¹ Nahano ashambala na Musa na Haruni, ana ba bwira: ² Mushambale n'abana be Israeli n'oku derha, ebila by'ebirhungano nji mwagenda mwalya omu birhungano biri oku gulu. ³ Mwagenda mwalya echirhungano choshi chiherhe amahembi mabiri galehere, n'amagulu ga binogosho bibiri, n'eyagalula ebiryo omunda. ⁴ Aliko murhagenda mwalya ezila za galula ebiryo konine, changwa ziherhe amahembi galehere gonine, nantyo murhangenda mwalya engamiya, ya galula ebiryo, aliko n'erhaherhe mahembi malehere: Nji mu bilolereze nka birhachesezwe. ⁵ Nji murhalyaga echirhungano cho mumabale bigalula ebiryo omunda, aliko chirhanaherhe amahembi galehere, muchilolereze nka chirhachesezwe. ⁶ Nji murhagenda mwalya echirhungano chiri nka musimbi, chi vugusa,aliko chirhaherhe mahembi galehere: Muchilolereze nka chirhachesezwe. ⁷ Nji murhalya engulube eherhe amahembi galehere n'amagulu ga binogosho bibiri, aliko erhagalula biryo yalyaga, muchilolereze nka chirhachesezwe. ⁸ Nji murhalya eminyofu yazo, nji murhahumaga oku mubiri gw'emifu yazo; nji uyilolereze nka erhachesezwe. ⁹ Lolaga ebirhungano nji rhwagenda rhwalya mw'ebila byoshi biri omu menji, ebiherhe amasembe, n' amagamba, ebiri omu menji changwa ebiri omu nyanja, changwa ebiri omu nyinji. ¹⁰ Aliko nji birhakulokera ebyola byoshi, birhaherhe masembe n'amagamba, mw'ebila bija omu menji n'ebi byoshi bilamire omu menji, changwa omu nyanja, changwa omu nyinji. ¹¹ Nji orhakazirholera okuloka, za kuhumanya, nji murhalyaga enyama yazo, nji mwakahumana omu kuhuma emibiri y'emirhumba. ¹² Nji birhabalokera ebila byoshi, by'omu menji, birhaherhe maseme na magamba. ¹³ Lolaga omu nyunyi nazo za kahumanya na ntakuzirya: Chibarhula, chibarhula muzibuzibu, na chibarhu w'omu nyanja. ¹⁴ Nyunyi y'amashala galehere, oku musike sike n'ebiri buko bwazo. ¹⁵ Echihungwe n'obuko bwacho byoshi. ¹⁶ Kuguma na chibarhula, hunyira, enkongoro, n'akarhuli n'ezi ziri buko bwazo. ¹⁷ Murhalyaga enyunyi ziheka, zirheg'amahiri, biba bikwirire? ¹⁸ Omuhangali, enyange, chigukuma ch'omweru. ¹⁹ Enyunyi z'amagulu galehere, n'ozo bukamba oku rhwe n'eziri z'obuko bwazo, hudi-hudi, na kubukubu. ²⁰ Nji mwa humana , ntakuloka oku chirhungano cha bululuka ahashi n'okubalala n'oku lambagira n'amagulu mane. ²¹ Aliko mwebi birhungano bya bululuka n'okubalala n'okulambagira n'amagula mane nji mwalya ebiherhe amagulu g'enyanya n'amagulu gabyo galeme gabalala oku budaka. ²² Lolaga ebimwagenda mwalya: Amahanzi, enzige, emiguku, n'emishekera n'ebi bya ngasi buko. ²³ Nji mwa humana oku bindi byoshi by'ebirhungano bya bululuka n'okubalala n'ebya lambagira n'amagulu mane. ²⁴ Nji byanamuhindamula munya byaha ngasi yeshi nji wahuma omubiri gw'emirhumba nj'anaba arhachesezwe kuhik'egolo. ²⁵ Ngasi yeshi nji walerha emibiri efire anafula emishangi yage, nj'aba arhachesezwe kuhik'egolo. ²⁶ Nji mwalolereza nka orhachesezwe ngasi chirhungano choshi chiherhe amahembi galehere. Aliko chirhaherhe amagulu garhali ga binogosho bibiri chi rhanagalula ebiryo ngasi yeshi nji wachihumako eri arhachesezwe. ²⁷ Nji mwalolereza nka birhachesezwe ngasi birhungano byoshi by'amagulu mane bya lambagira n'amagulu gabyo: Ngasi yeshi nji wahuma emibiri y'emirhumba eri arhachesezwe kuhik'egolo; ²⁸ Ngasi yeshi nji walerha emibiri yabyo efire nj'afula emishangi yage njanaba arhachesezwe kuhik'egolo. ²⁹ Lolaga omu birhungano bya genda n'enda oku daho, ebi mwagenda mwalolereza nka birhachesezwe: Efuko, embeba n'omusheberera, bili ngasi bukoo bwabyo. ³⁰ Nyamushushu, omorha; enkuru, echinyashongo, na lunve. ³¹ Mu bilolereze nka birhachesezwe omu bigenda n'enda byoshi; ngasi yeshi nji wahuma ebifu nja rhacheswa kuhik'egolo. ³² Ngasi yikoleswa nji hyarhogera ku hintyu higuma higuma oku mibiri efire yanaba ezingire, echikoleswa ch'omurhi, omushangi, oluhu, eshaho ngasi chikoleswa chakolere; nji bachiheba omu menji, na nji chanayorha chizingire kuhik'egolo; enyuma nji chanachesibwa. ³³ Ngasi hyoshi nji yaba omu chintu babumbaga n'obudaka aha hya rhogera echola chintu nji haba hamazinga, nji mwanaberangula echola chinaga. ³⁴ Ngasi kalyo koshi kakarhabala okulya nji kakarhogera omu menji, eri kamazinga na ngasi chinyobwa bakanywa chiri mwecho chintu chizingire. ³⁵ Ngasi chikoleswa nji charhogera oku hintu hy'emibiri efire yabo nji ya nazinga; amasiga n'omuliro byanashandazwa nji yanazinga n'oku bilolereza nka bizingire. ³⁶ Nji hanaba omuleba n'ebikiro y'amenji ya nalunda echilundo ch'amenji, nji gayorha gachesezwe; Aliko oyula nji wahuma kw'eyola mirhumba nj'aba arhachesezwe. ³⁷ Nka hakarhoga echintu ch'emirhumba yabo oku burho bajirhwera, nji yana yorha echesezwe; ³⁸ Aliko akaba bahebere amenji oku burho; n'okukarhogera echintu oku mirhumba yabo, nji muyilolereze nka bizingire. ³⁹ Nka hak chirhungano chiguma omu birhungano bibarhala okulya oyula nji wahuma omubiri gwage gufire nj'aba arhachesezwe kuhik'egolo. ⁴⁰ Oyula nji walya omubiri gwage gufire nj'afula emishangi yage nj'aba arhachesezwe kuhik'egolo, n'oyula nji walerha omubiri gwage gufire nj'afula emishangi yage na nj'anaba arhachesezwe kuhik'egolo. ⁴¹ Nji birhakulokera ebilambagira byoshi n'enda oku budaka: Njorhanabilya. ⁴² Nji murhanalya ebilambagira n'enda byoshi oku budaka, n'ebilambagira n'amagulu mane, oku magulu manene, bulala nji wabigwarha birhanaloka. ⁴³ Orhajiraga oku bantu bawe ebirhakwirire oku bilambagira n'enda byoshi, orhabajiriraga oku rhacheswa oku bonine, orhanabazingisaga oku bonine. ⁴⁴ Bulala ndi Nahano, Namahanga wenyu, nji mwachesibwa, nji mwanaba bachesibwa bulala ndi muchesibwa, nji murhabaga banya byaha oku bilambagira n'enda oku budaka. ⁴⁵ Bulala ndi Nahano wabakulaga omu chihugo ch'e Misiri mpu mbe Namahanga wenyu, mpu mube bachesibwa, bulala nani ndi muchesibwa. ⁴⁶ Eri liri rhegeko lihumire oku birhungano, enyunyi, n'ebilemwa bilemerwe n'ebiba omu menji, n'ebiremwa bilambagira n'enda oku budaka. ⁴⁷ Oku buzinda omenye kurhe wakamenya ebi rhachesezwe n'ebi chesibwa, echirhungano wakalya n'echirhungano orhakalya.