¹ Nakubulilila mu miso ma Kalagha nu mu miso ma Yesu Kilishitu u wemana kwaghya beli gho nu bakwile,nu mw'ishina lya kuloleka ko kwaghe nu mu bukota bwaghe, ² Sansa kitondo,kakisha mu nkungu nsogha nu nkungu mbi,sughila,kalaghula,ana na kwikumbya,nu mu kweghesha. ³ Kubuno kukika bindi bantu tabakimila meghesha ma bulili; tondo ,mu kuba na nkasa sa kwongwilila bitondo bya bulili,bakiyelesha beghesha bengi kuyangana na nkasa sabo, ⁴ mu kushiba matuyi ku bya bulili, nu kwongwilila mighani. ⁵ Tondo, uwe indole ko mu bitondo binsayi,imila minubo,kita mulimo wa kusansa musaghu musogha, kita busogha mulimo wobe. ⁶ Buno ine, nise kinsansa,bindi bya kukwa bise bwighi. ⁷ Nalwanile bita bisogha, nashila lughendo lwani, nakatilinde lukatisho. ⁸ Kumbusa kwagho,nabikindwe nkumbu sa bulili ;Mukota ,wa bulili u kwaghya,akanelesha lo ubo busi,nt'ine nene u mpanga,tondo lingo ku bango bakashima kubasa kwaghe. ⁹ Shwa ighilighili ku neli; ¹⁰ buno Dema anshighile, mu kushima bitondo bya bindi bino ,nu endile ku Tesalonika, nu Keleshike endile ku Galatia, nu Tito endile ku Dalamatia. ¹¹ Luka w'inene u weli ghamoyi nine.Tola Maliko nu shwa ghamoyi nawe, kubuno answaghila mu mulimo. ¹² Na singile Tikiko ku Efeso. ¹³ Gha ukashwa, nekele kankamba kanashighagha ku Tolowa kweli Kalipusi, nu bitabo,tanga bibyo bya ghondilwe. ¹⁴ Likisandele, mutumbi ankitinde bubi. Mukota akamukulukisha kuyangana na bya kitile. ¹⁵ Imbembuche nawe, kubuno ananile bubibu bitondo bitu. ¹⁶ Gha nintendelagha litangi,takwabagha wanelekeshagha,tondo bansayi banshighagha.Baghansilwaghe ibyo binsayi! ¹⁷ Mukota u wankatililagha nu kunkokomesha,inga lunsanso lwa kitondo lukitwe n'ine nu batekatisha bongwilile.Nu nalamile kutuka mu kanywa ka mbunga. ¹⁸ Mukota ankatucha mu bibi binsayi,nu akanonya buno aningishe mu bukota bwaghe bw'ighulu.Kwaghe kube lukumbu bindi binsayi !Amena ! ¹⁹ Wankashishagha samba Pilishila nu Akila,nu mubuto wa Onesifoli. ²⁰ Elashito ashighinde ku Kolinto, nu nashighile Tolofino musambi kukulya ku Mileto. ²¹ Kita ushwe ghabusho na bindi bya mpeo . Eubulo,Pudeno, nu Lino,Kolodia,nu bisakwitu bansayi bakukasha samba. ²² Nu Mukota abe ghamoi na mutima wobe!Nu mpang'inene sibe ghamoyi na benywe.