¹ Hanyuma Ayubu gugililile na mihingu gyage, na ugana, ² Nambo bili Abetcha anyi na mwego, mine gupuminye kiine gyanyi; Gugo Gwuoma ose mine gususule ichuli-chuli yanyiya mwego; ³ (Bululi mwego gwanyigwili poo mnda mwanyi, Na mtima gwa Abetcha mnda mihyembe gyanyi;) ⁴ Chigilwe milomo gyanyi gishidigoma bishi bya kiine, Ata na lulimi lwanyi lushidogoma bya lulimi. ⁵ Nangu! Nishim'bala benywe uba na kiine; Na byandiwa nishilihuminya bya winene byanyi. ⁶ Kiine gyanyi nagiwata abisa, na nishigileya; Mtima gwanyi gushingilucha mengo ma ndili na mwego. ⁷ Amangu anyi na abe nahi guya mtu msone, Na ge gese mine gwingimena asingili wandi na gabe nahi gushi na kiine. ⁸ Bululi maudagilo ma mtu m'bii iyii, inangwa gunaliha alambwe, Haya hene himmuminya Abetcha mtima gwage? ⁹ Wi wii! Abetcha gwihulicha lilolyage, Asusu haimchwila? ¹⁰ Wi wii! Gwiseelela yulu ya Guya Gwoma ose, Na ulilingilisha na Abetcha mengo mose? ¹¹ Nimgigya benywe bihisho bya oboo wa Abetcha; Biya byine bili wa Gwuoma ose nishi bibisa. ¹² Loolwe, benywe bose mwabimona ; Yulu yai mulihudogoma byine bishi bya kiine. ¹³ Ino noo iba ya mtu msone uhuma wa Abetcha, Na buhyana bwa baya bene bali humonenana, basuhewa na Gwuoma ose. ¹⁴ Baana bage babebula iwa ahilu; Na babuswa bage bashigyuta iliwa. ¹⁵ Baya bene bishigala weli bichiwa na lubu, Na bawile bage bene bawililwe na balume bashibiya malilo. ¹⁶ Gwinaongola lufeza nahi ihwili, Na uliitila bichalaganywa nahi bitetewa bwiingi; ¹⁷ Inangwa gunabilongya, biino bene balina kiine noo bibichwala, Nabo bene bashi na abachi bigabula luya lufeza. ¹⁸ Gee gusugubaa ndu gyage nahi ichimu, Nahi itula-tula isuita mlochi. ¹⁹ Gee gusulala ugana ii mona, mndi iyo noo isula; Gusubulula meeso mage, nage gushiho. ²⁰ Byudidibula byam'banga mahi maadi meengi; Mabimbi mamgiba m'busugu. ²¹ Mnaga gwa mlugulu gwamguha, gahume ha ihama yage. ²² Bululi Abetcha gwimtela, gushimmonena keene; Gwabaunda uusina uboo wage. ²³ Batu bimtela kwasa, Na umshiga yoga gahume ha ihana yage.