¹ Yakobho, n'kambia wa Mbali; ka na wa Bhwáná wasu Yesu Kilisito, á makabhila ta bhúu na djimo ta epili djo djibhia dji vfandjale, tshamba! ² Bhamonima, djibhai taa i iseea angili ani na kuwa á madyalibho kuvfikuvfi; ³ Na idjibha taa idjalibhia lami á idjelia ibhutuwe ibheliya. ⁴ Nge ekpie taa ibhelia lanu li akikisia ekima mokambo wanu, ambusa taa nu gwali bhakame ka bha akikisiane, na mbese ikuwa ta bhuwa. ⁵ Ani tomoi wanu á kanda bhutumba, á livfemi anga Mbali, undjo ú ouwe ketiti, anga bhatopa ka na mbese inevfamila, ka ú lipatie. ⁶ Nge á livfemi na idjelia, mbese i sita, mungusa undjo ú sitiye ú m'vfilane na kesukwa wa dyabha la dhene, edigisiane na movfuvfu ka iyenikiane ngambo djitopa. ⁷ Mushe toku undjo sa waziese taa ú udhuwe ema ya Bhwáná: ⁸ Ú mushe tomoi wa mawazo ta mavfili, andjese muteme á paki djese djitopa. ⁹ Kia monima, undjo ú mudulusiane á djibibi á itubhulana lese. ¹⁰ Kia n'gumia, á djibibi á idjidulusia lese; mungusa ú etiye toku liuwa la ebisi. ¹¹ Dyuvfa la vfunduwa li kali, ka la omisia ebisi, liuwa lese la kuwa, ka bhusumba bha hali ya ese la limuwa; na iyo n'gumia ú bholie á pakidjese. ¹² Aseea mushe undjo ubhelie na isibhaka itshutshana; mungusa , ambusa na idjeitshutshana; mungusa, ambusa na idje itshutshana, ú udhuwe á kuma wa ibhika, uwo Bhwáná ú laka anga bhaa bha munduwe. ¹³ Kia mushe ta omoi, dyaa utshutshanie sa vfie ese taa: i Mbali undjo itshutsha. Mungusa Mbali andje tshutshaniese na bhubhi, ka andje tshutshuese idje mukulu aao mushe. ¹⁴ Nge kila mushe ú mutshutshane dyaa ú gwalie muekane ka nukombane na kulu ese kubhanene. ¹⁵ Ka kulu, dyaa ibhutuwe, ibhutue djambi; ka djambi, ani walikambila, li bhutuwe ligwa. ¹⁶ Mbese nuwe ikombana, bha monima bha ondusia bhami; ¹⁷ Lokowa litopa la lukima ka liowa litopa la likima ma idjie á ikulu, anga Tita wa mpena, anga undjo indjese na mabha dhiliko imbi akuvfe wa inebhasakia. ¹⁸ Utu bhuta iyekana na iyonda lese, na livfia la angili, ambusa taa tugwali toku bhhaa bha pikiliye a mabhoti mese. ¹⁹ Djibhai bha monima bhaondusia, na kotiyo, mushe n'topa agwali na iyoka mangbalangba, mbese ituluganaka á ivfia, mbese isuma mangbalangba; ²⁰ Mungusa bhusungu bha mushe bhundje akikiese bhu endjini bhwa Mbali. ²¹ I dyulu iyo, na itikila bbusulu bhutopa ka na bhuswele bhutopa bha ieta, udhayi ta bhodhee livfia liyo li avfisiana angai, ka liyo lipasie ibhikisia mipumatima manu. ²² Kambisiai livfia, ka mbese nuwe idji owa á iyoka, á ikombana owe kubhanene na mawazo mai mabhibhi. ²³ Mungusa mushe á oka livfia ka na mbese ili kambisia, ú muvfilane na mushe undjo ú bhonie luena bosio bhese bha ibhutala, ²⁴ Ka undjo, ambusa na idji bhona, á kena, ka á sunuwa toku ubhia. ²⁵ Nge undjo ú bhonie selia ekima, selia ya uhulu, ka undjo ubhelie, na mbese igwala undjo ú oka okie ka asunuwa, nge wa ikambisia, undjo ugwalie mu seee á mokambo wese. ²⁶ Ani mushe ú kpalie taa ú mushe wa kanisa, na mbese idjibha i egila anyuwa wese, nge na ikombaka mpumatima wese, kanisa mushe undjo indjese na yenu. ²⁷ Kanisa ya túú ka na ya mbese n'kiki, apele na Mbali idja wasu, i ikena iko bha nyunya bhaa bhuogusia bha bhutia ka bhasiana bha bhali á mipuli mabho, ka na idji ngbela na bhubhi bha kisi.