¹ Eyi y'emyazi Musa abwiraga aba Israeli boshi olunda lw'e'Yorodani omu mpinga, omu lubanda luyerekeze e'Sufu, ahachagarhi k'e'Parani, e'Tofeli, n'e'Labani, n'e'Hazeroti, n'e' Dizahabu. ² Luli lugendo lwa siku ekumi na luguma kurhenga e'Horebu omu njira y'entondo z'e'Seiri kugera e'Kadesi-Berenea. ³ Gwaliri mwaka gw'ekumi na kane mwezi gw'ekumi na muguma, omu lusiku lurhanzi l'omwezi, Musa abwira abana b'e'Israeli byoshi nk'oku Nahano amurhegekaga. ⁴ Amango bamalaga kuhima Sihoni mwami wab'Amori wabaga omu Hesibuni, na Ogi mwami w'e'Basani wabaga e'Astaroti omu Edereyi. ⁵ Oku lunda lw'e'Yorodani omu chihugo ch'e'Moabu Musa arhondera okuhanula erhegeko aderha: ⁶ Nahano Nyamuzinda werhu arhubwira e'Horebu aderha: Mwamabera kw'eyi ntondo siku zinene. ⁷ Muhindamuke, mubalame, muje omu chihugo ch'e'ntondo yab'Amori n'oku burhambi hofi nacho, omu lubanda, n'omu chihugo ch'entondo n'omu chihugo ch'e lubanda, enjira shishi n'oku burhambi bw'enyanja, omu chihugo chaba Kanana, n'e'Lebanoni, kugera oku lwinji lunene, lwinji lw'e'Furati. ⁸ Tala oku nahebere echihugo embere zenyu, mujemo muchirhambule bulala chi Nahano alaganyaga bayisho wenyu Aburahamu,Isaka na Yakobo oku nji achiha abana babo enyuma zabo. ⁹ Nani mbabwira mwago mango anaderha: Ntakagala nyenine oku baheka. ¹⁰ Nahano Nyamuzinda wenyu abajirire oku banene, mulole oku muli nka nkununu oku bunene. ¹¹ Nahano Nyamuzinda waba isho, abajire banene kali chihumbi kulusha nk'oku muli zene, ana bagishe nk'okwana balaganyaga! ¹² Gurhe nyenine na kagala kuheka ebizidohere by'emigogo yenyu n'entonganyi zenyu? ¹³ Murhole omu mashanja genyu abantu bw'obwenge, baherhe obumanyi banamanyikene, bajire babe marhwe genyu. ¹⁴ Nenyu mwanshubiza mwaderha mpu omwazi na derhere gukwirire oku gukole. ¹⁵ Nantyo narhola amarhwe omu mashanja genyu, abantu bw'obwenge banamanyikane, nabajira babe marhwe genyu, bya chihumbi, birongozi by'egana, birongozi bya makumi marhano, birongozi by'ekumi, na abamarhegeko, kukulikirana na amashanja genyu. ¹⁶ Naha erhegeko kubazuzi na derha: Muyunvirize ebirego oku benebenyu chiro n'omugenzi obalimo. ¹⁷ Murhabale abantu omu kuch'emanja, mulole omu dorho n'omukulu kuguma, murhayubahaga amasu g'omuntu, bulala Nyamuzinda yech'olubanja, n'olwabagambire mulunderhere nduyunvirize. ¹⁸ Intyo kunabahamirizaga ago mango ebi mukwanene kujira. ¹⁹ Rhwabalama kurhenga e'Heburoni, rhwagera mw'eyo mpinga nene eyobohezeze mwabonaga omu njira ejire oku ntondo y'e'Amori nka oku Nahano Nyamuzinda werhu arhurhegekaga; rhwagera e'Kadesi-Berene. ²⁰ Nyono nababwira: Mwamagera oku ntondo yaba Amori eyi Nahano Nyamuzinda arhuhere. ²¹ Tala oku Nahano Nyamuzinda wawe ahebere echihugo embere zawe, shona muchirhole nk'oku Nahano Nyamuzinda alaganyaga bayisho wenyu murhayubahaga murhana dirhimanaga. ²² Nenyu mwashegerera mwaderha mpu: Rhurhange kurhuma endabi eyomunda barhulerhere engani z'enjira rhwageramo n'echishagala rhwagereramo. ²³ Eyi nderho yansimisa bwenene: Narhola bantu ekumi na babiri ahagarhi kenyu, muntu muguma muguma omu ngasi shanja. ²⁴ Bagenda, bashona entondo, bagera omu lubanda lw'e'Eskoli, balolereza! ²⁵ Barhola oku malehe g'echo chihugo barhulerhera omu fune zabo, barhubwira oku echihugo chikwirire echi Nyamuzinda arhuhere. ²⁶ Aliko murhayemeraga kujayo, s'aliko mwagomera oburhegeke bwa Nahano Nyamuzinda wenyu. ²⁷ Mwagayira omu mwabenyu, mwaderha: Mpu Nahano abagayisize oku bakula omu chihugo ch'e'Misiri, mpu mbahire omu maboko gaba Amori oku bashereza. ²⁸ Rhujengahe? Bene berhu barhuvunire emirhima baderha: Abo bantu balehukire nabazibuzibu kurhulusha mpu echihugo chigerere okulugurhu lugerere omu bichu, mpu babwene abana ba Anaki aho. ²⁹ Nyono nababwira: Murhayubahaga chiro mumenye mwakayoboha. ³⁰ Nahano Nyamuzinda werhu arhujira embere, arhulwira nka kulala arhujiraga e'Misiri oku mesho genyu. ³¹ N'omu mpinga ahantu mwabonaga oku Nahano Nyamuzinda arhuheka kulala omuzere aheka omwana wage omu njira yoshi mwagereremo kugera hano muli. ³² Aliko murhayemeraga Nahano Nyamuzinda wenyu kw'ebi byoshi. ³³ Owabajira embere omu njira mpu abalonzeze ahamwanka handa, obudufu akoleza omuliro yimubona enjira mwageramo, n'ezuba abahirira olwakungu. ³⁴ Nahano ayunva omulenge gw'emyazi yenyu,agaya,alahira endahiro ederha: ³⁵ Kubinali nta muntu n'omuguma waba bantu bechi chibusi chibi walola oku chihugo chikwirire nalaganyaga ba Isho kubaha. ³⁶ Harhenga Kalebu mwene Yefuni yewe achibona, n'amuha yewe n'abana bage echihugo alabarhiremo; Bulala akulikire omwazi gwa Nahano. ³⁷ Nahano angayire enyanya zenyu aderha mpu ntaja mw'echo chihugo. ³⁸ Yoshuwa mwene Nuni yewe aja mwecho chihugo, oyu oyumangire hano, mumufarhe bwinja bulala yiwalongola Israeli okuja omu chihugo. ³⁹ Kandi n'abana benyu badorho mwaderhaga: Njibarholwa na bagala benyu bakule obubi changwa obwinja abo bajamwecho chihugo mbaherecho bachirhambule. ⁴⁰ Aliko mwabo muhindamuke, mugende omu mpinga muyerekeze omu njira y'enyanja y'omuduku. ⁴¹ Lero, mwashubiza mwambwira mpu rhwagomere Nahano, mpu rhwazamuka rhulwise nk'oku Nahano, Nyamuzinda werhu arhubwirire. Mwarhola buli muntu entwaro yage, mwazamuka oku ntondo. ⁴² Nahano ambwira: Obabwire bamanye barhazamuka oku ntondo barhange kulwisa entambala bulala ntali haguma nabo, mwanka shurhwa n'omwanzi wenyu. ⁴³ Nababwira intya: Aliko mwabo murhanyunvaga, aliko mwagayaguza erhegeko lya Nahano, mwachihangana mwazamuka oku ntondo. ⁴⁴ Abanya Amori balilamire mweyo ntondo, babahulukirako, baba babachinagiza kulala enjuki zijira babashurha eshishi w'e Seiri kugera e'Horma. ⁴⁵ Nenyu mwagalukire, mwalaka embere za Nahano,aliko Nahano arhuyunva amalaka genyu, chiro arhahiraga ogurhwiri emunda muli. ⁴⁶ Intyo, mwabera e'Kadesi siku zinene, kuguma n'esiku mwaberagayo.