¹ Eri Yeroboamu mwene Nabati amala myaka ekumi na munane ayimire, Abiya aba mwami we Yuda. ² Ayima myaka esharhu e Yerusalema,nina yi waliri Maaka,mwali wa Abishalomu. ³ Alema ajira ebyaha kuguma n'eshe,arhakengaga Nyamuzinda Namahanga wage n'omurhima goshi nka kula shokuluza wage Daudi alimukengere. ⁴ Nyamuzinda Namahanga wage amuha omugala warhambula ahali hage omu Yerusalema,mpu ly'omulalagwabo gurhaheraga,li n'e Yerusalema ekaziyorha eri obwami,eri Daudi warhuma okola kwaba ntyo. ⁵ Bulala Daudi ajirire ebishinganene oku masu ga Nyamuzinda,n'omu kalamo kage koshi arhalekaga n'erhegeko n'eliguma,kuleka chilala chaha ch'obulenzi alenganyaga mu Uriya w'Omuhiti chonine. ⁶ Omu kalamo koshi ka Roboamu,bakazagi lwa bombi na Yeroboamu. ⁷ Ebindi bijiro Abiya ajirire,biyandikirwe omu chitabu ch'ebyazagiba ch'abami b'e Yuda,naye akazagi yorha alwa na Yeroboamu. ⁸ Mwami Abiya afa,bamuhamba omu chishagala cha Daudi,omugala Asa ayima ahali hage,aba mwami. ⁹ Eri Yeroboamu ahisa myaka makumyabiri y'oburhambuzi omu Israeli,Asa ayima omu bwami bw'e Yuda. ¹⁰ Arhambula myaka makumi mane na muguma e Yerusalema. Nakulu yi waliri Maaka mwa Abishalomu. ¹¹ Asa alema ajira ebisimisize Nyamuzinda nka kulala shokuliza wage Daudi ajiraga. ¹² Abuza abalume n'abakazi balemaga barherekera entama omu chihugo. ¹³ Ashandagaza n'eshushano z'entama bashokuliza bage babejaga mpu bagende bazirherekera,ahanza n'obukenge bw'okuderha Nakulu Maaka mpu ye Mugoli,bulala alijirire ebigayisize eri abejisa eshushano y'entama-kazi Ashera. Asa ayishandagaza,ayiyoseza oku mubunda gwe Kidroni. ¹⁴ Chiro akaba Asa alisimire Nyamuzinda n'omurhima gwage goshi omu kalamo kage,arhashandazaga emperero zoshi zaliri omu chihugo. ¹⁵ Arhola ebintu eshe abaga arheganyizize Nyamuzinda n'ebi naye yenine abaga anagoshwere,efuranga,ehoro n'ebindi bikulo bya ngasi lubero abiheka omu kanyamuzinda. ¹⁶ Omu Kalamo kabo koshimwami Asa we yuda na mwami Baasha we Israeli,ngasi mango bagendaga balwa. ¹⁷ Mango maguma Baasha arhera echihugo che Yuda,ayumbaka echishagalala che Rama,achizungulusa k'olugurhu lukomere bwenene mpu li Asa n'abantu be Yuda barhakazagijamo nk'oku banalonzeze. ¹⁸ Asa arhola efuranga n'ehoro zoshi zaliri omu shaho y'akanyamuzinda,n'ezaliri omu shaho y'oku bwami,aziha abarhambo mpu bazihekere mwami Benehadadi,mwene Tabrimoni,munjukulu wa Hesioni we Siriya,eri ali e Damasiki.Abarhuma mpu bamubwire ntya : ¹⁹ " Rhuyunvikane rhwembi nka kulala darha na sho banaliri.Ezila furanga nezi horo,luli luhembo nkurhumire.Orhachuyunvikanaga na mwami Baasha we Israeli lya kula engabo zage omu chihugo chani. " ²⁰ Mwami Benehadadi ayemera oku Asa amurhumiraga,arhuma abarhambo b'engabo zage mpu baji lwisa ebishagala by'aba Israeli. Bafarha echishagala che Iyoni,n'eche Dani,n'eche Abeli=Beti-Maaka,n'ebishagala bye Galilaya,n'ebindi byaliri e Nefutali byoshi. ²¹ Amango mwami Baasha amanyaga oku ntyo kubiri,aleka okuyumbaka e Rama,agaluka ajibera e Tirsa. ²² Mwami Asa ahamagala abantu be Yuda boshi buzira kurhalukira,barhola amabale n'emirhi mwami Baasha abaga alundire mpu ayumbakamo e Rama.Abiheka ajikomezamo echishagala che Misipa,n'eche Geba ye Benjami nk'oku mwami Asa abaga arhegekere. ²³ Ebindi bijiro n'oburhambuzi mwami Asa ajirire,n'ebishagala ayumbakire ka birhayandikirwe omu chitabu ch'ebyakazagiba ch'abami be yuda ? S'aliko omu bushaja bwage,alwala amagulu. ²⁴ Asa afa,bamuhamba haguma na bashokuluza bage omu chishagala cha Daudi,eshekuluza. Omugala Yosafati ayima,aba mwami ahali hage. ²⁵ Eri mwami Asa we Yuda aba amarhambula myaka ebiri,Nadabu mwene Yeroboamu ayima omu bwami bwe Israeli,arhambula mo myaka ebiri. ²⁶ Alema ajira ebigayisize Nyamuzinda;ajira n'engeso mbi kulala eshe alemaga ajira,arhuma n'aba Israeli bajira ebyaha,alema ajira n'ebyaha biri kuguma n'eby'eshe alemaga ajira. ²⁷ Baasha mwene Ahiya,w'omu mulala gwa Iskari,ajira Nadabu mahwe,Baasha amuyirhira e Gibetoni emwa Abafilisitini,eri Nadabu n'aba Israeli boshi bagorhere echo chishagala. ²⁸ Amuyirhira eri mwami Asa w'e Yuda akola agwerhe myaka esharhu y'oburhwali. Baasha ayima ahali ha Nadabu aba mwami omu Israeli. ²⁹ Abere amarhambula,han'aho ayirha ab'omu mwa Yeroboamu boshi,ntaye arhalukire n'omuguma,ayirha ngasi choshi chiyis'omuka,nka kulala omulebi Ahiya we Shilo analebaga. ³⁰ Nyamuzinda Namahanga we Israeli agaya bwenene,aba ahana Yeroboamu eri byaha byage byarhuma na bulala arhumaga aba Israeli bagoma. ³¹ Ebindi bijiro Nadabu ajirire n'ebya jiraga byoshi, ka birhayandikirwe omu chitabu ch'ebyakazagiba ch'abami b'omu Israeli ? ³² Mwami Asa we Yuda n'omwami Baasha we Israeli bakazagi lwa ngasi mango omukalamo koshi. ³³ Eri Asa ageza oku myaka esharhu arhambwire obwami bwe Yuda,Baasha mwene Ahiya arhambula omu Israeli yoshi e Tirsa. Arhambula myaka makumyabiri n'ene. ³⁴ Alema ajira ebigayisize Nyamuzinda,ajira ebyaha nka kulala Yeroboamu alemaga ajira,arhuma n'aba Israeli bajira echaha,alema ajira ebyaha kuguma n'ebya Yeroboamu.