1 Haho baya batu batatu baleile umdogomya Ayubu, Bululi gubele na kiine u meeso mage gee mine. 2 Haho noo halamine sungu cha gugo Elihu mwaana gwa Balakeli, Mbuzi, mnda ibushiya Lamu, yulu ya Ayubu, wa bululi gubele mlihebe kiine gee mine uhima Abetcha 3 Iyaka sungu chage chibele yulu ya baya ba magenda bage batatu wa ibalo bashipashile binywa bya umgaa, yulu bammononine Ayubo wa buubi. 4 Bibyo gugo Elihu gubele huhemba yulu gagombole na Ayubu, bululi baya bange babele baulu ummima gee. 5 Haya Elihu helimonine ugana hashi ugawa wa osoga mnda tunywa twa babo batu batatu, sungu chage chilamine. 6 Haho Elihu mwaana gwa Balakeli, Mbuzi, gugaile, naudogoma, Nene niili mwalubaga, na benywe muli miungu abisa; Wabibyo nilichibile, nashioshe uummonya byandi humona. 7 Niganine, Bilingye masugu madogome, Na bwiingi bwa myaa bugigye lwengu. 8 Biino gulimo mtima mnda mwa mwana gwa mtu, naluhuda lwa Dambe luli hubaha lwenyi. 9 Bashi maata noobali na lwenyi, Na bashi miungu noo gili na humana uonona. 10 Biino nignine, Pulichiwe nene; Nene nimmonya byandihumona. 11 Loolwe, nihembile binywa byenyu, Niliteamanye, nahuliche bili mnda mwenyu, Haya handiengile yine yamwidogoma. 12 Ehe, nimmuliche benywe, Na loolwe, hashi ata gumwe gwenyu gummimine Ayubu, Na ata gwa ugaa binywa byage,hawingi henyu. 13 Liuswe mushidogome, Beswe tuli na lwengu; Abetcha hange ammimine, gushi mtu; 14 Bululi gee gushinabihila binywa byage wandi; Na nene nishimgaa yulu y binywa byenyu. 15 Mabagilwe, bashihugaa iyka; Bashi na inywa ya udogoma. 16 Na nene, wi wii! Nahembe, bululi bashi hudogoma, Wa bululi bagimana pii ka, nabashi hudogoma iyaka. 17 Na nene nidogoma lwanyi luubi, Nene na nene nimonya byandihumona. 18 Wa bululi nagilulwa na binywa; Mtima gyine guli mnda mwanyi guli hutundumuna. 19 Loolwe, gumo lyanyi lilinahi divai lyine lichibilwe; Nahi bichindi bya bihya lili hoka na ubeleya. 20 Nidogoma, yulu nalihoche; Nibulula milomo gyanyi na ugaa. 21 Ibumbu ino, nashigegamine yenyi ya mtu; Na nishilibiya ulimtu ge gese gamenje. 22 Yuluyai nene nishigidi ugila bya mtu gamenje; Ata M'bumbi gwanyi gwabapunya wa abilo.