¹ Bisakwitu, ndi muntu asangwa mu bubi bulebe, benywe beteli ba mubili, mumukuluche na mutima wa bubobelelo. Windange u w'inene, kubuno unashwa nuwe kulingikwa . ² Mukashane ku mishigho sinu ,nu mukakucha mulembe wa Kilishitu. ³ Ndi muntu indola buno we u kikino,nu nteli kikayi,iyengelela w'inene. ⁴ Nu na muntu alole mikolo saghe,nwagho akamana kw'itata w'inene ta kutingila bango; ⁵ Kubuno na muntu u'keka mushigho waghe w'inene. ⁶ Olya ukwegheshibwa kitondo,abeghanye bya bite n'olya ukumweghesha. ⁷ Mwengelelwaghe:tab'eneghe Ghongo.Bya byashikagha muntu u bya kakana. ⁸ Olya washika ku nkasa sa mubili waghe akakana lukwo mu mubili waghe; tondo olya ukushika mu nkasa sa Muusa, akakana ,kutingila Muusa,kalamo ka milyalya. ⁹ Tukutwaghe na kukita busogha;kubuno tukakana mu bindi byatunganana,ndi tatwashighilila. ¹⁰ Agho lino, gha kuba tukite nkungu tukitile bansayi busogha nu tanga bisakwitu mu lukatisho. ¹¹ Mulole maluba mengi manabatililagha na kuboko kwani . ¹² Babo bansayi bakushima babe basogha kuyangana na kubili,bakubakakisha mu monywe,buno munashwa kuyungibwa ku bya musalaba wa Kilishitu. ¹³ Kubuno bamonyile bob'inene tabekuyanga bya mulembe; tondo bakushima buno mumonywe,inga bitatila mubili winu. ¹⁴ Ku bya ndola ,nshite mulenganya wa kwitatila kingo kikayi ndi ta musalaba wa Mukota witu Yesu Kilishitu,kutingila we kisi chankwilinde nucho ku musalaba, anga bubo bunakwila kisi! ¹⁵ Kubuno, ta kitondo kumonywa ali kutamonywa; cheli kisogha, nti kubumbwa lingo mu Kilishitu. ¹⁶ Boolo nu lukogho ku bansayi bakalemba eso nsila, nu ku Isilaeli sa Ghongo! ¹⁷ Tukila lelo muntu ntanubyaghe, kubuno nite mu mubili wani tumanililo twa Yesu. ¹⁸ Bisakwitu, mpang'inene sa Mukota witu Yesu Kilishitu sikale ghamoyi na mutima winu!Amina!