¹ M'amazino ma bene Isiraheli mano, barhenga e Misiri haguma na Yakobo, n'omulala gwa ngasi muguma wabo: ² Rubeni, Simeoni, Lawi, Yuda, ³ Isakari, Zabuloni, Benjamina, ⁴ Dani, Nefutali, Gade na Aser. ⁵ Abantu baburhagwa na Yakobo baliri haguma boshi makumi gali mushanvu. Yusufu yewe eri akal'aba e Misiri ⁶ Yusufu afa na bene babo boshi n'elyo burha lyoshi nalyo ly'afa. ⁷ Abana b'e Isiraheli baburhana bana yushuka, baluga, baba n'emisi bwenene. Echihugo cha yunjula. ⁸ Habonekana mwami muguma muhyahya e Misiri, orhalimenyere Yusufu. ⁹ Abwira olubaga lwage, ntya: Mubwene okw'abana b'e Isiraheli bamaba lubaga lunene lw'emisi kurhulusha. ¹⁰ Rhugende! Rhuyanguhe oku bwo; rhubabuze okuyushuka, n'eri hakaba entambala, hali amango bakachiheba haguma n'abashombanyi berhu, na hano bamali rhulwisa, banachirhengera muchino chihugo. ¹¹ Banabahira kw'abarhambo balema babakolesa obukukuru, mpu li babalibuza n'emirimo ekomere. Ntyo kubayumbakire Farao ebizungu by'embiko, Pitomu na Ramusesi. ¹² Aliko, okubali babalibuza ntyo, eri ku nabo banali bayushuka; abanya Misiri balama omu buba bwa banya Isiraheli. ¹³ Ntyo kw'abanya Misiri bakoleseze abanya Israeli okurhalusize mpu libabakehya ko. ¹⁴ babakomezeza akalamo n'emirimo ekomere y'okukola ebumba n'amadofali, n'emirimo yoshi y'amashwa: Balemaga babaseza eyo mikolo omu burhindibuke. ¹⁵ Mwami w'e Misiri ashubi shambala n'embuguma ziburhisa z'Abahebraniya, muguma omu bo ahamagalwa Shifra, n'owindi ye Puwa. ¹⁶ Ababwira, ntya: Hano muburhisa abakazi b'Aba Ebraniya, na mukayinjibabona baburhire omurhabana, mwanamuyirha; nka munyere , mwanamuleka alame. ¹⁷ Aliko ezo mbuguma zayubaha Nyamuzinda, zirhakolaga nkoku mwami w'e Misiri ababwiraga; baleka abarhabana balame. ¹⁸ Mwami w'e Misiri ahamagala ezo mbuguma, ababwira ntya: Charhumire mwajira ntya, mwamaleka abana rhabana balame? ¹⁹ Zilala mbuguma z'okuburhisa zabwira mwami Farao, ntya: Abakazi b'Aba Ebraniya barhali kuguma n'ab'e Misiri; bowe baba bakazi bakomere; embere omukazi w'okuburhisa abahike ko, eri bowe mira baburhaga. ²⁰ Nyamuzinda akolera ezo mbuguma ziburhisa ebikwirire; n'ololubaga lwayushuka, lwaba lunene bwenene. ²¹ Bulala abola bakazi baburhisa baliyubahire Nyamuzinda, Nyamuzinda naye ayushula emilala yabo. ²² Nantya, Farao arhegeka abantu bage boshi, ntya: ngasi murhabana yeshi waburhwa bamukabulire omu lwinji lunene, nji mwanaleka abanyere boshi balame.