¹ Akena pikiye a Delebha ka a Lysitela. Ka enayi, ebhiya dya n'tende tomoi na linya la Timoteo, mona na mwali wa bha Yuda umonduwa Mbali ka idjidje mu giliki. ² Bhana bhema bha bha Lysitela ka na bha Ikona bha muwa bhusumba bhusamboli bwa bhukima. ³ Paulo onda ikena nana; ka, angeya, antina dhudha, dyulu la bha Yuda bha bhubhiya egula eyo, ngo bhatopa bhudjibha nata idjidje obhiya Mugiliki. ⁴ Niyeta a ndei djadhene, bha vfema anga bha wa nyinya bhabhoni tekima munguso ma bhatende ka na bha gagulu bha Yelusalema. ⁵ Bhiavfulu bha Mbali bhinekamisia ni idjelia labho, ka ya gbukumiana bhusi na bhusi ibhanda. ⁶ Nisikisi yana labho na upumatima kengo ta bha koliabho livfia a Asia, bha kalia a Pilijia kana etuko ya Galatia. ⁷ Bha kiana a chekedhe na Mysia, bha netukulia ilumila a Bitima; ngee upumatima wa Yesu wa bha sikisia. ⁸ Bha chanisia a Mysia, ka bha duluwa a Toloasa. ⁹ Wakati wa bhotio, Paulo ena bhiloti: Masedonia tomoi avfundila akilia lio: eta a Masedonia, otuvfulia! ¹⁰ Abhiloti bha Paulo bhio, ta vfungala dyito tokeni a Masedonia, ikomala taa Bwáná atubhisia ikolondula livfia la likima. ¹¹ Nikena a Toloasa, bhamala teena dyoka a samatolasia, ka kapumau taa sika a Neapolisia. ¹² Dyakaa takena a Filipi, iyo endei ya dhene ya pele ya disitiliki ya Masedonia, a ndei ya bha Loma. Tetisia a masita bhuwa a ndei ya dhene eyo. ¹³ Bhusi bha Sabhata, ta kene, abhovfo neekuse, eyekaka silanga, dyia ta pkaliya ta ina egula temoi yi vfema. Dyuwe ta dyumana, ka ta vfia na bhale bha bhubhiya bhakumanile dyia. ¹⁴ Tomoi wa bhali bhao, abhisiana na lenya la Lydia, obhiya akulusia ngula, a ndei ya dhene ya Tiatela, obhia mwali undjo obhomondua Mbali, ka obhiya mokee. Bwana omogula upumatima, na iguala iyoka mitopa miyo Paulo obhivfia. ¹⁵ Dya odjina, na bwandja bhese bhutopa, atuvfema: animwindene ta yekima anga bwana, tanganai asemele na yavfulu yami, ka tikalai ka atudjibhisia minguso miya bhukota bhese. ¹⁶ Tokota tubhi kena egula yivfema, mushe wa mokambo wa mwali ubhiya na upumatima wa nyili, ka undjo, nikiya, obhudhusia bhakota bhese bhamokambo faidha. ¹⁷ Ka atika mutweke, Paulo tee egi, idjee apele nasu, ka agwala mituwee Paulo ka na dyuwe, avfama likuwa: bhuse bhano abhakambiya wikuli bha Mbali, ka bhanelondula nuwe paki yidjelia. ¹⁸ Okiya eto masi taa magi Paulo nidoga igamaka, ka avfia na upumatima uwo: ya nesusuliya na linya la Yesu Kilisito, vfinduwa angese ka avfinduaevfumbu iyokuyo. ¹⁹ Bha kota bha mwali undjo, bhena ilimwa la faidabho, bha bhadunga Paulo ka na Sila,ka bhabhasigila egula yee djibhikiane na bha tumba. ²⁰ Bha bhavfanisia anga vfanisia anga bhakota, nivfia: bhushe bhano bhatuka ndei Yasu ya dhene. ²¹ Bha bha Yuda, bha bhalondoluwe minguso maasili nio nundje towese ni djelia na iyeka, angasu dyuwe bha tu bha Loma. ²² Etulumilo ya suma kotio na bha, ka bha kota, bha bhabhiya ngombe djabho, bha bhasusulia ibhabhitila na mambhaka. ²³ Ambhusa ni bhabhitila teegi, bha bhakulia a mudyalolo bha giegia mongbeli abha ngbeli angili. ²⁴ Mongbeli wa mudyalolo, oka adyedyo luwe, abhakuliya amudyalolo wa semele, ka abha sangaka mikulu a makulu. ²⁵ Wakati wa bholigogo bha bhotio, Paulo idje na sila bha bhisia Mbali ka nibhela djumbo djine bhibha Mbali, ka bhushe bha mudyalolo bhubhibhoka. ²⁶ Sikokenese dhomu, ya kiana bhoni ngina bha misia, nata epkesia la djogu bho dja mudyalolo bhivfandjala, na dyoka, bhe kuse bhitopa bhiogulana, ka mikulu ma bhuse bhatopa bha midyalolo bhasanguana. ²⁷ Mongbeli mudyalolo asusumwa, ka, dya ena bhekuse bhitopa bhiya mudyalolo bhiogulane, ageya Pkuma ka akena ta adjolu, ipkalia nata bha bha semele na mudyalolo bhakena mavfi. ²⁸ Ngee Paulo avfama likuwa ta likali: mbese inekiliya bhubhi, djiwe tu bhatopa kuwe. ²⁹ Ngo mongbeli mudyalolo, avfema lobela, alumila mavfi, ka akonetikila ni pkopkoma a makulu ma Paulo ka na sila, ³⁰ Abhabhiya, ka avfiya: bha bwáná ekititani ta ebhilu? ³¹ Paulo ka sila bha pketanya: n'djeliya bwáná Yesu, ka obhikiye, owe kana bwndja bhaye. ³² Ka bha kokoliya livfia la bwáná, na bhatopa bhubhiya asemele na yavfulu yese. ³³ Ageya na idje, awakati uwoko wa bhotio, okuya mikuko mabho, ka dyoka bhadjina, idjekana bhese bhatopa. ³⁴ Abhabhisiya angese na bwandja, ni bhowa bhima bhidhia, ka aseya na bwandja bhese bhutopa bhuo bhudjeliya anga Mbali. ³⁵ Dya ya kiana pindi, undumanga wa mudyalolo atuma bha bha bhiaki bhuse bha suwa mongbeli mudyalolo: itikila bhuse bha. ³⁶ ka mongbeli mudyalolo akokoliya Paulo emeeyo: bhadumanga bhavfia nata bha netikila nuwe; ketetino vfunduai, ka kenai ta guwe. ³⁷ Ngee Paulo avfia anga bhakota: ambusa itubhitila na mambaka apele na bhuse ka mbese itusambisia, djuwe bha tubha Loma, bhutukulia a mudyalolo, ka keketino dyito. kiya bhidji kotubhi ibho bhakulu bhao. ³⁸ bhushe bha mokambo bhakobhasua bhakota bhabho mavfia maa, bha bhilima, ni iyoka nata bhubhiya bha loma. ³⁹ Ka bheka ibhasuwa, ka bhabhowa paki, ni bha komula nata bhesi a ndei ya dhene. ⁴⁰ Dya bhuvfunduwa a mudyalolo, bha lumila anga Lydia, ka, ambusa nibhena ka ni bha kamisia, bhakena.