¹ Haho habele, Senbalati helihulicha ugana tubele hugubaa lukuta, guchigililwe, gugingilwe na sungu chiingi, gubasebulule Bayahudi. ² Guganine umbele wa bashiwabo na umbele wa basolokoto ba Samalia, guganine,Bayahudi bano tulema balihugila wi! Wiw wii! Bilugubaila mgumbo? Bitangila lutangi lwa nyama? Nambo bihwa wa lusugu lumwechi? Wi wii! Bihulula mawe mnda gina mitala gya bibunduguchu, namo machigiwe wa aahya? ³ haho Tobia, Mmamoni,gubele hoka nage, guganine, Ata ino yabalihugubaa, m'bwabwa gwabachina, gwababele ibambacha yabo ya mawe. ⁴ Hulicha, Ee Abetcha etu, bululi twanenunywa; ubagiwidichie ugiluchaa wabo hegulu ha miswe gyabo, ubahanane bawaswe kole mnda sii byubululwa; ⁵ na ushiubise usona wabo, na ushichime buubi bwabo, umbele obe; bululi buuchigilicha u mbele wa baya bene balihugubaa. ⁶ haho tugubae ibambacha; nayo ibambacha yose ilungilwe nahi ihindi ya ulaha wage; bululi batu babele na mtima gwa ugila mgilo. ⁷ haho habele, Sanbalati, na Tobia, na Baalabu, na Baamono, na Baashdodi, habhuliche ugana mgilo gwa ulongya bibambacha bya Yelusalemu gulihugililila, na ihana ibele ibelebu yahutulwa uchibwa, biino, bachigililwa abisa. ⁸ bahungile bose hamwechi uchwa ulwa na Yelusalemu, na ugila bya usubula mmo. ⁹ Haho beswe tumsabile Abetcha etu, iyaka tubiile balochi, mchuba na m'busugu, yulu yabo, bululi ya ubachibila. ¹⁰ Baganine, Yuda, Uoma wabo baswachi ba michigo wagongohowa, na bibunduguchu biliho bee; tushioshe ugubaa ibambacha. ¹¹ Nato tumangu twetu tuganine, Bashimana, na bashimona, hatwichwa hawingi habo, na ubahaga, na usungya gugo mgilo. ¹² Hanyuma habele, Bayahudi habachwile, baya bene babele hoka nabo, batusambile nyendo umi, Uhuma bihana byose byamwigiwila bitususula. ¹³ Bibyo nibiile batu, ihana ya hasi yine ibele unyuma wa lukuta, ihana yine ibele hululu, ulamana na milongo gyabo,nibabiile bina tuhilu twabo, na masumo mabo, na mata mabo. ¹⁴ Nilolile, nigimene, nibasambile bauulu, na baata ba ihwilo, na bange batu bene bashigele, Mushibamone booba; engelechiwe MLUME, gee noo mmata gwa mine gususinywa, mubalwile bashiwenyu, na baana banyu, na misiha gyenyu, na baachi benyu, na madu menyu, ¹⁵ Hanyuma habele, tumangu twetu hatuhuliche ugana twahuhwa uhulicha mwano, na uga Abetcha agalula mihungo gyabo, haho beswe bose tugiwile wibambacha, kila mtu u mgilo gwage. ¹⁶ Haho utula mamo mengo, bamwe bagichi betu bagilile u gugo mgilo, na bamwe babo bawashile masumo, na ngabo, na mata, na ngabo cha byula bya miti, na bilume pambwa bibele unyuma ndu gyose gya Yuda ¹⁷ Baya batu bene bagubaile lukuta, na baya bene baswalile michigo, baliswiiche boo bene, kila mtu gugilile mgilo wa uboo umwechina uboo wage wa bubili uwashile alume gela age. ¹⁸ nabo bagubai babele kila gumwechi gubele na ahilu age, ahambwe mlubachu mwage, noo byeligubae. Na guya gubele hugila asiba gubele hika nanyi. ¹⁹ Nibasambile baulu, na baata ba mmihwilo na bange batu; Mgilo guno mgwiingi, iyaka mgwata, beswe twahalingana hegulu ha ibambacha, kila mto guli koo na gunge nage. ²⁰ biino ihana yoyose yine yamwihulicha liidi lya asiba, giwe ubo, utulwila, Abetcha etu itulwila. ²¹ Haho tulibiile mnda gugo mgilo; na bamwe babo bawashile masumo, utula umayaya ndaa na byitobowa tumbala-mbala. ²² Byoba biya, mengo moka maya, nibasambikle batu, kila mtu gashame mnda Yelusalemu hamwechi na mgichi gwage, bululi babe balochi betu mengo ma busugu, na ugila mgilo mengo ma mchuba. ²³ Haho nene, na bashiwetu, na bagichi banyi, na batu ulola bene babele hundama, tushichulile bichwalaganywa byetu ata myu gumwechi; mtu gegese mine gugile utaha maadi guguhile alume gela age.