1 Chigilwe haliiina isudabwa lufeza, Na ihana yabasumona nolo chine chabasuhahacha. 2 Igela isudabwa mnd bitete, Na mmubo gususumbululwa u mawe. 3 Mtu gususungya mdoo; Gusuenga-enga ndaa na ulugumba lwine luli koo, Mawe na mdoo gwata, mdoo gwa bunene. 4 Gusudaba iina koo na bushamo bwa batu; Gusugubililwa na maasa mene mali huhita hoo; Gusudembelela koo na batu, Gusulugila-lugila uya na uya. 5 Mnda bitete noo musuhuma biliwa; Na hasi hage noo hasutipulwa nahiwa aahya. Mawe mage noo ihana isumoneya yakuti; Nayo ina iisee ya nolo. 7 Giya ndila hashi inonyi ya buhuchi igigidi, Ata liiso lya loochi lishi nagimona; 8 Byiila bya buhuchi byulinona bishi nagigyatila, Ata tambwe gya buhuchi gishinagihitila. 9 Gusugolwela uboo wage liwe lya lyata lya menga mailu; Gusutipula koono ndaa na mishingi gyage. 10 Gusugeda mivule hawingi ha mawe ma mata; Na liiso lyage lisumona mioga gyose gya mawe mene masugulwa na bomona libaliba. 11 Gusuchiba misula gishichuwe maadi; Na itu yibisame gusuibisula. 12 Biino lwengu luli humoneya uhi? Na ihana ya umana ili uhi? 13 Mtu gushiligidi bili bwata bwage, Na ushi humoneya mnda sii gya bene bali na mwego. 14 Mabenga malihugana, ushimo mnda mwetu; Na bahali lilihugana, ushi wandi. 15 Bushibamoneya ya nolo, Ata wa lufeza lushinalibanga uba bwata bwage, 16 Bushinaoshiwa ubiwa nahi ugulwa wa nolo na Ofili, Ata shohamu cha ugulwa bumona bwiingi, ata yakuti ya imanjani. 17 Nolo na gyulilingamina wa bili bishinalingilishiwa nayo; Ata ugalulanya wage ushibi wa bitundu bya nolo cha chihaha. 18 Bishilumbulwa lufezaluka ata bilauli; Ehe, ugulwa wa lwengu uli uhime anyanda. 19 Yakuti ya langi lya imanjano ya sii gya Kushi ishilingilishwa nalo, Na lushibiwa ugulwa nahi nolo cha chihaha. 20 Biino lwengu lwahuma uhi? Na ihana ya umana ili uhi? 21 Bululi lwabiswa koo na meeso ma bose bene bali na mwego, Na ubiswa u tunonyi twa ha hululu. 22 Ludogya lwa Lubu lulihugana, Tuhuliche mwano gwage u maatu metu. 23 Abetcha noo agidi ndila gyage, Nage gugidi ha ihana yage. 24 Bululigusulola ndaa na isula ya sii, Na umona hasi ya gulu lyose. 25 Gaoshe uguitila mnaga bushito bwage; Ehe, gusulingilila maadi wa bulingililo. 26 Haho helibiile mbula alago, Na ndila gya ahenyuhenyu a kuba. 27 Noo helilumonine na ulugana; Gulumoninye, ehe, na ulutonda. 28 Hanyuma gumwamsile mwana gwa mtu, Loola, umnyemya MLUME noo lwengu, Na ulibagula na usona noo umana.