¹ Yakobo, mukiti wa Ghongo nu wa Mukota Yesu Kilishitu, kwibyo bilongo ikumi nu bibili byasandabanile, samba! ² Bisakwitu,mulole buno sili nsila sa mboghimboghi malingiko ma munaba namo , ³ mumane buno kulingikwa kwa lukatisho lwinu kukubuta kulindila kwingi. ⁴ Tondo kulindila kwingi kwemana kukita busogha mulimo waghe, kubuno musanane nu bashililila,ta kwinda kena. ⁵ Ndi umoyi ku benywe inda mulenganya,aseghe gho kweli Ghongo,we u ukweleshagha bansayi ta mu lukakisho ali kusughila,nu akeleshibwa gho. ⁶ Tondo aghuseghe na lukatisho, nta mu kwisikima; kubuno olya wisikima asusana na malindi ma kitatenge, mekutenjwa na lumpumpu nu kulekelwa kuko nu kukuno. ⁷ Muntu ang'oso ntalelamile buno akeleshibwa kena na Mukota; ⁸ Eli muntu winda mulenganya,utimala busogha mu nsila saghe insayi. ⁹ Nu mwisakwitu wabota intate mu kwimikwa busogha . ¹⁰ Mu kingo kibe, mutumba itatile nsoni saghe; kubuno akomboka anga malubha ma kisughu. ¹¹ Musi wasana nu kusugha, wakamya kisughu, malubha maghe makoloka, nu busogha bwa shimila; u buk'omboka mutumba mu milimo saghe. ¹² Mboghimboghi ku olya walinda malingiko;buno mu kushila kulingikwa,akeleshibwa nkumbu sa kalamo, sa laghilwe na Mukota ku babo bamushima. ¹³ Kubaghe muntu walingikwa atende:Ghongo u wandingika.Kubuno Ghongo ntanalingikwa na bubi, nu w'inene ntakulingika muntu. ¹⁴ Tondo nawe nawe ukulingikwa gha kuba alhutwa na nkasa saghe w'inene. ¹⁵ Gha kuba nkasa saba ningi,nti sa lisha bwaghi;gha kuba bwaghi bwa kitwa,nti bwa buta lukwo. ¹⁶ Mwengelelwaghe bisakwitu ba twashima; ¹⁷ Mpanga insayi sogha nu lukaso lunsayi lusogha bikutuka kw'ighulu, kweli Tata wa byegeshi, kwaghe taku kughaluka ali kilimelime cha kughalukaghaluka. ¹⁸ Atubutagha kuyangana na bwashima kutingila kitondo cha bulili,kubuno tube anga nkulha sa bya bumbilwe. ¹⁹ Mumane ubo ,bisakwitu batwashima.Kubo muntu unsayi asashe kongwilila, musoshu mu kutenda, musoshu mu kushibuka; ²⁰ buno mushibu wa muntu taukukucha byashima Ghongo. ²¹ Uchasula mukuta bubi bunsayi nu bwengelele bubibu ,musekele na mutima wabota kitondo chabikilwe munda ninu nu kinalamya mitima sinu. ²² Mukite bwa bwatenda kitondo, nu mushindilaghe ku kwongwilila umpanga,nu mwa mu kwiyengelela benywe binene na mulenganya winu mbi. ²³ Tondo ndi muntu ongwilila kitondo nu ntakita bwa buchatenda,nti asusanya na muntu u kwindola mu kiyobo bwa bweli, ²⁴ Nu mukushila kw'indola, nti iyendela nu kwebelela lubilo bwa bagha. ²⁵ Tondo olya wengelesha busoghabusogha mu mulembe wa bulili,mulembe wa kushighililwa,nu olya wimala mugho,nu nteli wa kwongwa nu kwebelela,tondo akukita mulimo,ghoso akakasanilwa mu mulimo waghe. ²⁶ Ndi muntu inkata buno eli muntu w'indini nu mu kanywa kaghe mukutuka bitondo bya bola,tondo mu kwengelela mutima waghe,indini lyoso muntu talite kena. ²⁷ Indini lisogha nu lyenga mu miso ma Ghongo witu,nti kusona nkubi nu basumbakashi mu minubo sabo, nu kwindekanucha na mabi ma kino kisi.