¹ Haho Boazi gugile u mchango, gushamine haya; na lola guya mtu gwa ibushi yage guya gwa alibu, guya mine Boazi gulisambile gulihuhita. Nage nuumgita. Lugu Gogwe uchwe. ushame hano. Nage nuuchwa na ushama. ² Hanyuma guguhile batu umi mmanga mwa baulu ba mbuga,gubasambile. Benywe na benweshamwe hano boo noo ushama hasi. ³ Boazi gumsambile guya mshiwabo gwa alibu, Gugu Naomi gugiwile hano uhuma sii gya Moabu, gwagucha iba ya lubala ibele ya mshiwetu , Elemeleki. ⁴ Na nene malanga manyi ii uusambila na gogwe, na uumanya, ulugule gogwe hambele ha bano bene bali hano na hambele ha baulu ba batu banyi. Nambo gogwe wilukombola, lukombolage; nambo ushilukombola uusambile yulu nene namane , bululi hashi mtu gwa ulukombola ii gogwe tu, hanyuma ha gogwe ii nene, nage gumgaile, nene nilukombola. ⁵ Haho Boazi helidogomine, Lusugu lolilugula luya lubala mmaboo ma Naomi wimgula na Luti nage byoka biya, gugu Mmoabu, mnage buo na guya mmu, bululi umginunine guya mmu china mnda buhyana bwage. ⁶ Haho guya mshiwabo mine gubele gwa alibu guganine, Nene nishiosha ulukombola nene buchima, nishichwe udogya buhyana bwanyi; Mndibiya bilingye nene ubikombola ubebiguha gogwe, yulu nene nishiosha ulukombola. ⁷ Bino noo gibele mishaminyi gya ba Isilaeli haya hala, bululi bwa ukombola na udagulanya, yulu ya uomenenya byose; mtu uchula mkalabanda gwage na uuma miinage; bibyo noo byababele hubangisiya inwa m'Isilaleli. ⁸ Haho guya mshiwabo gumsambile Boazi, Gogwe ubelugula. Gee noo uchula mkalabanda gwage. ⁹ Boazi gubasambile baulu na batu bose. Hano lino benwe noo mwamona byandagula byose bibele bya Elemeleki, na byose bibele bya Kilioni na bya Maloni, mmaboo ma Naomi. ¹⁰ Iyaka guno Luti Mmoabu, mmachi gwa Maloni, namgula uba mmachanyi, bululi naoshe umginunina mmu china na buhyana bwage, china lya mmu lishichimine m'bashiwabo, na ata u chango gwa mbuga, lino benwe mwalimonene . ¹¹ Na batu bose bene babele ha mchango, na baya bauulu, baganine Ehe, beswe twalimonena. Mlume na gammiteguno mmachana mine gwigingila mndu gyobe gabe nahi Laeli na gabe nahi Lea. Baya babili bene bagugae ndu gya Isilaeli. Na gogwe ugililwe m'Eflata, na uba mmanyiye u Betelehemu. ¹² Ndu gyobe gilingilishiwe na ndu gya Pelesi, wa gugo Tamali gum'butile Yuda, wa lubuto lwiuha Mlume uhitila guno mmchana. ¹³ Boazi numguha Luti,nage nuuba mmachage; nage nuugingila weeli, Na Mlume noo uuma bushito gee nuswala gumo, nage noo ulisacha mwana gwa mlumyana. ¹⁴ Na baya baachana bamsambile Naomi , na gaginunwe Mlume, gushimmuleele lino usili na m'buswa gwa alibu, china lyage na libe lyata mnda Isilaele.. ¹⁵ Nage gwiugiwidicha mwego gobe , na gwiulola u buungu bobe; bululi mma mwanobe, mine guubendiche, nage guwilila uhima baana njwii, gee noo gum'butile. ¹⁶ Haho Naomi gumguhile guya mwana , gumgubile m'yaalimwage, gee noo uchwa yaya gwage, ¹⁷ Na baya bachaanabene babele babinji nage bammele china baganine, Naomi gwabuta mwana; boo noo umgita china lyage Obedi; gee noo sage na Yese, Yese sage na Daudi. ¹⁸ Bino noo bibushi bya Pelesi; Pelesi gubutile Hesloni; ¹⁹ Na Hesloni gubutile Ramu; na Ramugee nubuta Aminadabu; ²⁰ Na Aminadabu ge nubuta Nashoni; Nashoni ge nubuta Salmoni; ²¹ Salmoni ge nubutaBoazi; Boazi ge nubuta Obedi Obedi ge nubuta Yese; na Yese nubuta Daudi.