¹ Teofilo, yivfia, a bhukú bhwakwanza, na etopa iyo Yesu utatika ikiya ka nigulushia ku a itatiko, ² Ku a bhusi bhuwo ugeyana ikulu la nguvfa, ambhusa na ibhakamisia, na umpumatima wa kengo, na bhatende bha ubhaminula. ³ Ambusa na idje iyena m'puli, a bhavfundila m'bhike, ka a bhowa bha evfaniko alama taa bhagi, adjivfanishia anga bho masi makomi tamanai, ka nivfia bhima bhiyo bhibhoniye bhukota bwa Mbali. ⁴ Tukú ubhiya na bho, abhasikishia taa mbese ibho ikena dhomu na Yeluzalema, nge ni isibhaka iyo tita ulaka, iyo ene kokolia mono nuwe, abhasuwa; ⁵ Ngo Yohani udjinishia na malivfa, nge nuwe a masi ta bhuwa, nu djishaniye na m'pumatima wa kengo. ⁶ Ka bhatende bhakulumanila ni ne miya: Bwáná, evfumbhu ya yo kuino otemiye bhukota bha Isalaeli? ⁷ Abha kpetanyia: Idhese anga nu taa nudjibhi evfumbu ao saa djiyo tita wengeka na bhuko bwese kubhanene. ⁸ Nge n'udhuwe loku kula talumoi, m'pumatima wa kengo widjie ikulu lanu, ka nugwalie bhasamboli bhami a Yeluzalema, Yudea kuetubhu, a Samalia, ka na atútú wa kisi. ⁹ Ambusa nivfia eto, atubhulama ibho bhalengishie, ka m'pena wavfevfa a madjo mabho. ¹⁰ Ka toku bhubhiya madjo mabhone ikulula nguvfa dya ibhikena, enai, bhuse ta bhavfili bhasale ngombe dja m'pembé bhabha djanila. ¹¹ Ka bhavfia: bhushe bha Galilaya, idje nutemiye na ibhona ikulu la nguvfa? Yesu, udjo abha utubhulane ikulu la nguvfa a bholi gogo bwanu, widjiye na tumba kuta emoi toku numena mono a ikpata la nguvfa. ¹² Ngo bha kpudya a Yelusalema, a n'tala uwo abhishia na wa bha Oliviera, uwo uchekedhe na Yelusalema, iyekanaka na paki ya sabato. ¹³ Dya bhukiana, bha kpata a sugweye ya ikulu ka bhadyumana, bhubhia Petelo, Yohani, Yokobho, Andelea, Philipo, Tomasi, Bhatelemi, Matayo, Yakobho mona wa Alpheyo, Simoni wa Zelote,ka Yuda na wa Yakobho. ¹⁴ Bhatopa niyokana talimoi bhalivfia, kuna bhali, ka na Malia, inya Yesu, ka na bhawanyinya bha Yesu. ¹⁵ A masi-maa, Petelo atema a bholigogo la bhawanyinya, bhusi bhotopa bha bhukulumanila bhubhia iyeekana na bhushe miya na mokomo tamavfili ka avfia: ¹⁶ Bhamonima bha bhalume, ikpiya taa yakishiana iyo m'pumatima wa kengo, asemele na ikpaluana, ukókólia apele, na a Yuwa wa Dawidi, udjo uvfanishia idungana la Yesu. ¹⁷ Ubhiya ubhandane na súú, ka audha kebhu a mokambo namona kwemoi a bhukoli. ¹⁸ Mushe udjo, ukula bhole na evfindo ya ligwa, akuwa, abhunyiya abholigogo bwa mobhi wese, ka bhima bhise bhiatima bhivfadjala. ¹⁹ Ima iyo ibhiya edjibhikane na bhushe bhatopa bha Yelusalema taa bhole bwa manyika. ²⁰ Nge, ya kpaluluwana asemele na bhuku bwa Pusome: Ka bhungwalia bwese bhou m'pena w'iiseke, ka mushe too omoi! Ka: woomo adungu egula yese! ²¹ Ye ekpiyane taa, akati ya bhaa bhabha nasu mulu ngo evfumbu etopa iyo bwáná Yesu abha na sumugwale, ²² Ku ibhanda la idjina la Yohani kwa abhusi bhuo ubhiya n'geyane a bholigogo bwasu, ibhiya na tomoi udjo n'gamane nasu toku n'samboli a iyomuwa lese. ²³ Bhadjivfanishia ta bhavfili:yesefu n'bhishane taa Balasaba, linya lese la mavfili taa Yusuto, ka na Matiasi. ²⁴ Ambusa bhavfema: Bwáná, owe udjo odjibhiye mipumatima mia bhushe bhatopa, vfanishia udjo waninula a bhano taa bhavfili, ²⁵ Ambhusa na iudha mokambo wese ka na a bhutende, bhúúwo Yuda ukanda na idje ikena a egulese ku bhanene. ²⁶ Bhe enga bhukanga a misiya, bhukanga bwa djelia Matiasi, udjo ugamana na bhatende tabhu na woomo tomoi.