¹ Nkakucho komwabaga mwafirire munsobe n'ebibi byenyu. ² Ebi mwabaga mulikugendera mu kukurata emitwalize y'eensi kandi n'okukuratira omukama w'obusoborozi bwa mu mwanya gwa h'igulu, nigwe mutima gulikukolera butiya mubatali kuhulira. ³ Itwe twena, muntandikiro twabaga tuli mul'ibo abatahikiriire. Twakoraga mu buligira bubi bw'emibiri yetu. Twakoraga mu bwiira bw'emibiri n'obumenyi bwetu. Twabaga mu kya kale, abana b'okubonabona nk'abaandi. ⁴ Alikwe Ruhanga n'owembabazi habwokuba iitwe yatukundire mu mukwano-gwe muhango. ⁵ Obwo twabaga tufiire mubibi byetu,yatulheta hamwe, mumbera nshasha muli Kristu. Mwarokwerwe ni habw'embabazi nyingi. ⁶ Ruhanga yatu zookwere n'okutuha okwikara hamwe mu mwanya gw'igulu muli Kristu. ⁷ Yakolire kucha, habw'obiire bulyayiza abase kutwereka obugega bw'embabazi-ze. yatwereka iitwe kugira ngo mu mihanda y'oburungi-bwe muli Kristu Yesu. ⁸ Habwembabazi mwarokweerwe gw'okwikiriza kandi eki takyarugire owetu. N'ekichoncho kya Ruhanga. ⁹ Takirikurugaana n'ebikorwa. Hatagira omuntu n'omwe w'okwipipiisa. ¹⁰ Habwokuba twebwe, tuli omulimo gwa Ruhanga, twahangirwe muli Kristu Yesu kukora ebirungi. nibyo bikorwa byo Ruhanga yatekatekire kwiha kale na kale habwetu, kugira ngo tugendere mulibyo. ¹¹ Habwekyo, mwibuke nk'okwiha kale mwabaga abanyamahanga habw'omubiri, mulikweetwa: ''abatasalirwe'' mu kiretwa okusarwa kw'omubiri echirakorwa n'engaro z'omuntu. ¹² Murobwe bwiire mwabag'abachiibwa muli Kristu. Mwabag'abagenyi mu meeso g'abantu ba Israeli. Mwabag'abagenyi ha ndagaano y'omurage. Tamwabaga muramenya amazima g'obwiire bulyayiza.Mwabaga mutiine Ruhanga muunsi. ¹³ Alikwe muli Kristu Yesu mwebwe mwabagaho kuruga muntandiko, mwabaga hale na Ruhanga, mwalhetwa hagufi na Ruhanga habw'esagama ya Yesu Kristu. ¹⁴ Habwokuba, iiwe niw'obusiinge bwetu. Yahanisize babiri baba omuntu omwe. Habw'omubiri-gwe yasenyire orusiika rw'obwanyani, obwe n'obuzigu. ¹⁵ Habwokuba yayimereeze ebiragiiro by'amategeko kugira ngw'ahange omuntu mushasha muli-we. Yalheta obusinge. ¹⁶ Yakolire kuti kugira ngw'ahulikanise ebikwiiri bibiri by'abantu kuba omubiri gumwe muli Ruhanga mukurabira mumusalaba. Mumuhanda gw'omusalaba yabisiz'obubi. ¹⁷ Yesu yayizire kuranga obusinge owenyu imwe ababag hale n'obusinge ow'ababaga hagufi. ¹⁸ Habwokuba mumuhanda gwa Yesu iitwe twena babiri twiine omwanya murogwe mutima gumwe mukuza owa thaata. ¹⁹ Habwekyo, iimw'abantu bamumahanga tamuchari abahingizi n'abagenyi. Huubwe muli banyin'amaka hamwe n'abachiirwe habwa Ruhanga n'abahanuuzi munzu ya Ruhanga. ²⁰ Mwahimbirwe ha musingi gw'abakwenda n'abaraguzi. Kristu iwe wenka yabaga alibaale lihango ly'esoonda. ²¹ Muli-we, ekyombeko kyoona kyabuganisizwe hamwe n'okwimerera nk'isabiro muli thaata. ²² Nimuli-we mu namwe muhimbirwe hamweza nk'ahantu h'okutuura ha Ruhanga mu Mutima.