¹ Mwago mango,Abiya,mwene mwami Yeroboamu alwala. ² Yeroboamu abwira mukage : Yumuka,wekalama, ojiyambala kwindi kwindi abantu barhamenyaga okw'oli mukani,oje e Shilo. Wabugana y'omulebi Ahiya,yolala wambwiraga oku naba mwami w'aba Israeli. ³ Orhole migati ekumi mizibuzibu n'eyindi migekege,n'akabindi k'obuchi,omuhekere omu bwire gurhe oyu mwana aba. ⁴ Muka Yeroboamu aja emw'omulebi Ahiya e Shilo,omulebi Ahiya abaga akola ali mushaja,arhachilemaga abona. ⁵ Nyamuzinda abaga abwirire omulebi Ahiya : Ntya, " Muka Yeroboamu ayinja,Ayinja ayambere kwindi kwindi ayinja kudosa gurhe omugala aba,bulala alwere. Wakamushuza ntya na ntya. " ⁶ Amango Ahiya ayunvaga omudindiri oku lunvi amuyankirira,aderha ntya : " Oje muno,muka Yeroboamu, " amudosa ntya : " Bichi birhumire walonza oku chijira windi windi ? Nanga emyazi ngwerhe na kubwira ebihire. ⁷ Ojibwira Yeroboamu oku Nyamuzinda Namahanga w'aba Israeli aderhere ntya : Nakulondolaga omu bantu mpu orhambule abantu bani be Israeli. ⁸ Nanyega ob'omu buko bwa Daudi obwami,na kuhabo. S'aliko orhajiraga kuguma n'omwambali wani Daudi,bulala yewe akazagi nkolera n'obushiru,akazagi kenga amarhegeko n'amahano mani goshi arhanangayisaga. ⁹ Wakolere amabi kulusha boshi baliri embere zawe,wangayisize amango wajaga chijirira abandi balyangombe n'eshushano z'okurherekera,wachinkulako ! ¹⁰ Echo che chirhumire naja kulerha obuhanya omu mulala gwawe,nji nayirha ngasi mwana rhabana wawe yeshi,omudorho n'omukulu,omurhwa n'omulimi omu Israeli. Nji nabiza enju yawe nka kulala babiza ebirhi,kuhika byoshi bihwe. ¹¹ Ow'omu mwawe wefire omu chishagala,nji alibwe na banyakabwa, n'owefire omu luchiga nji alibwe n'enyunyi z'emalunga. Bulala ntyo ku Nyamuzinda aderhere. ¹² Omulebi Ahiya abwira oyo muka Yeroboamu ntya : Nawe,oyumuke,oj'emwawe. Hanohika omu chishagala ntya,oyo mwana anafa. ¹³ Aba Israeli boshi bamulakira,bana muhamba;yenine w'omu mwa Yeroboamu wahambwa bwinja,bulala yenine yi Nyamuzinda Namahanga waba Israeli abwene oli nk'okwirire m'obo buko. ¹⁴ Nyamuzinda ayimika owindi mwami omu Israeli.Oyo mwami yi wahungumula ab'omu buko bwa Yeroboamu boshi olo lusiku. Karhali bibinahikirire bunola ? ¹⁵ Nyamuzinda nji ahana aba Israeli,nji abadunda dunda nka lusheke luli lwadundagana omu lwinji,nji abanyaga chino chihugo chikwirire ahaga bashokuluza babo,nji anabashandaza oku shiriza z'olwinji lunene lwe Efurati luba e Babeli,bulala bachulire eshushano barherekera nka namahanga wabo,bagayisa Nyamuzinda. ¹⁶ Nji aleka aba Israeli eri bilala byaha Yeroboamu ajiraga byarhuma,n'ebyanarhumaga aba Israeli bagoma. ¹⁷ Muka Yeroboamu ayumuka,agenda,Ahika e Tirisa;n'okw'anaja omu nju ntya,omwana afa. ¹⁸ Baji muhamba,n'aba Israeli boshi bamulakira,nka kulala Nyamuzinda ana derhaga omu bunu bw'omulebi mukozi,wage Ahiya. ¹⁹ Ebindi bijiro Yeroboamu ajirire,biyandikirwe omu chitabu chebya kazagiba ch'abami b'omu Israeli.Omola mubayandikire entambala akazagilwa n'okuntu akazagirhambula mo. ²⁰ Yeroboamu arhambwire myaka makumyabiri n'ebiri,afa,omugala Nadabu ayima ahali hage aba mwami. ²¹ Amango Roboamu mwene Solomono ayimaga omu bwami bwe Yuda,aligwerhe myaka makumi mane na muguma. Arhambula omu chishagala ch'e Yerusalemu myaka ekumi na mushanvu,che chishagala Nyamuzinda achishogaga omu chihugo choshi ch'aba Israeli mpu aleme ayerekaniramo okuba kwage. Nyina ali hamagerwe oku zino lya Naama we Amoni. ²² abantu be Yuda bagomera Nyamuzinda;bamugayissa n'ebyaha kulusha nk'oku bashokuliza babo bamugayisaga. ²³ Nabo,bachiyumbakira emperero z'eshushona n'enterekero,baziyimanza oku ngasi ntondo,yaliri kw'emirhi ya ngasi lubero. ²⁴ Chiro n'abandi balema bajira enterekero z'obubaraga omu chihugo. Abantu be Yuda bajira ebishologosize kuguma na balala bantu Nyamuzinda ahigaga n'echo chihugo amango achihiraga omu ba Israeli. ²⁵ Eri Roboamu amala myaka erhano y'oburhambuzi,mwami Shishaki we Misiri,arhera abantu be Yerusalema. ²⁶ Arhola ebikulo byaliri omu kanyamuzinda n'ebyanaliri omu bwami byoshi. arhola zilala mpenzi z'ehoro zoshi mwami Solomono achulisaga. ²⁷ Mwami Roboamu ajira ezindi mpenzi z'ebyuma by'amarhale zaja ahali hazilala z'ehoro,azihereza abakulu b'enfola miherho bakazagilanga oburhwali. ²⁸ Ngasi mango eri mwami akajire omu kanyamuzinda,abalanzi banaheke ezo mpenzi,n'eri akabere amarhenga mo,banazigalula ahazinabera omu busika bw'abalanzi. ²⁹ Ebindi bijiro Roboamu ajirire,n'ebyakolere byoshi,kebyo birhayandikirwe omu chitabu l'ebya kazagiba ch'abami be Yuda ? ³⁰ Roboamu na Yeroboamu balemaga balisa ngasi mango. ³¹ Roboamu afa,bamuhamba omu shinda za bene babo omu chishagala cha Daudi. Nyina alihamagerwe Naama w'e Amoni.N'omugala Abiya arhambula ahali hage aba mwami.