¹ Ghabagha tw'indamya, twamanililagha buno ako kakishi kekumanwa Melita. ² Bantu ba miyabuyabu batusekelagha busogha kughimba bango; batushigheleshagha bwighi na kaya ,kabakonjagha kubuno mbula sabagha sikuloka nu mpegho sabagha ningi. ³ Polo mu kukunsa malele nu kumabika gh'ishiko,mwecho kilungu,bulighi bwatukagha mumo nu kw'imbinga mu kuboko kwaghe. ⁴ Bamiyabuyabu gha balolagha bulighi bw'imbinga mu kuboko kwaghe,batendagha gha basambana:Bulili ghono muntu eli mwiti,kubuno busanana bwa Ghongo tabwamushighilila alame mwa mu kutuka mu kitatenge. ⁵ Polo atenjatenjagha kuboko,bulighi bwa kolokelagha mu kaya,nuwe ntababalilwe. ⁶ Abo bantu balindilagha balole bwakuwha nu kukwa;tondo,mu kulindila mu nkungu ningi,kulola buno ntababalilwe,baghalulagha milenganya sabo buno eli ghongo. ⁷ Bwabagha bwighi bwighi,maswa ma muntu munene wa kakishi,ukumanwa Pubuli,u watuyamichagha nu kutusekela kwaghe bindi bisatu anga mwinda witu. ⁸ Ise wa Pubuli abagha ayamile na lusambo lwa kabubi nu akwansa mikilha;Polo mwa mu ku shighelela kweli,aseghagha ,amubikilagha maboko,nu amulamyagha. ⁹ Mwako kakishi, mwatukagha bango basambi nu balamagha. ¹⁰ Tweleshwagha lwanso lunene,nu mu kwenda kwitu,batweleshagha bikayi bitwabagha nabyo nkasa. ¹¹ Kushila mweshi esatu,twendagha mu bwato bwa Alesandilia, bwatinjagha bindi bya nsogho mu kakishi,nu bwekagha kilimelime cha keko disukula. ¹² Mu kwika ku Salakuse,twashilagha gho bindi bisatu. ¹³ Mu kutuka agho,mu kwenda mu mutili, twikagha ku Legio;nu munindu musi wasughagha,twakitagha mu lughendo bindi bibili kwikila ku Pusole, ¹⁴ nu twasangagha ko bisakwitu batuseghagha twikale nabo bindi mutubakamo .Nu bubo twendagha ku Loma. ¹⁵ Ku Loma,bisakwitu gha bongwagha ku musaghu witu, bashwagha kutukulumanya, kwika ku Foluma sa Piusi nu ku Tavelene si satu.Polo mu kubalola ko,aghanulagha Ghongo ,nu abagha na maghala. ¹⁶ Gha binde twika ku Loma,b'imilagha Polo ikale w'inene na sula umoyi ukumulanga . ¹⁷ Ku bindi bisatu,Polo amanagha bakungu ba Bayuda; nu kushila kukulumana,ababulagha bino bitondo: Bisakwitu,mu kuba nshakitinde bantu bubi ali ntungo sa batata,nakandilwe ku Yelusalema nu uko, ukubikilwe mu maboko ma Baloma. ¹⁸ Ghabashilagha kumbusha,balondagha ku nkandula,kubuno tabasangagha ki nasula nakwa. ¹⁹ Tondo ba Yuda bananagha,nu nichagha bitondo ku lusu,nu nshite mulenganya wa kutalikila kilongo chani. ²⁰ Lola uchasula nalondagha kubalola ko nu kubabula;kubuno mu malelamilo ma Isilaeli u munite whuno muyololo. ²¹ Bamwakulagha: Tatwamonile maluba mampa ma kutuka ku Yudea kw'itenda lyobe,nu takwile mw'isakwitu kuno watusambalinde ali kutenda bubi kuwe. ²² Tondo tukushima tumane biukulenganya,kubuno meghisha m'indini lino likutekulwa bubi kunsayi. ²³ Bamushighilagha kindi kimoyi,nu bengi bashwagha kumusona kwa kweli.Polo abasansilagha bitondo bya bukota bwa Ghongo,mu kuteneneka,nu mu kulonda,kutingila mulembe wa Musa nu balenganya, abaloshe busogha Yesu. Matenda mabo malingilagha nindunindu kw'ikila igholo. ²⁴ Bamoyi bimilagha byatendagha,nu bango bananagha ku katisha. ²⁵ Mukwengukana,Polo atendagha lingo: Ku bibyo uchasulagha Muusa Musogha,watenda na baso kutingila mulenganya Isaya,watendagha: ²⁶ Nda kweli abo bantu,nu babule: Mukwongwa na matui minu,nu tamukamana kena;Mukalola na miso minu,nu tamukamona. ²⁷ Kubuno mitima sa bano bantu si mbibhu; bashibile matuyi mabo,nu kushiba miso mabo,kubuno balolaghe na miso mabo,bongwaghe na matuyi mabo,bamanaghe na mitima sabo,tabaghaluke ,nu nshibalamye. ²⁸ Mumane lino buno lonio lwa Ghongo lwasingwa ku Babilongo,nu bakalongwilila. ²⁹ Gha shilagha kutenda ubo,Bayuda biyendelagha ,kukita myango gha basambana. ³⁰ Polo akitagha myaka imbili mu numba salighagha.Asekelagha bansayi bashwagha ku musona, ³¹ kusansa musaghu wa bukota bwa Ghongo nu mu kw'eghesha bibyo bya Mukota Yesu Kilishitu,bwasibwasi nu takuli wamunanilagha.