¹ Anganú ketetino, bhagumia! lilai ka simbai, dyulu dya mpuli uwo unekianili nuwe. ² Bhugunia bhánú bhu vfolie, ka ngombe djanu dji dhianie na pavfá. ³ Óló lánú ka bhilinge bhanú bhwákúkà; ka ikúká lááo linetemeli nuwe toku bhusamboli, ka ikuka lio idhüe mebhi manu toku isala. Nukúmanishia mátò mánú a masi má tútútú! ⁴ Énai, évfindó ya bháá bhuné koléa núwe mabhulu, ka bhaa nubhaondusia, bha vfámá, ka ivfámá lábhó lákiana anga Bwáná wa lokúlú. ⁵ Nubhika a kisi na iyonda la mipumatima mwanu ka ékwété, ka nu-idjaleshia mitima manu a bhusi bhi iyólushia. ⁶ Nubhá dúnga, na bhá-olá bháá bhubhia endjini, bháá bhané tokea bho nuwe. ⁷ Gwalai kotiyo ni isibhaka, bha monima ku a idja la Bhwáná. Énai, n'kambia wa mabhúlú usibhakie púma dja misia, ni-sibhika mbúlà dja pikilie djü kouwe ká na dja mbúsa na evfúmbu. ⁸ Nuwe dyokútó, gwalai ni sibhaká, dhúlúsia mitima manú, ngo iyeká la Bhwáná lóuwá tshékédhé. ⁹ Nugbegbai-anu niné vfilakakia ibho na bhaamo, bha-monima am-bhusa na taa nune sambisiane: énai, ntumba akiana a-ékuse. ¹⁰ Bha monima ekai mpuli ka ibhelia toku bha kanga bhuvfia a linya la bhwáná. ¹¹ Enai, ta vfia taa: isea likima anga bhaa bhwena mpuli na-isi bhaka. Núóká iyo i-vfiáná ni bhelia la Yobho, ka nu-éna ambusa iyo bhwáná u kia nana, ngo bhwáná ú mwidjalé na bhukúkú ka bhwakané. ¹² Apélé na bhima bhitopa, bhamonima, mbese nuwe ilápá ikúlú la nguvfá, imbiésé a misia, ao na-ilapa i-limo. Nge idjelia lánú ligwaliésé ku-idjelia ka isika lánú igwaliese ku isika, ambusa taa munekuwe iitshi la bhutumba. ¹³ Omoi wanu am'puli? kia avfemi. Omoi wanu u niséea? kiaabheli djumbo dja lobibo. ¹⁴ Omoi wanu u-na ndutu? kia abhisia bhagagulu bha Kanis, kia bhagagulu bhavfemi ikulu lese, nine tilia madha na linya la Bhwáná; ¹⁵ Ivfema li-idjelia libhikisie n'sambia ka Bhwáná um'bhikisie ka ani ukia djambi, ugwali muésisiané djambi. ¹⁶ Tubhuai djambi djanu ibho na bhaamo, ka vfemai ikulu la bhaamo ambusa taa nugwali bha bhike. Ivfema la masi kumapota la bhaa bha-endjini inaloku ta lúgi. ¹⁷ Elia ubhia mushe tóku djuwe: uvfema nan'vfévféné taa mbula sikowa, ka mbula sikowe ésé bhidjo ta bhisaso na meli bhukingia ndala(Sita). ¹⁸ Ka avfema kaamo, ka ikulu la nguvfa la kosia mbula, ka misia ma bhuta lopuma lese. ¹⁹ Bha monima, ani tomoi wanu u bhola ta dhomu na livfia la-angili, ka woma an'kpudusia a livfia, ²⁰ Adjibhi taa undjo un'kpudhusie mushe wa djambi tomoi a paki iyo u bhola u'bhikisie mpumatima toomoi a ligwa ka wanesigila na abhugi wa djambhi.