¹ Paulo, mádjo ma bhoné anga bhadumangá bha bhakoti, avfia: bha mónimá bhá bhalume, ina dyoi dyami dyalikima litopá lá mpumatima wámi lio lütumá mpaka bhusi bhúno á pele na Mbali. ² N'dumangá wa bhakoli Anania á luusià bháá bhubhà tshekedhé nana ta bhá movfulá á anyuwa. ³ Na dyàà Paulo ánsowa: Mbali únéovfulu bhie, logubhó yaówa mpembe! owé ódyano n'djumané dyulu la inisambhisia iyekana na selia, ká wa bhúnà selia na ilusia tàà bhi indovfula! ⁴ Bhàa bhúbhia á tshekedhe nànà bhúvfia: owé wan'seka n'dumanga wa bhakoli wa Mbali! ⁵ Ka Paulo ávfia: si djibhé ámi, bhamónima, táá ibhia n'dumanga wa bhakoli; nge ikpaluana: undje vfi bhiai ébhibhi na sulutani wa bhushé bhai. ⁶ Paulo, na idjibhe taa á etulumilo opasika lumo bha Falisayo, akpatisia dyoi apele na n'dumanga wa bhakoli: bhamonima bha bhalume, emi mu Falisayo, mona wa mu Falisayo, ikuu mungusa wa ikpalia ka iumusia bhaa bhougwa lio ya avfisiana a bhutumba. ⁷ Dyaa uvfia eto, bha Falisayo ka bha Sadhokayo bhaandja lobhiko, ka etulumilo ya vfakanaka. ⁸ Ngo bha Sadhokayo bhavfia taa iumua lindjese, ka indjese na ntambia ao mpumatima, opasika lumo bha Falisayo bhu djelia bhima bhio tabhivfili. ⁹ Ibhia na elunda ta dhene, ka bhakpalua bhaamo opasika la bha Falisayo, bha tema, bhatuana nganyi, ka bhavfia: tundje eniasu bhubhi tabhumoi anga mushe uno; saipmo mpumatima wa kengo toomoi ao ntambia tomoi undjo un'sowa. ¹⁰ Dyaa lobhiko lu djilia, ndumanga wa bhasudha á ondua ta Paulo bhane vfundake bhisulu bhisulu na bhushe bhaa, á dulusia bha sudha mungusa bhan'geya Paulo á bholigogo bhwabho ka bhan'kenisia a yavfulu ya Kaisala. ¹¹ Bhotio bhwa kapuma aao, Bhwáná á n'ndjanila Paulo, ka avfia: Mbèse iondua; nge, tókù dyokuto udisia bhusamboli bhwámi ásemele na Yelusalema, iekpie dyokuto taa udisia bhusamboli á Loma. ¹² Dyaa bhusi bhwa giya, Bhayuda bhalumila ikumbe, ka bha okana na ivfia taa bhandje dhie ka na inyuwa ku taa bha múlà Paulo. ¹³ Bhaa bhulumila ikumbhe lio bhúbhia iéta makomo ta mánai, ¹⁴ Ka bhúkena ikogboka bhadumanga bha bhakoli ka na bhagagulu, bhaa bhubhasowa: ta dunga mwango djue kubhanene, mbèse djue idhia mpaka dyikaa tu mulu bhie Paulo. ¹⁵ Nuwe kotiyo, ketetino, únsowai n'dumanga wa bhasudha, an'disia á pele nanu, toku kuku nutotie idjibha hali yèse ekima; ka djue, á pele na idje ibhamba, tu gwali tayali na ine múla. ¹⁶ Mona wa n'sali wa Paulo, na iyoka mbino djio, úkena á ya vfulu ya Kaisala anko nsowa Paulo. ¹⁷ Paulo um'bhisia sindili tomoi, ka avfia: un'kenisia n'nongo uno anga bhakota, mungusa úna livfia la inesowa. ¹⁸ Sindili an'geya n'nongo undjo, ankenisia anga n'kota, ka avfia: mushe wa mudya lolo Paulo ibhisia, ka ikomula ta endisia angai n'nongo uno, undjo ú na livfia ta lumoi la inesowa. ¹⁹ Nkota wa bhasudha, na inen'dugo n'nongo undjo á obhó, ka bhane luta an'bhongo, á miya: una endje ya inisowa? ²⁰ Ankpetania: Bhayuda bha okana ta bhanevfemi on'disia Paulo kapuma á pele na n'kota wa bhasudha, toku mushe undjo wa ondue idjibha hali yèse ya ékina. ²¹ Mbèse owe ibha oka, nge iyeta makomo tamanai kati yabhó bhan'tumila mbino dja djibhibhi, ka bhu dunga mwango, ibho ku bhanene, ta bhasiki idhia na inyuwa mpaka bha mulu Paulo; ketetino ibho bhaa tayali, ka bhosi bhiabho ku idjelia lai. ²² N'dumanga vabhasudha angbudu sia,n' nongo undjo, ambusa na idje ine muva, makoko taa mbese ivfia na mushe miyo wisowa. ²³ Kaamo á bhisia bha dumanga ta bha vfili bha bhasudha, ka avfia: únevfangai, kwa ásaa ya bothio, bhasudhá mia ta épili, bha aluvfusia bhafalasa makomo sabha, ka bha óndua mia ta épili dyulu dyi ikena á Kaisalia. ²⁴ Kia égwali dyokuto na falasa n'tukulie dyulu dya Paulo, ambusa na ta nuidji na bho anga Guvelenele Felikisi. ²⁵ Úkpalua malubha maa muvfia: ²⁶ Kolodilio, Lusia, anga Feliki guvenele, m'bibiane; isamba! ²⁷ Mushe úno, Byayuda bha bha bhan'dunga, ubhá taa bhamulu, dyaa ya dyanila na bhasudha ka ya bhaaga na iyoka taa úbhia mú Loma. ²⁸ Ya ónda èdjibhi koko eyo bhusitaka, yan'kenesia á pele na nkota wa bhasudha. ²⁹ Igboka ta ubha n'sitake isowa lá minguso mio mibhoni selia yabho nge sa kiese ema ta emoi ya ebhibhi iyo ya aka taa manga aogu ao akenisiana á mudyakolo. ³⁰ Dyaa edjibha taa Bhayuda bhunlevfula milungo, yane disila nana taa ao angou. tuenikanie. ³¹ Bhasudha, iyekana na luusa luo bho udha, bhan'geya Paulo, ka bhan'kenisia bhotiyo mupaka kúá Atipatili. ³² Apúmá aao, bhatika bha luvfusia falasa bha keni nana mulungo, ka bha iganaka a'yavfulu ya dhène. ³³ Na ikiana á Kaisala, bha luvfusia bha falasa bha muwa Guvfelenele malubha, ka bha muwa Paulo. ³⁴ Ambusa na isoma malubha, Guvfelenele amia Paulo taa owe mushe wa Polovese ya nia. Na idjibha taa ubha mu Silisia: ³⁵ Ene sambisie, Guvfelenele avfia, dyaa bhaa bhunesi taka bha idjie. Ka alúúsia taa bha n'ngbeli á yavfulu ya Elodhe.