² Benywe mulihugimana mndu mwa MLUME, Mmibanja ya ndu gya Abetcha etu. ³ Mtonywe MLUME bululi MLUME ii msoga,Ligimbwe china lyage bululi mlibenju. ⁴ Wa ibalo MLUME gwalisobolela Yakobo, Na Isilaeli,babe batu bage asa. ⁵ Bululi nigidi nene ugana MLUME imata, Na Mlumyetu guli hegulu ha miishi gyose. ⁶ MLUME guitile yoyose yine yelibendiche, Mnda gulu na mnda sii, Mnda bahali na mnda mabenda mose. ⁷ Gee noo gususecha imundimundi uhuma masunga mose ma sii; Guswitila mbula ahenyuhenyu; Husuhunya mnaga mnda bushamo bwage. ⁸ Gubahagile babuswa batangi ba Misili, Ba batu na ba nyama. ⁹ Guhilile bisaga na bigagicha hawingi hobe, Ee, Misili, Hegulu ha Falao na bagichi bage bose. ¹⁰ Gulwile na mioga gingi, Na gumahagile maoolo mabele na uoma; ¹¹ Sihoni, oolo lya Baamoni, Na Ugo, oolo lya Bashani, Na maoolo mose ma Kanaani. ¹² Guhanene ibaloo yabo ibe buhyana, Buhyana bwa Isilaeli batu bage. ¹³ Ee MLUME, china lyobe ii lya milumbu, MLUME, uengelecha obe iwa ibushi ata ibushi. ¹⁴ Bululi MLUME gwibasunga batu bage, Gwibamonena keene batu bage. ¹⁵ Miishi gya mioga ii bumona na nolo, Mgilo gwa maboo ma batu. ¹⁶ Gyina tunywa mndi gishi badogoma, Gyina meeso gishibamona, ¹⁷ Gyina matu nagyo gishibahulicha, Na gishi na luhuda mtunywa twabo. ¹⁸ Bene baligilongya bihwanana nagyo, Na gegese gulihugiudagila. ¹⁹ Benywe babuswa ba Isilaeli, Mumginune MLUME; Benywe babuswa ba Haluni, mumginune MLUME; ²⁰ Benywe babuswa ba Lawi, mumginune MLUME, Benywe mulihumnyemya MLUME, mumginune MLUME, ²¹ Na gaginunywe MLUME uhuma Sayuni, Mshame Yelusalemu. Haleluya.