¹ Á Ikonio, Paulo ka Bhalanaba bhulumila mulungo á Sinagogi ya bha Yuda, ka bhuvfia na namúna iyo abhúgi wa bha Yuda ka na bha Giliki bhú djeliyá. ² Ngé bha Yuda bhàa bhá djelie abhó bhusúsúlia ka ikiya taa mipumatima má bhapagáno miówù mikali á mavfiya mábhawanya bhabhó. ³ Bhútikala évfúmbu ta éta á Ikonio, na ivfiya na inédulusiya, bhasukiané á Bhwáná, undjo ú sambola á livfiya lá lokowa lésé ká i luúsiya tàa ikiyáná na mábhó mábhó maadjábho ká na bhikáko. ⁴ Bhushe bhá ndeyi ya dhene iyo bhú vfakana: bhámó bhúóká bha Yuda, ká bhamó bhá óká bhatende. ⁵ Ká toku bha pagano na bha Yuda, á ikumbé lábhó na bhakóta bhabhó, bhú andja ibhá sekisiya ká na ibhá kúliya mambúwo, ⁶ Paulo ka na Bhalanábha, na ipáta abháli úndjo, bhúkéna iko kóbhana á ndéyi dja dhéne dja Lisitala, ká Dhelebhe á ndéyi ya Likaonia, ká á ndéyi dja mibhóngó. ⁷ Ká bhú andja ikokolia livfia lá likima lá Mbali. ⁸ Á Likitala, ibhiya n'dumáné mushé tómoyi mu úgwé makúlú, na nubhúngé makúlú tangia ibhútala, ká undjo sá luvfé mwese tàa bhúwà. ⁹ Ú móka Paulo súnevfiya. Ká paulo, ubhiya munébhoné ká ú éna tàa ubhiya na idjeliya tàa úbhikiye, ¹⁰ Avfámá na dyoi ta likáli: téma ta tshúú na makúlú máyi. Ká atémá dyókáa ká na idjé iluvfa. ¹¹ Na iyéna iyo Paulo úkiya, dyombo lá bhushe bhútúbhulá dyoi, ká bha vfia na lúga lá Likoania: mbáli na háli ya bhushe bhú dulúwá angású. ¹² Bhú bhá bhisiya Bhalanabha tàa Zeuzi, ká Paulo tàa Melekulio, múngusá ibhá idjé úndjo ubhiya na livfiya. ¹³ Nkangá wa Zeuzi, undjo kanisa yésé ibhiya á itángana lá ndeyi ya dhéné, udisiya túmbú dja ngombé bha sale bha avfuvfu bhá maúwa á milango, ká ubhi ónda, namúna témóyi tàa dyómbó, tàa idje dyókuto abhu sadháka. ¹⁴ Bhatende Bhalanabha ká Paulo, dyàa bhú óka dyito, bhúvfundaka ngombé djabhó, ká bhú kena mángbálángbá ilúmila á dyombo, ¹⁵ Na ivfáma: óhóo bhalúme, múngusa wa éndje nákiyá tanó? djúwe dyókúto tu bhushe bhàa bhá tóku núwe; ká, tané disiya núwe livfiya lá likima, tanékomúla núwe tàa nútikila bhima bhá tititi bhiyo nutoti ikiya ká tàa nudji basiya angá Mbali wa mubhiké, úndjo úkiya ikúlu la nguvfa, kisi, obhingi lá dhéné, ká na bhitopa bhiyo bhú bhigbokané á kisi. ¹⁶ Mbali úndjo, á masi màa mu étá, utika bhikita bhitopa iyéká paki djabhó ku bhanéné; ¹⁷ Imbi tóku sá dogéèsé na isambóla tóku uu. na ikiya bhúkima, na inéowá núwe mbúla iésa á ikulu lá nguvfá ká na bhivfumbú bhá itukuliya misiyá ma mikima, na inéowá nuwé bhima bha idhiya na bhodyèe ká na iidjalisiya mipumatima nànú na iséea. ¹⁸ Na iyóka mavfiya màa, tubhá na bhuwá bhá isikisiya dyombo bhá owá sadháka yabhó. ¹⁹ Dyo káa idjanila iésá á Atokiya ká á Ikonio bha Yuda bhàa bhubhiya bhagi á dyombo, ká bhàa ambúsa na inémóvfula Paulo mabhoyi, bhú lutá á bhovfó na ndeyi, na ikpalia tàa óúgwa. ²⁰ Ngé, bhatende, dyàa bhú n'kúngilá, utéma, ká átángáná á ndéyi ya dhéné. Kapúmá óaó, ukéna á Dhelebhe ibhó na Bhalabha. ²¹ Dyàa bhúmalá ikókoliya á ndeyi iyó ká na ipáta núsu ya bhatende ta bhagi, bhú iganaka á Lisitala, ká á Ikonio ká á Atiokiyo, ²² Na ikámisiya mipumátima ma bhatende, na ibhá komula tàa bhá bhá bhéliyá á idjéliya, ká na ivfia tàa i á mipúli ta migi miyo mikiiye tàa tu lúmilá á bhukota bhá Mbali. ²³ Bhú témiya bhagagúlú á kila kanisa, ká, ambúsa na ivféma Mbali ká na itikila idhiya, bhu bhá ká bhisiyá á mábhó má Mbali, úndjo bhú ndjeliyá. ²⁴ Na ikaliya Pisidiya, bhá tangana á Pamufilia, ²⁵ Bhú kókoliya livfia á Pelega, ká bhú duluwá á Atalia. ²⁶ A dyàa, bhudjamila kúkú mpákà á Atiokia, dyàa bhu lúúsiana bhá gwali na lokówa la Mbali iyékana na mokambó úwo bhú akisiya. ²⁷ Ambúsa na ikiana lábhó, bhá kulú manisiyá kanisa, ká bhú elezá étopá iyo Mbali úkiyá nabhó, ká namúna iyo ú égula mulangó wá udjeliya á bhikita. ²⁸ Ká bhúgwala dyàa évfumbú ta éta na bhatende.