1
Bikigha mwa ungo muse wa kitatenge,mu kisi cha Bagadaleni.
2
Agho , Yesu mu kutuka mu bwato,muntu umoi wit' isumbu kutuka ku kisi kinene imalagha bwighi nawe.
3
Uso muntu ikalagha ku kisi kinene,nu taku muntu unakoshishe ku mukanda,na muyololo.
4
Kubuno,abagha na byuma ku mashinshi,nu kukandwa na miyololo,tondo endagha asiketula ,nu taku muntu wabagha na maghala ma kumukosha.
5
Ikalagha,musi nu kindi ku bisi binene nu mu minduko ,kutanda mulenge ,nu kwimbabasha na makoi.
6
Mwa mukulola ku Yesu, endagha lubilo, nu kumukomela mashwe,
7
Nu atendagha bubibu : Ki cheli gha tusambana uwe nw'ine ,Yesu, Mwana wa Ghongo wa m'w'ighulu ? Nakusegha kw'ishina lya Ghongo undungutanye .
8
Kubuno Yesu amubulagha : Musumbu,tuka mu ghoso muntu.
9
Nu ,amubushagha: ishina lyobe u nai?Nu amwakulagha :Nkumanwa Leshioni,kubuno tuli bengi.
10
Nu amuseghagha amutibitaghe mu kisi .
11
Mwa mu mwinduko ,mwabagha ighimba lya mpunu likulya.
12
Nu basumbu bamulililagha mu kutenda: Tusinge mu lily'ighimba lya mpunu, kubuno twingile mulyo.
13
Imilagha.Nu basumbu batukagha,bingilagha mw'ighimba ,nu ighimba lyakumbagha lubilo mishughulo mu kitatenge :Sabagha anga elefu imbili,sashikilagha mu kitatenge.
14
Balangi ba mpunu batinagha,nu basansagha musaghu mu misumba nu mangele.
15
Bantu bendagha kulola byatingile.Bikagha bwighi na Yesu, nu kulola ghoso wabagha n'isumbu, ikalile ghansi, ashwalile ,nu akulenganya busogha ;bakatwagha na byamba.
16
Ba balolagha ku byabinde baghanikishagha ku byatingile ku ghoso wabagha n'isumbu nu kw'ighimba lya mpunu.
17
Agho babulagha Yesu atuke mu kisi chabo.
18
Mu kwingila mu bwato, ghoso wabagha n'isumbu amwemagha ikale nawe.
19
Yesu ntamwiminde tondo amubulagha :Nda kobe kweli bisakwinu,nu baghanikishishe binsai byakukitila Mukota,nu buni bwakukwilagha lukogho.
20
Endagha, nu kusansa mu Dekapoli binsai byamukitilagha Yesu.Nu bansai babagha mu nganingani.
21
Yesu mu bwato asokagha ku leshilya ,kikembe kinene cha bantu cha kulumanagha gheli.Abagha mu mutili wa kitatenge.
22
Agho ashwagha mukulu umoi wa Sinakoki,ukumanwa Yailo,ghoso , mu kumulola ko, indekelagha ku mashinshi maghe,
23
Nu kumwema na lukakisho :Mukinga wani emwa bubibu; shwa ,umubikile maboko,kubuno alame nu abe gho.
24
Yesu endagha nawe.Nu kikembe kinene chamuyangagha nu kumukundeghelesha.
25
Agho, ghabagha mukashi'umoi ukusulula mikilha mu myaka ikumi n'imbili .
26
Ababalwagha bubibu mu maboko ma basakishi bengi ,ashililishagha binsai byabagha nabyo ,nu ntalamile ,nu lusambo lwakokomelagha.
27
Mu kwongwa ku musaghu wa Yesu,ashwagha kumbusa mu kikembe,nu kutubya ku nshulu saghe.
28
Kubuno atendagha:Ndi natubya tughu ku nshulu saghe,nti nalama.
29
Mwako kaluma mikilha sa kamagha,nu ongwagha mu mubili buno alama munubo waghe.
30
Agho , Yesu iyongwagha buno maghala mamutuka mo; aghalukagha mukantighi na kikembe ,ik'abusha:Nayi witubya ku nshulu sani?
31
Begheshibwa baghe bamubulagha : Lola kikembe kinene cha kukundeghelesha nu ukubusha: Nayi wakutubya ?
32
Aghenshagha bwighi nawe, buno alole nayi wakitile ubo.
33
Mukashi ,mu byamba nu kughilimila,mukumana byatinga muwe,ashwagha kwindekela ku mashinshi ma Yesu ,nu kumubula bulili bunsai.
34
Tondo Yesu amubulagha :Mukinga wani,lukatisho lobe lwakulamya;nda na boolo ,nu lama lusambo lobe.
35
Mukutenda ubo ,bantu ba mukulu wa sinakoki bikagha kumubula :Mukinga wobe akwa ;ntu nubye lingo Mweghisha?
36
Tondo Yesu mu kutongwililwa bitondo byabo,abulagha mukulu wa sinakoki:Ntukwe boba,katisha umpanga.
37
Nu ntimilagha muntu kumwelekesha,ndi ta Petelo,Yakobo,nu Yoani, muto wa Yakobo.
38
Bikagha gha numba sa mukulu wa sinakoki,agho Yesu amonagha kikembe kinene nu bantu bakulila nu kutanda milenge .
39
Ingilagha,nu kubabula:Buni bumukukita lwayo,nu ki kimukulilila ?Mwana ntakwile,tondo ayamile.
40
Nu babagha bakumuseka .Agho,akukukulagha bantu bansai ,akatagha ghamoi nawe ise nu nina wa mwana,nu babo bamwelekeshagha,ingilagha gha bagha mwana.
41
Amukatagha mu kuboko, nu kumubula :Talita kumi,u kutenda :Mukinga,nakubula ,imaluka.
42
Agho mukinga imalukagha ,nu kutabanga; kubuno abagha na myaka ikumi n'imbili.Nu babagha mu nganingani nene.
43
Yesu abakakishagha bubibu, muntu ntamanaghe icho kitondo; Nu ababulagha bamweleshe indya.