¹ Angili angili yane sowa nuwe, undjo úlumilie á mokumba wa mekoko mbèse ieta á mulango, ú mushe wa lóbiya ka á aga bhima. ² Nge undjo ú lumilie á mulango úngbeli wa mekoko. ³ N'gbeli wa mulango á ogula mulango ka mekoka bha óka dyoi lèse; á bha bhisia na manya mábhó, ka ábha vfundusia á bhovfo. ⁴ Dyaa úbhiá mekoko mèse kubhanene, aeta ápele nabho; ka mekoko mya mika, mungusa bha djibhie dyoi lèse. ⁵ Bhane mikiabhó undjo bhané n'djibhiabhó; nge bha keni dhomú nana, mungusa bhandje djibhiabhó dyoi dya bhamó bhushé. ⁶ Yesu abha sowa na mbendo, nge bha djibhé abha iyo úvfia. ⁷ Yesu ábha sowa kaama: angili angili yanésowa nuwe, émi mulango wa mekoko. ⁸ Bhatopa bhaa bhuidja ápele nami bha na lobhia ka bha ága bhima. Nge mekoko mibhoké ábho. ⁹ Emi mulango. Ani mushe á lumila anganu ugwalie mubhiké; úlumilie ka úvfundúe ka upatie bhima bha tumbu idhia. ¹⁰ Mushe wa lobhia ú idjièse ku ikoteiya, itina milinga ka ituka; Emi, ya idja na isowa la taa mekoko mipati ibhika, ka ta mivfúlú. ¹¹ Emi n'gbeli wan'kima, ngbeli wan'kima úákakie ibhika á mekoko mèse. ¹² Nge n'vfukania, andjese n'gbeli, ka úndjo mékoko mindjese miese, ena ambuwa wan'kali üdja, átikila mekoko, ka ákena mavfi; ka ambuwa wan'kali á ma aga ka á bha vfandja. ¹³ N'vfukania á kena mavfie, mungusa idje igwala n'vfukania, ka andje tesekiese isowa la mekoko. Emi n'gbeli n'kima. ¹⁴ Idjibhie mekoko mami ka imo mi idjibhie. ¹⁵ Toku Tita wa idjibhie, ka toku emi endjebhi Tita; ka yaówá ibhika lami á mekoko mámi. ¹⁶ Kaamó na mekoko mimo, mio mindjese ma mokumba áúno; bhaa, ékpie taa ébha disia; miokie dyoi lami, ka bha gwalie ékombu téémoi, ka n'gbeli tomoi. ¹⁷ Tita indunda mungusa yaoowa ibhika lami, ambusa ta limiganilie. ¹⁸ Mushe andje idhagiese, nge yaóowa ku bhanene; enalokulu la iowa, ka enalokulu la igeiya kaamo: ino i lúusa lúo yoúdha anga Tita. ¹⁹ Ibhia kaamo, isowa la mvfia maa, ivfakanaka la Bhayuda. ²⁰ Bhagi angabho bhuvfia: ú na múgú ú na tombe; nú mokie mungusa wa éndje? ²¹ Bhaamo bhuvfia: indjese mavfia ma undjo ú na múgú; múgú úpasi iégula madjo ma bhaa bha na bhútiti? ²² A'yelusalema, ibhia na evfaya ya ine biba Mbali na djumbo, ibhia á evfumbu ya lúgwé. ²³ Ka Yesu úbhikpatula, á semele na yavfulu ya Mbali n'tuwa wa Salomoni. ²⁴ Bhayuda bhan'kungila, ka bhan'sowa: mpaka wakati yania údhulusie mipumatima nyasu? Ani ówe Kilisito, útúsoowa fomu. ²⁵ Yesu abha kpetania: ine sowa nuwe, ka nu djelie anu. Mekambo miyo ékiie na linya la Tita ma isambola. ²⁶ Nge nundje djelianu mungusa nundjanu mekoko mámi. ²⁷ Mekoko mami miokie dyoi lami; émüdjibhie ka imo ma indikie. ²⁸ Ya bha owa ibhika la masi matopa; ka bhandje úguabho ta bhuwa, ka mushe andje bha agièse á mabhó mámi. ²⁹ Tita, undjo indua nabho, údhène iéta bhatopa ka mushe andje tokiese ibha ágá á obhó wa Tita. ³⁰ Emi ka Tita tu omoi. ³¹ Ngo Bhayuda bha geia mambúo kaamó na ine n'kulia. ³² Yesu abha sowa: éné vfeisia nuwe abhugi wa mekambo miyo ma idja anga Tita: dyulu la éndje núikulie mambúo? ³³ Bhayuda bhan'kpetania: mbese mungusa mokambo wan'kima úwo tunekulie mambúo, nge dyulu la inésésaka Mbali, ka ówé, undjo ú mushe, wa dji kia Mbali. ³⁴ Yesu ábha manyula: indjèse ékpaluané á selia yanú: ivfia: nú tu Mbali? ³⁵ Ani ibhisia taa tu Mbali i anga néni livfia la Mbali libha kianila, ka ani makpalua mandje pasièse iletilana, ³⁶ Úndjo Tita ún'kengula ka an'tuna á kisi, nan'sowa: ún'sesáki Mbali! ka eyo mungusa évfia: émi mona wa Mbali. ³⁷ Ani endje kú ami mekambo ma Tita, mbese nuwe ine idjelia. ³⁸ Nge ani emi küe, imbièse toku nundji nidjelianú, djeliai mekambo mèse; ambusa taa núdjibhi ka nuné djulia taa Tita ú angami ka émi á semele nana. ³⁹ Dyaa kotiyo, bha vfungala kaamó ine dunga, nge á lemúwá á mabho mabho. ⁴⁰ Yesu ikéná kaamó iyéta Yolodhani á égula éyo Yohani ú djinisia pikilie, ka á djumana. ⁴¹ Bhushe bhagi bhúmidjilá, ka bhúvfia: Yoane sa kieèse ékako ta émoi; nge mitopa miyo Yoani úvfia dyulu la mushe úno ibha angili. ⁴² Káo, á égula éyo dyaa, bhagi bhun'djelia.