¹ Omu chihugo che Usi mwaliri mulume muguma wahamagalagwa Yubu. N'oyo mulume ali mushinganyanya na muntu w'okuli; ayobohaga Nyamuzinda, arhajaga ahali amabi. ² Aliherhe banyere basharhu na barhabana mushanvu. ³ Aligwerhe bibuzi bihumbi mushanvu, bihumbi bisharhu by'e Ngamiya, magana marhano g'empanzi, magana marhano g'e Punda z'echikazi, n'abambali banene kulusha.N'oyo mushamuka ali wa lukengwa bwenene omu bantu boshi b'ebushoshokero bw'ezuba. ⁴ Abagala balikomere oku genda bajira edinye emwa ngasi muguma mwabola, barhumiza na bali babo oku bali basharhu, mpu bayinje balye, banywe haguma boshi. ⁵ Ago mango g'esiku z'edinye zabaga zamahwa, Yubu abarhumiza mpu bayinje abahunire, anazuka miseke miseke n'oku rhulira ngasi muguma enterekero; Bulala Yubu aderha: N'okuchirhimanya emurhima, hakanaba aba bana bani bajirire Nyamuzinda echaha omu mirhima yabo. Ntyo ku Yubu agendaga ajira ngasi mango. ⁶ Lero lusiku luguma bene Nyamuzinda bayinja haramya embere za Nahano, Lyangombe naye ayinja omu charagati chabo. ⁷ Nahano adosa Lyangombe: Ngahe warhenga? Lyangombe ashuza Nahano: Ndi nageragera omu gulu n'oku lizunguluka. ⁸ Nahano abwira Lyangombe : Ka wabwen'omwambali wani Yubu? Nta muntu omulinganene omu gulu lyoshi; aba muntu mushinganyanya n'ow'okuli, n'okuyoboha Nyamuzinda, n'okugaya amabi. ⁹ Lyangombe ashuza Nahano: ka busha Yubu ayubahira Nyamuzinda? ¹⁰ Chi we mulanga, yewe, n'enju yage, n'ebyage byoshi? Wagisha emirimo y'omu fune zage, n'obuso bw'ebirhugano byage by'omola chihugo. ¹¹ Aliko orhange lika efune yawe, ohume kw'ebila aherhe ajira byoshi, okuli akulahira, orhabwene oku akugayisa omu malanga-mbere gawe. ¹² Nahano abwira Lyangombe: Lolaga, ebyage byoshi, nkulikire byo, S'aliko omenye kuguma konine orhamuhebaga kw'efune yawe. Okuhandi Lyangombe ayumuka arhenga oku burhwali bwa Nahano. ¹³ Lero lusiku luguma bagala na bali ba Yubu baliherhe balya n'okunywa oku livayi, omu mwa mukulu wabo, ¹⁴ Entumwa yayinja eri bwira Yubu, eri waliha, empanzi zawe zabere ziherhe zahinga n'endogomi nazo eri ziherhe zageragera aha burhambi; ¹⁵ Mukano kasanzi Abahangalanyi b'e Seba bamarhogera okuzo, bamazirhola, abambali bawe boshi bayirhirwe oku ngorho. Nyenine nabafulumikire mwo, bwo bunola nyijire nti nkubwire na nkumenyise eyo myazi y'obuhanya. ¹⁶ Oku aherhe aderha ntya, owindi ayinja n'oku derha: Omuliro gwa Nyamuzinda gwamarhoga empingu, gwamasingonyola ebibuzi n'abangere, barhahumirwe omu bunu. Nyenyine nafulumikire, bw'obo ndi kukubwira ogu mwazi. ¹⁷ Oku achiherhe aderha, owindi naye y'ono, yono, aderha: Abakalideyo, bamanayinja bachigabire mu bigusho bisharhu, bamabalalira oku ngamiya, bamaziheka, bamagez'abambali bwawe kw'ebyoje by'engorho. Nyenine nabafulumukire, n'obw'obola ndi kubwira ogola mwazi. ¹⁸ Okw'achiherhe aderha, ntya kw'owindi ayinjire n'oku derha: bagala bawe na bali bawe balemaga balya n'okunywa elivayi omu mwa mukulu wabo; ¹⁹ Lolaga, omuhusi gunene gukomere gwayinja ewa lunda l'omu mpinga, gwamachihonda oku rhuhembe rhune rhw'enju; yamakumbagalira oku bana, barhabahumire omu bunu. Nyenine ndolo ndolo nafulumikire, bw'obola ndi kukubwira eyi myazi. ²⁰ Na ntyo Yubu ayumuka, abera elopo lyage, n'oku chigemb'erhwe; na ntyo, achikweba okudaho, afukama, ²¹ n'oku derha: Narhengaga omunda ya nyama, butambara nji nashubi galuka omunda y'egulu. Nahano ahanaga, na Nahano amarhola; ezino lya Nahano ligishwe! ²² Omu byoshi, Yubu arhajiraga chaha na nta bubi ajirire Nyamuzinda.