¹ Nyamuzinda abwira omulebi Yehu mwene Hanani mpu abwire Baasha ntya : ² " Waliri muntu orhamanyikene omu lubaga,nyenine na kuyufula na kujira mwimangizi w'olubaga lwani lwe Israeli;Okubona wajirire aka Yeroboamu,warhuma abantu bani bajira ebyaha,mpu yi bangayisa n'ebyaha byabo. ³ Nkola na kuyirha,nyirhe n'omulala gwawe goshi,mbajire nk'oku najiraga jiraga omulala gwa Yeroboamu mwene Nebati. ⁴ Ow'omu mwawe owakafira omu chishagala alibwa na banyakabwa,n'owa nkafira omu luchiga alibwe n'enyunyi z'emalunga. ⁵ Ebindi bijiro Baasha ajirire n'oburhwali bwage,ka birhayandikirwe omu chitabu ch'ebyakazagiba ch'abami b'omu Israeli ? ⁶ Baasha afa,bamuhamba e Tirsa,haguma na b'eshe.Omugala Ela ayimikwa nka mwami ahali hage. ⁷ Omwazi gwa Nyamuzinda gwayinja omu mulebi Yehu mwene Hanani,gwa yandagalira Baasha n'omulala gwage,eri galala mabi goshi ajiraga embere za Nyamuzinda garhumire,mpu amugayisize bwenene omu bijiro byage,n'okuba kuguma n'omulala gwa Yeroboamu chango bulala abaga ashandazize omulala gwa Yeroboamu. ⁸ Eri mwami Asa w'e Yuda ajira myaka makumyabiri na ndarhu ali burhambuzi,Ela mwene Baasha ayima omu Israeli,arhambula e Tirsa myaka ebiri. ⁹ Omwambali Zimri aliri mukulu wa chigabi chiguma ch'enfola miherho,amujira mahwe,haliri mango maguma eri mwami Ela ali e Tirsa,anywa amavu,alalukira omu mwa muntu muguma mpu ye Araza,aliri murhonyi omu mwa mwami e Tirza. ¹⁰ Mwami Asa abere ageza myaka makumyabiri n'erhano arhambwire e Yuda,Zimri aja mweyo nju mwami Ela alalukiragamo,amuyirha,ajaba ye yima bwami ahali hage. ¹¹ Abere akola ali mwami,ayirha ab'omu mulala gwa Baasha boshi omukulu n'omudorho,chiro n'abera bage n'abambali,chiro nta muntu n'omuguma alekere. ¹² Zimri ahungumula omulala gwa Baasha yi kulala omulebi Yehu alebaga Baasha n'omulala gwage goshi kuhikirira, ¹³ eri bubi bwa Baasha n'omugala Ela bwarhuma,na bulala bo barhumaga aba Israeli bajira ebyaha,bagayira Nyamuzida Namahanga w'aba Israeli bulala banarherekera enama. ¹⁴ Ebindi bijiro Ela ajirire biyandikirwe omu chitabu ch'ebyakazagiba ch'abami b'aba Israeli. ¹⁵ Mwami Asa we Yuda abere amageza myaka makumyabiri na mushanvu y'oburhgesi,Zimri ayima obwami,arhegeka siku mushanvu eTirsa omu Israeli. Olubaga lw'aba Israeli lwalonza oku lwisa abantu b'omu chishagala che Gibetoni chaliri ch'Abafilisitini. ¹⁶ Enfola miherho yamenya oku Zimri agomere,n'oku anayirhire omwami wabo. N'olo lusiku lon'olo,bayimika Omri,mukulu w'enfola miherho,omundalo zabo aba mwami wabo. ¹⁷ Omri n'engabo yage yoshi,barhenga e Gibetoni,barhera echishagala che Tirsa. ¹⁸ Ago mango Zimri abwene oku bamagwarha echo chishagala,aja omu burhwali,achigulumiziza kw'enju yobwami,afa. ¹⁹ Ntyo ku Zimri afire eri byaha ajiriraga Nyamuzida birhumire,nka kulala Yeroboamu agayisaga Nyamuzida naye,arhuma aba Israeli bajira ebyaha. ²⁰ Ebindi bijiro Zimri ajirire n'amahwe ajiraga,biyandikirwe omu chitabu ch'ebyakazagiba ch'abami b'aba Israeli. ²¹ Ago mango Ntyo k'olubaga lw'aba Israeli lwa chigabire kabiri : Chigabi chiguma chalonza okujira Tibni mwene Ginati abe mwami,n'echindi chigabi basima Omri. ²² Abaliri oku lunda lwa Omri bahimana. Tibni mwene Ginati afa,Omri aba ye rhambula aba mwami. ²³ Eri mwami Asa we Yuda,ajira myaka makumi masharhu na muguma ali arhambula,Omri ayima obwami omu Israeli. Arhambula myaka ekumi n'ebiri.Abere amarhambula myaka ndarhu e Tirsa, ²⁴ agulira muntu muguma mpu ye Shemeri entondo omu Samariya,amuha bikono bibiri by'efuranga.Omri ayumbaka echishagala kw'eyo ntondo,achiha ezino ly'e Samriya,kukulikirana n'ezino lyaninayo Shemeri. ²⁵ Omri agomera Nyamuzinda,anakola amabi manene kulusha abandi bami boshi baliri embere zage. ²⁶ Ajirira Nyamuzinda amabi nka kulala Yeroboamu mwene Nabati akazagijira,agayisa Nahano, Namahanga w'aba israeli,anarhuma aba Israeli bajira ebyaha amango balembaga barherekera eshushano z'enama. ²⁷ Ebindi bijiro Omri ajirire n'oburhwali bwage biyandikirwe omu chitabu ch'ebyakazagiba ch'abami b'aba Israeli. ²⁸ Omri afa,bamuhamba e samariya,omugala Ahaba ayima ahali hage,aba mwami. ²⁹ Eri Mwami Asa w'e Yuda ajira myaka makumi masharhu na munane ali arhambula,Ahaba mwene Omri aba mwami we Israeli. Arhambula omu Samariya myaka makumyabiri n'ebiri. ³⁰ Ahaba ajira ebigayisize Nyamuzinda,kulusha abami baliri embere zage. ³¹ Alushiriza ebyaha bya Yeroboamu,mwene Nebati,chiro yewe aba achirholera Yezebeli mwali wa mwami Etabaali we Sidoni,alema arherekera eshushano y'ennama Baali n'okuyifukamira. ³² Ayimanziza eyo shushano enterekero,ashubi yi yumbakira n'enju y'okulema ahereramo omu Samariya, ³³ Ayimanza enkingi y'eshushano y'ennama-kazi Ashera,Ahaba agayisa Nyamuzinda Namahanga w'aba israeli bwenene,ajira mabi manene kulusha abandi boshi babaga barhambwire obwami embere zage. ³⁴ Omu mango g'oburhambuzi bwage,muntu muguma mpu ye Hieli w'e Beteli ayumbaka echishagala ch'e Yeriko;Abere akola ali acha echiriba chacho,omugala mukulu Abiramu afa,n'eri abere akola ali ashinga enyunvi,omugala mudorho Segubi afa,likulala Yoshuwa mwene Nuni alebaga kuhikira.