n'tima,bhanekobhasie ka emi ibhabhikisia. ⁴¹ Minguso miyo Isaya uvfia, na obibo iyo wena mo, ka idje ivfia nana. ⁴² Ka,bhamo bha kota bhu n'kolia mo nine n'djelia, ngé isowa la bha Firisayo bha bhusika inendjelia, na bhua li bhasaga a sinagogi. ⁴³ Mungusa bhondu ikolia la bhushe ieta ikolia dya Mbali. ⁴⁴ Ka, Yesu ivfama: un'djo w ikolie andi ikoliese emi ngé un'koli n'djo wi tuma mono; ⁴⁵ ka n'djo wi ndeni am'mena un'djo wi tuma mono. ⁴⁶ Yidja mono tuku mpena a kisi, mungusa un'djo wikoli andedjumaniese a livfu. ⁴⁷ Ka mushe n'ndjo okoli minguso mami ka ombese idunga, mbende emi n'djo en'tumbu; mungusa sidje mo ami ikotina bhutumba akisi, ngé ikobhikisia kisi. ⁴⁸ Un'ndjo wi tuuwe ka na n'ndjo usiki ibhiga minguso mami una n'tumba lese; mungusa uwo yavfie leli,uwouwo mungusa un' tinili bhutumba atututu a kisi . ⁴⁹ Mungusa uwo sivfie mo ami na bhuondusia bwami, ngé la Tita, un'ndjo wi tumā, wi ndua makoko ma minguso miyo evfie ka ni bhasakua. ⁵⁰ Ka edjibhie nata makoko mese makotio ibhika djaa masi ku matopi, ma minguso miyo yavfia toku Tita wi sakua mono.