¹ Mo n'nyanga si baeki na ko bakameya Mbali ke ba ena:"Nani uka mopheme mo bokota ya kiyo?" ² Mbali na koeta maana manuke omo ke wata-we n'nkati yabo, ³ eke wa ena:" Na enake nino mo liti, aika m'mba bite kalanganye na ko timboka m'mba baana banuke, bite ka n'ngeya a bino mo bokota ya kiyo. ⁴ Na boobo, nani osela m'mba maana manuke sioyo wekaiki moto wa ema mo bokota ya kiyo. ⁵ Na woose si owa woopokea mo lina ane maana manuke m'mba oono, wa pokeake noo mune. ⁶ N'ndi aika m'mba owa wo okelesa omo wa baso baana banuke beyakowe noo, eengame bakande we mo ome ya iwe mo ikoti na ko m'mbola we n'nkati ya iyaba. ⁷ Tchombo mo tchese bondiya ko seyama si kono! Bondiya eengamei ko beya si kono kale, n'ndi tchombo ka moto si owa wo koisa tchambo si tcheetcheno! ⁸ Aika m'mba kaako kabe awo kae kabe ko koisa owe mo kobeya, buka ko ke we m'mbole ko kpaaya nabe; ephoei kowakabe ko n'ngeya mo bokota na kao kamo ango kaako kamo kuliko koika ko ika na mao mabe na maako mabe eke maili si oko m'mboleka mo kaya ka laya-laya (kaya ka ko kanga kolima). ⁹ Aika m'mba liiso yabe yaika ya ko kokelesa owe kutowa yo eke m'mbola yo kpaaya nabe; ephoei kowakabe ko n'ngeya mo bokota na liiso emo, kuliko ko ika na mabe eke na ko m'mboleka mo kaya ka motoni. ¹⁰ Itephoe bande koseka ango omo mo bano baana banuke; bondiya na enake nino ba kitomo babo bo o monangai n'su yoose tchondi tcha Tata owa uka kiyo. ¹¹ Bondiya mana moto wilei mo ko ondesa eya yelimene. ¹² Bo omonai booni, aika m'mba moto omo uka na mekoko miya, ke omo yabo yalimena, buande oko ekai nkama abowa na obowa kiyo na mekondi mo kiya kophanesana na omo si owa elimenei? ¹³ Eke wa mona yo, na enake nino mo liti, yo ko esai weome koliko nkama abowa na abowa eya italimenanga. ¹⁴ Mo boobo, yo buande ko ema ka Ise wino owa uka kiyo mo ko mona omo wa bano banuke ko limena. ¹⁵ Aika mbe nduku abe wata kobeya yaa eta we nkati wino bane babe. aika mbe wa m'ngba owe, wa ondesake we. ¹⁶ N'ndi aika m'mba utemgbe owe, tomba omo ama bato babe mbele bondi si ya endjekeleke mo ko eneka n'nkati ya bato babe ao basato si baa bo koika moo. ¹⁷ aika mbe wa eka ko m'ngba bo; ebesa kae Etanda; aika mbe wa eka ko m'mngba Etanda mona we mba mopakano, m'mba moto wa tchititi. ¹⁸ Na enake nino mo liti, eya yoose yookanda bane mo tchese yo okandeki kowa kiyo, bena yoose si eya yo okandowa bane mo tchese, yo okandoka-kai kooko kiyo. ¹⁹ Na enake nino ephe mbe aika babe n'nkati wino ba m'ngbesana mokoomba tchesima thcemo, yo koeselekeya ii bo na ise owa uka kiyo. ²⁰ Bondiya babe ango basato baa bo osongana mo linane, nika n'nkati ya bo. ²¹ Eke Petele wa bakameya we, ke wa ena:"Mokolo, mala inga neengame na komeseleya mana m'ma, aika m'mba wateleya noo ko beya? Eengami mala motchomoendi?" ²² Mbali na ko ena nande:"N'teeme nabe mbele mala motchomoendi, n'ndi bena nkama motchomoendi mala motchomoendi". ²³ Mo isina si, bokota ya kiyo yetuanyanyei na mokota omo yaemanga kobanda besima bande ko bato bande ba mokambo. ²⁴ Abowa aabandanga we, batomeya we ono waengamanga na kotomba lopata elfu ikomo. ²⁵ Bowa wita ikanga na tchesima tcha kolipa, mokota yande na ko ena mbe baolese we, we omune, mokali, bana bande,bena besima boose baika bande, mo kotungesa m'mbata. ²⁶ Moto wa mokambo na ko lubana ase mo n'seke, wa eya-eya nande, eke wa ena:"Mokolo, endesaa nane kambu, m'mba noolipa owe yoose". ²⁷ Wa m'ngbeya we tchombo, mokota wa moto si ooyo wa mokambo na ko eka we mbe waye, na ko meseleya we m'mbata. ²⁸ Abowa aekananga bo, moto si ooyo wa mokambo na kosangana na omo wa binakande wa ikanga na m'mbata yande ya miya omo. Wa kaesa we eke wakanda we mokose, na ko ena:"Lipa m'mbata yane". ²⁹ Munakande, na kolubana ase mo nseke, na kobondja bondja we, na ko ena:"Endeana nane kambu n'ndi nekalipai owe". ³⁰ N'ndi ooyo witaemanga ande, eke waya ko kanda we omoololo bena kowa wekalipa we m'mbata. ³¹ Binakande baphe, bamona eya yatelekake, bo na koika na obaba ya ema, baya ko ebesa mokota yabo yoose si eya ya telekake. ³² Eke mokota wa eta moto si ooyo wa mokambo ke wa ena nande:"Uki moto wa beya, neekeyei owe m'mbata yabe yoose bondiya waeya-eyangi nane; ³³ Itaengamanga nabe ko m'ngbeya munakabe tchombo bowa na m'ngbeleyanga owe tchombo? ³⁴ Ke mokota yande, waika na obaba, waaba we ko babuki ba maondi, bena kowa wekalipa m'mbata yande yoose. ³⁵ Boobo kai Tata wa kiyo wekatoi bane boobo, aika m'mba omo wino witemeselee munakande na motema yoose.