¹ Bha mónimá, ombésé igwala anganu na bhushe bhagu bhaa bhagwali ni-igulusia, ngo nudjibhu taa tugwali bhasambisié ta kpingbi. ² Takia bhubhi djuwe bhatopa na paki djigi. Ani mushe sakie bhubhi na mavfia, u-mushe undjo a-kámá, utoki isukamia mobhi wese. ³ Ani miniki miyo tan'sangila bha falasa á-anyuwa mungusa wibha lu vfusia, tuluvfusie dyokuto mebhi mabhó kumitubhu. ⁴ Enai, émbi bhakúkú bha dhéné bhaa bhénikianie na mevfuvfu má lokulu, miluvfushame na n'kai wa búwá ni-óndá láá luvfusia. ⁵ Dyokuto, élami, evfusa ta buwa ya mobhi, éküe bhima ta bhigüi. Enai, tókù isala ta buwa livfambhie muliewa ta dhéné. ⁶ Elami dyokútó i-egwalé, kisi dyokuto u-i-mwetanè. Elámi é-egwalé á mango masu ma mobhi, yatuka mobhi wású kun'tubhu, ka i-vfambie ibhika lasú, iyo kubhanene é-vfambani a genena. ⁷ Tumbá étopa ya tumbu ka ya manóli, bhaa bhá-dhadhie ká tumbu djio dja a malivfa djo-owana ká djibhá djóowane na kisi wa bhushé. ⁸ Ngé élami, mushe toomoi andji-iyowésé; ibhubhi bhuo bhundje esisianiésé; mungusa i-mwidjalé na lotshéngú lá ligwá. ⁹ Na Elami tu bhalikie bhwáná idja- wasu, ka kuna elami tu túnákie bhushe bhaa bhu kiáná na a kuvfé wa Mbali. ¹⁰ Na ányua djokundjo ivfianakie ibhalikia kani tunaka. Mbésé, bha monima, igwali dyito. ¹¹ N'tuwe wa si langa undji kpalaliésé egula teemoyi malivfa mi-inywa ka na ma-makali? ¹² Eti téémoyi, bha-monima epasi ibhuta puma dja Olive, ao puma dji bhutu bhutü? Malivfa man'neli mandji bhutuésé taa buwa malivfa m'inyuwa. ¹³ Néni wanu undjo u-n'tumba ka na otinga? Avfanisia mekambó mésé ni luvfa la likima niné dulusia la bhuitumbha. ¹⁴ Nge, ani nangai na n'tima bhugwalo bhábhukali ka mbésé ivfia ebhélá alivfia la-angili. ¹⁵ Bhutumba bhúno bhwidjésé i-ikulu lá nguvfa; nge i-bwamisia, bhwa mobhi, bhá bhágù. ¹⁶ Ngo dyáá inabhugwaló bhábhukali ká na n'tima wi-bhikianaka, i na moyeye ká na tùmbá étopa ya mekambo ma mibhibhi. ¹⁷ Bhu túmbá bwikulu lá nguvfa bhú pikilie taa túú, kaamo ta guwe, ta mwenekané, alonganisia mwidjalé na bhukúkú ka na púmá dja djikima, igwala dhomu na bhúkubhi, ombésé bhusúélé. ¹⁸ Lopumá la bhutumbá luloonáné a bhuguwe anga bháá bhu-ungali bhu guwé.