¹ Dyaa Apolo ubhia á Kolito, Paulo, ambusa na iluvfa Polovese dji úku dja Azia, á kiana á Efeso. A'kumana na bhatende bhamo, á bhasowa: ² N'úúdha mpumatima wa kengo dyaa nudjelia? Bha nkpetania: tundje mwasu bha óké ivfia taa i na mpumatima wa kengo. ³ Avfia: indje idjinisia lio mudjina? ka bha ankpetania: idjinisia la Yoani. ⁴ Ngo Polo avfia: Yoani udjinisia idjinisia la iesisia djambi, na ibhasowa bhandjelia undjo wi idji ambusa nana; evfivfele na taa, Yesu. ⁵ Na mavfia maa, bhubhia bha djine na linya la Bhwáná Yesu. ⁶ Dyaa Paulo ubha avfisia mabho, mpumatima wa kengo, ya bha djamila ka bhavfia. mavfia kuvfikuvfi ka bha enga makanga. ⁷ Bhu bhia bhatopa bha ekane bhushe ta bhúu na bhamo tabha vfili. ⁸ Kaamo Paulo alumila a'semele na Sinagogi, dyaa úvfia na úhúlu. Na meli ta misaso, úkokolia dyulu la bhima bhio bhibhoni bhukota bha Mbali, na ikia lokúlú li ikamisia bhaa bhu moka. ⁹ Nge, toku bhaamo bhutikala mitima kpingbi ka mbese idjelia, na isekisia á bhugi bhaa bhu bhiya á paki ya Bhwáná, aneluta na bho, avfakania bhatende, ka á gulusia kila masi á semele na kalasi ya Tilano. ¹⁰ Iyo i-livfia bhidjo ta bhivfili, na taa bhatopa bhaa bhubhia bhadjumane á Azia, Bha yudha ka bha Giliki bhu oka livfia la Bhwáná. ¹¹ Ka Mbali ubhikia bhikako bhi isangala na mabho ma Paulo, ¹² Na dyaa utilia ngambi ya ngombe na musuala á ikulu la bhushe bha ndutu bha bhubhia bha bukule mobhi wese; ka ndutu dja ésa, ka bhagu bha esa. ¹³ Bhaamo Bhayuda bhaa bhubhi igbegba gbegba bha tshutshu ienga anga bhaa bhubhia na bhagu na linya la Bhwáná Yesu, na bha vfie: ya nesaga nue na linya la Yesu undjo undjo Paulo ugulusie! ¹⁴ Bhaa bhubhikia eyo, bhubhia bhana sabha bha Sikewa, muyuda, omoi wabha dumanga bha bhakoli. ¹⁵ Mpumatima wa bhagu abha kpetania: endjibhie Yesu, ka edjibhie Paulo uneni; nge nuwe, nubha neni? ¹⁶ Ka mushe undjo bhagu bhubhia angese na mobhi anekulia iikulu labho, abhatoka, bhatopa tabhavfili, ka abhabhitila ebhibhi na ibho itikila yavfulu ka na ikena mavfi bholumbo ka bha otakale. ¹⁷ Iyo ya djibhi kiana na bha Yudha bhatopa ka na bha Giliki bhatopa bhaa bhubhia bha gwale á Efeso, ka bhuwa bhabhagboka bhatopa, ka linya la Bhwáná Yesu libhia libibane. ¹⁸ A'bhugi bha bhaa bhudjelia bhudja ikotubua ka na ivfia eyo bhukia. ¹⁹ Ka esabho ya bhaamo bhaa bhukia mekambo mabhukanga, na ibho idisia malhubha mabho, bha vfamba apele na bhushe bhatopa: bha vfilanisia na likoli la bhilinge makomo ta éfu. ²⁰ Na dyito vfele livfia la Bhwáná la vfandjala na lokulu ka na bhu gbingbi. ²¹ Ambusa na bhima bhio ieta, Paulo atukulia lokendo lilkena á Yelusalema, na ikalua á Makedonia ka na Akaya. Dyaa ikiani iyo, uvfia, Eekpie dyokuto ta ieni Loma. ²² Utuma á Makedonia Timoteo na Elasito ta bhavfili bhaa bhubhi ivfulia mokambo, ka idje atikala ku kalesi evfumbu ta djaa kaamo á Azia. ²³ I'kiana á evfumbu iyo, ibhia na mogbegbilo ta dhene á iyo éébhoné paki ya Bhwáná. ²⁴ M'bisiane tomoi Demetilio, atukulia, ubhitukulia na Falanga bhi avfulu bha Mbali bha Diana, ka ubhi vfindaka bha kambia bhese ta ekima. ²⁵ A'bha kumanisia na bhaa bhubhi kamba mokambo toku uo, ka avfia: oh bhalume, nudjibhi taa ibhika lasu la likima i á mokambo áóónó; ²⁶ Ka nuwe na ena ka noóka taa, indjese ku á Efeso, nge á semele na Azia n'topa, i Paulo undjo atoka ka á basia dyombo la bhushe, na ivfia taa ta Mbali tasu tu kiana na mabho ma bhushe tundjabho tu Mbali. ²⁷ Bhwa bhuwo tu pasi iena, undjese ku taa mokambo wasu ubhitakalie; ikaamo yavfulu ya Mbali wasu wa mwali Diana indji itemi ta ese, ka imbi bhu dhene bha aao bhuo bhu bhudjibhikiane á Azia ntopa ka kisi ntopa ikandi enu. ²⁸ Mavfia maa mabhidjalisia na bhúsúngu, bha andja i dyoma: úndjo ú dhene i Diana wa bha Efeso. ²⁹ Ka ndei ya dhene kwetubhú ya dyoma. Bhakéna bhatopa mangbalangbá á yavfulu ya mabhina, na múlúngo ku omoi nabho Gayo ka Alisitaliko, bhushe bha Makedonia, bhange na mulungo na Paulo. ³⁰ Paulo ubhaónda aenikiana ápele na bhushe, nge bhatende bhunsikisia; ³¹ Bhámó bha Azia, bhaa bhubhia bha mbeni bèsè, bhan'tumila bhushe, na ine sikisia sakeni á yavfulu ya mabhina. ³² Bhaamo bhú dyoma namuna yanga bhó bhaamo namuna iyomó, ngo moyeye ubhia á étulumilo, ka bhaamo bha djibhe abho mungusa wendje bhuku manila. ³³ Ngo bham'bhia Alekizandele á etulumilo, undju Bhayuda bha mavfisia á pele; ka Alekizandele á ubhi vfanisakia óbhó, toku mushe undjo úóndu ivfia á pele na bhushe. ³⁴ Nge dyaa bhugi bha taa úbhia muyuda, bhatopa idyoma na dyoi ta limoi saa ta épili: úndjo ú dhene i Diana wa bha! ³⁵ Na dyito, angbela malubha, á dhúlúsia étulumilo mitema, avfia: bhalume bha Efeso, néni undjo úsinue taa ndei ya dhene ya Efeso i móngbeli wa yavfulu ya úndjo ú dhene Diana ka na mosilo wèse ú kúwá ikulu la nguvfa? ³⁶ Na éyo igwala mbèse nganyi, nupasi ikatana, ka mbèse nuwe ikia mangbalangba. ³⁷ Ngo nu desia bhushe, bhaa bhandjabhi na munguso aó bha sèkè abho, aó sesakiabho Mbali wasu wa mwali. ³⁸ Ani kotio Demetilio ka na bhushe bhèse bha mokambo bha na ya iné sitaka mushe, ina masi ma isamba ka na bhatumba, bhákó sitakiana bhaa na bhámó. ³⁹ Ka ani nú óndúe ivfia mingusa na bhadumanga bha bhatumba. ⁴⁰ Tuná bhúwa bha igwala bha sitaké na éyo ya étà bhusibhúno, mungusa indjese na kókó ta emoi iyo itu lúúsie ta élunda éno ikiana. ⁴¹ Ambusa na mavfia maa, á vfandja étulumilo.