Mbwenu, hakuba Kristu yabonabonesizwe mu mubiri gwe, mwebwe namwe muzwale ebirwaniso muli entego hakuba iwe yabonabwene mu mubiri yalekene n'ebibi. ² Kutangira buti mutagumizamu kubaho mu marali g'abantu, alikwe mu kwenda kwa Ruhanga, obwire bwenyu busigere mu kwikara hano munsi. ³ Hakuba obwire bw'obughingo bwetu bwahingwire buhikire mu kukora okwenda kw'abarondo, kwitwaza mu nsobe, amarali, hamu n'obusinzi, amagenyi g'oburubizi, hamu n'esindo, kwikiriza ebisusanyo bitahikirire, ⁴ amagambo go ibo balebaga kuba agatangeze mwebwe kutagenda zuba hamwe nabo mulezo nsobe zitine omubale, balikubatuma. ⁵ Nabo balyatanga omubale ewe iwe ayitebekanisize kucira orubanza abaliho kandi n'abafire. ⁶ Habwokuba habweco, nabo bafire babulirwe Injili, kugira ko bacirwaga orubanza abantu; alikwe babeho koko Ruhanga aliho. ⁷ Alikwe omuhero gw'amagambo gona gulikuhika; mbwenu, mugire n'obwenge, mugazure mu misabe. ⁸ Ecikuru ca byona mugire obwira bwingi mu kukundana, hakuba orukundo ruswekaga obwingi bw'ebibi. ⁹ Mwakirane mwebwe halimwe hataliho kwigunga. ¹⁰ Buli omwe koko yayikirire empano (eciconcho) aikulese mukuyambana, nkabamagezi barungi b'obulihw'engeru emilingolingo ya Ruhanga. ¹¹ Omuntu yagamba, agambe nk'omukozi wa Ruhanga, omuntu yayamba, ayambe mu mani gaherwe na Ruhanga kugira ko Ruhanga ahimbiswe mu magambo gona muli Yesu Kristo. Ihimbiso hamu n'obubasa haliwe mubutalihwa. Amina. ¹² abamagara, mutaleba bitangeze, ezo naku ziri hagati yetu, zirikubahikira nk'omuliro mu kubageza, nk'ecintu cecigenyi cirikubahikira. ¹³ likwe koko mulikukwatanisa mumibonabono ya Kristo, mwisime, kugira ko mu kuhisurwa kw'ihimbiso lye mwisime mubuhimbiso. ¹⁴ Mwakenererwa mw'izina lya Kristo, omugisa gwenyu habwokuba omutima gw'ihimbiso kandi ogwa Ruhanga gulimulimwe. ¹⁵ Habwokuba omuntu wowenyu atabonabona nk'omwisi, nangwa omwibi, nangwa enkozi y'ebibi, nangwa nk'omuntu alikwita mu byabandi. ¹⁶ Alikwe haba hali habwokuba n'omukristo, atagira esoni, alikwe ahimbise Ruhanga mwelyo zina. ¹⁷ Hakuba obwire bwahika obwokucira orubanza kutangira munzu ya Ruhanga, kandi rulikutandikira halitwe, hanyuma yaho abatikirize e Injili ya Ruhanga kulyaba kute? ¹⁸ Kandi owamazima yarokoka hamugisa, owe atar amya Ruhanga kandi ayine ebibi alyalebeka kute? ¹⁹ Mbwenu ababoneswaga n'okwenda kwa Ruhanga, bamuhe emitima yabo, mu kukora ebirungi nka ha Muhanzi ayahikirizwe.