¹ Á namúna yomo Petelo káoani bhu bhivfia na bhushe, bhakanga bhu djanila, n'dumanga wa kanisa ká na bha Sadhukayo, ² Na mbéso isééya na iyo bhubhi gulusia bhushe, ká bhubha kókoliya dyúlu lá Yesu iúmúwa, lángá bhàa bhúogwa. ³ Bhubha dunga, ká bhubha tuwa á nudyalóló mpáka kanima áàó; mungusa ibhiya sa ouwa idjakolo. ⁴ Na iyo, bhagi bhàa bhúóka livfiya lá Mbali bhúdjeliya, ká ésabho ya bhushé itubhulana iyekanaka na éléfu ta éfú. ⁵ Kapúma áàó, bhakota, bhagagúlú ká na bha kpalúwá, bhú kúmanila á Yeluzalema, ⁶ Ká na Ána, n'dumanga wa bhakanga, Kayafa, Yoani, Alegizandele, ká na bhatopa bhàa bhú bhiya na tùmbá ya bhakanga. ⁷ Bhúbhá avfisiya Petelo ká Yoani á bholigogo bhabhó, ká bhú bheiya: Na luúsa lá neni, áo na linya lá neni iyo nukiya miyo? ⁸ Na dyàa Petelo, nuidjálé na mpumatima wa kengo, abhasowá: núwe bhakóta, ká na bhagagúlú bhá Isalaeli, ⁹ Mungusa tú iyána bhusi bhúno dyulu lábhusumba iyo tu owá á mushe tomoyi wa ndutú, mungusa tuvfi namúna yaniya ubhiká, ¹⁰ Ddjibháyi núwe bhatopa, ká na bhushe bhatopa bhá Isalaeli bhadjibhi, I á linya lá Yesu Kilisito wa Nazaleti, undjo nú n'gogila á musalábha, ká undjo Mbali ú mumúsiya angá bhàa bhú ógwá, i dyúlú lesé liyo mushe únòo á énikana na mobhi ta n'kima ápele nanú. ¹¹ Yesu ú libhoyi liyo núwa bha kpéliya nu likuliyá, ká liyo lioúwa lá likima á mángano má ya vfúlú. ¹² Indjese na ibhika angá womó; mungusa indjése na linya lino á itshi lá ikulu lá nguvfa liyo liowána ángá bhushe, á liyo tu gwaliye bhabhiké. ¹³ Dyàa bhú éna angili tàa Petelo ká na Yoani, bhú sangálá, na idjibha tàa bhubhiya bhushe bhá mbese otingá, ká bhubhá djibha tàa bhubhiya mulungo na Yesu. ¹⁴ Ngé tókú bhú éna kalibho nabhó mushe undjo ú bhiká, bhabhá tabhó na, ya ikpetaniya. ¹⁵ Bhabhá lúusiya bhávfundúwá á ntúwá, ká bhá andjá i uyanaka ibhó bhakúlú bháàó na ivfiya: tu küye indjé angá bhushe bhánó? ¹⁶ Mungusa i edji bhikané na bhushe bhatopa bhá Isalaeli tàa ekákó ta émoyi iyo ivfanisiana, ikiyáná na bhushe bhàa, ká tundje pasie asú ilambúlá. ¹⁷ Ngé, naisówa tàa mbino iyodjine lagatane anga bhushe, tubha si kisiayi na ibha vfanila tàa mbi téesé ibhi ikpola linya liyo ká amo anga mushe tá omoyi. ¹⁸ Ká na ibhá bhusiya, na ibhasikisiya tàa bhavfie ká bhagulusiyá linya lá Yesu. ¹⁹ Petelo na Yoani ubha kpétania: i endjini, ápele na Mbali, tuné ésimiya núwe kólikó Mbali; ²⁰ Màama djúwe tundje tikilèasu ivfiya miyo tú éna ká tú oká. ²¹ Bhubhá vfamila káamó, ká na ibhatikila, na mbèse idjibha paki yaniya ibháowá azábho, dyúlú lá bhushe, mungusa bhatopa bhúm'biba Mbali na iyo ikiana. ²² Mungusa mushe undjo úbhiká na ekakó iyo ubhiya na myáká iéta makomo ta maámoyi. ²³ Ambúsa na ibhó itikiláná, bhukéna anga bhàa bhabhó, ká bhúbhá sowá mitopa miyo bha dumanga bhá bhakanga ká na bhagagúlú bhúbhá sowá. ²⁴ Dyàa bhúóká miyo, bhúkpatisiya ibhó bhatopa dyóyi lábhó angá Mbali, ká bhuvfiya: Bhwáná, owé undjo úkiyá ikúlú lá ngúvfá, kisi, obhingi lá dhéné, ká na bhitopa bhiyo bhi á semele, ²⁵ I owé undjo úvfiya na mpumatima wá kéngo á anyuwa wa idja wasú, n'kambiyá wáyi Daudi: mungusa wa éndje bhikita bhitopa bha óúwa na moyeye, ká na mawázo má tititi angá bhushe? ²⁶ Bhakótá bhá kisi bhúsumá, ká bhána bhá bhakota bhú kenila Bhwáná ká Kilisito wesé ikumbé. ²⁷ Dyúlú lá iyo, Elodhe ká potiyo Pilato, na bhàa bhá kéngo na bhushe bhá Isalaeli, bhúkulu manila á ndéyi ino dyúlú lá n'kambiya wáyi wá kéngo Yesu úndjo ún'tiliya mádá, ²⁸ Múngusá bháku étopá iyo obhó wáyi ká na bhukókó bháyi bhuvfiya tangia ngbé. ²⁹ Ká ketetino, Bhwáná, éna ivfámà lábhó, ká owá bha kambiya bháyi lokulú lá ikokoliya livfiya láyi na m'vfevfene n'topá, ³⁰ Na inanulá obhó wáyi, mungusa úbhikisiya, ú kü bhikako ká na ma adyábho, na linyá lá n'kambiya wayi wá kéngo Yesu. ³¹ Ambusa na imála inévfema Mbali, egúlá éyo bhubhiya bha kulumanile ya diganiana; bhaidjalá bhatopa na mpumatima wa kéngo, ká bhú kókoliya livfiya lá Mbali na nvfevfené. ³² Bhagi bha bhàa bhú djeliyá bhubhiya ku mobhi ku tomoyi ká mpumatima ku tomoyi. Tá omoyi savfiesé tàa bhima bhiyo bhi byèse ku bhanéné, ngé bhibhiya byabhó ibhó bhatopá. ³³ Bhatendé bhubhá sambola nalokulu ta lugi i umuána lá Bhwáná Yesu. Ká lokówa ta dhéne lú owana angabhó, ³⁴ Mungusa sibhiesé angabhó na mobhóka tóomoyi: bhatopa bhàa bhubhá na mabhúlú áo na byavfúlú kulusia, bhudisiyá bilinge bhá bhima bhiyo bhúkulisiyá, ³⁵ Ká bhuliavfisia á makulu ma bhatende; ká bhubhi vfakaniyá iyekána na kúlú ya kila mushé. ³⁶ Yusufu, m'bhisiané na n'tendé Bhalanabha, iyo ivfie tàa móna wa ikomulana, Mulaniwi, mushe wa Kipolo, ³⁷ Ú kulusiya bholé bhúwo ú bhiya nàó, udisiya bhilinge bhá aó á makulu mà bhatende.