¹ Ee MLUME, Abetcha a ulipisha, Abetcha a ulipisha, ugeme, ² Mine gulihuonona sii, uliginine, Ubahe bene bina unenuna bibalingye. ³ MLUME, ata mengo nai bene bashi na kiine, Ata mengo nai bebe bashi na kiine biseelela? ⁴ Wi wii! Bose bagila biibi bilwisha binywa, Na udogoma binywa bya ulimona, Na uita buhulihuli? ⁵ Ee MLUME, babasacha batu bobe; Babususula buhyana bobe; ⁶ Bahaga m'bwile na mgenyi; Bababisa mashige. ⁷ Nabo balihugana,MLUME gushihumona; Abetcha a Yakobo ashihulanga. ⁸ Benywe tohoso hawingi ha batu, langwe;Benywe bahugi, mengo nai mubi na lwenyi? ⁹ Mine gubiile litu lyage gashihuliche? Mine gubiile liso lyage gashimone? ¹⁰ Gulihuhugumbila mioga gashibaambile? Gulihumgigya mtu gashimane? ¹¹ MLUME gugidi malanga ma mtu, Uba byose ii bunene. ¹² Ee MLUME luhanga wa mtu guya golihuhula, Na umgigya wa m'bindo gobe; ¹³ Uoshe um'biiya masugu ma usona, Na ata mine gushi nakiine helidabilwa inaa. ¹⁴ Bululi MLUME gushibatele batu bage, Na gushibuleya buhyana bwage, ¹⁵ Bululi uonona wigiwicha kiine, Na bose bene bali bagolobu mitima biwenga. ¹⁶ Mnanyi mine gwigimana Wa bululi bwanyi yulu ya babii? Mnanyi gwimbwatilicha Yulu ya balihugila bisone. ¹⁷ Nambo MLUME gushisuba mbwatilicho gyanyi, Ichuli-chuliyanyi ya mwego wa abilo yabashama ihana ya pii. ¹⁸ Handiganine, Ugulu wanyi washebutuwa; Ee MLUME, yano yobe ingegamye. ¹⁹ Mnda mwa malanga mengi ma mtima gwanyi, Mmungyo gobe gwaseelecha mtima gwanyi. ²⁰ Wi wii! iti ya batu balihumonena ibi hoka none, Ili husulula usona wa ndila gya m'bindo? ²¹ Balihumonena ichuli-chuli ya mwego ya mtu gwa kiine, Na uonona mashi mashi na ibalo. ²² Bino MLUME gusili mmao gwanyi, Na Abetcha anyiliwe lya lyata lyanyi lya usinina. ²³ Nage gwibagiwidichia usona wabo, Gwibachimya mnda bubii bwabo, Ehe, MLUME, Abetcha etu, gwibachimya.