¹ Ghashilagha Yesu kutend' ibyo bitondo ,atukagha Galilaya nu kwenda ku kisi cha Yudea kuleshilya kwa Yolodani. ² Kikembe kinene cha muyangagha, nuko alamyagha basambi . ³ Bafalisayo bamushighelelagha nu ku mubula ,buno bamugheleke:Ku kitondo ki kimilwa buno mulume atibite mughole waghe ? ⁴ Inga abakula : Tamwasomagha buno mwa kalai,Kalagha abumbagha mulume nu mukashi nu kutenda: ⁵ Mulume akashigha ise nu nina,nu ak'imbinga ku mughole waghe,nu bo babili bakaba mubili umoi? ⁶ Nu tabakaba lingo babili tondo bise muntu umoi.Kashi muntu ntalekanuche cha kulumanishe Ghongo. ⁷ Inga bamubusha:Ki chasulagha Musa alekula buno mukashi eleshwe maluba ma kulekanuka ? ⁸ Ing'abakula: Kubushi bwa bubibu bwa mutima winu u chasulagha Musa abimilagha kutibita baghole binu;tondo mu ndingililo;ta bwabagha ubo. ⁹ Tondo,nababula :Olya watibita mughole waghe ndi ta ku matensha,nu kusonga ungo, nti atensha. ¹⁰ Begheshibwa baghe bamubulagha : Ndi u buli kitondo cha mulume ku mughole waghe ,kashi tabwakoshibwa kusonga. ¹¹ Abakulagha : Bansai tabakongwa kino kitondo,tondo babo beleshibwe cho. ¹² Kubuno,kweli batukile mu munda sa ba nina nu batamba, bango bakitilwe ubo na bantu ,nu kuli babo bikitile ubo b'inene kubushi bwa bukota bw'ighulu. Olya unakosha kw'ongwa,ongwe. ¹³ Agho bamwekelagha bana bato buno abakate ko nu kubaseghela .Tondo begheshibwa babashigheleshagha. ¹⁴ Nu Yesu atendagha:Mushighe bana bashwe ku neli,mubananilaghe;Kubuno bwangato bwa mw'ighulu bweli ku basusana nabo. ¹⁵ Ababikilagha maboko ,nu atukagha agho. ¹⁶ Nu lola, mulume umoi ashighelagha nu kubula Yesu: Mweghesha ,nikite ki kisogha nibe na kalamo ka milyalya? ¹⁷ Yesu amwakulagha: Buni buukumbusha kubyeli bisogha? Umoi u musogha.Ndi washima kalamo, kita bwatenda nkakisho. Amubushagha nkakisho ki ? ¹⁸ Nu Yesu amwakulagha : Ntw'itaghe ;ntutenshaghe;ntwimbaghe.Ntweke bwisa , ongwa so nu noko ; ¹⁹ nu shima muninu anga uw'inene. ²⁰ Musikila amubulagha : Nakitile ibyo binsai;kiki kininda lingo? ²¹ Yesu amubulagha :ndi washima kushililila,nda, ghusha biwite, elesha byo bakene, nu wabe n'isengo mw'ighulu.Nu shwa,unjange. ²² Mu kongwa kw'ibyo bitondo, musikila iyendelagha na bongwa;kubuno abagha na bikulo bingi. ²³ Yesu abulagha begheshibwa baghe: Nkubabula bulili, buli bubibu kuli mutumba kwingila mu bukota bwa mw'ighulu. ²⁴ Nababula lingo, bweli busoshu kuli ngamia kubutukana mu liso lya nshinge, kutinga kweli mutumba kw'ingila mu bukota bwa Ghongo. ²⁵ Begheshibwa, mu kongwa kubo, baghanaghanagha bubibu, nu kutenda :Nu nai uk'ona ? ²⁶ Yesu abengeleshagha nu kubabula :Buli bubibu kuli bantu,tondo busoshu kweli Ghongo. ²⁷ Petelo atendagha nu kumubula : Lola twashighile binsai nu kukuyanga , buni bu tukaba? ²⁸ Yesu abakulagha : Nkubabula bulili,gha kaba bintu binsai bya kisikwa busogha,Mwana wa muntu gha kikala ku bwangato bwa lukumbu lwaghe,benywe mwanjangile,mukikala mu bishumbi bya bukota nu kughaya bilongo ikumi nu bibili bya Isilaele. ²⁹ Nu olya washighile mibuto saghe,babitu baghe,ise,nina,mughole waghe ali bana baghe, itete lyaghe,numba kubushi bw'ishina lyani, akeleshibwa ngendw'ighana, nu akaba na kalamo ka milyalya. ³⁰ Bengi ku batangi bakaba bashinda,nu bashinda bengi bakaba batangi.