¹ Haho Ayubu gugaile, na udogoma, ² Nahi biya byoli m'bwatiliche guya gushi na uosha! Nahi biya byoli hogonone uboo wine ushi na uoma! ³ Nahi biya byoli mlangulule guya gushi na lwengu! Na ulingamina bumana bwa winene wa bwiingi! ⁴ Wi wii! Wadogoma binywa uli nanyi? Hanyuma ii mtima gwa nanyi guhumine oli? ⁵ Baya bene bawile balihudanda, Hasi ha maadi nabo bali humashamina. ⁶ Sinda lili hululu u mbele wage, Ugugila nao ushi na ichindi. ⁷ Gee gusuganda mnaga gwa uhuma luubi lwa uboo wa uachi na mlugulu nauguhila wihana yine ishi naitu, Na usundiya ibaloo henehashi atu. ⁸ Gusuhamba maadi mage mnda matimba mage ma bushito; Na lilyo timba lishibabeleya luubi lwa hasi hage. ⁹ Gusubisa yenyi ya isuba yage ya buoolo, Na uganda timba lyage hegulu hayo. ¹⁰ Gubiile nyiimbo uba lugumba lwa maadi, Ndaa na haya lweenge na mdoo habiligabulile. ¹¹ Bihanda byagulu bili hudanda, Na ugagilwe wa uambila wage. ¹² Gususubula bahaliwa uosha wage, Gumnogile Lahabu bihindi-bihindi yulu ya lwenyi lwage. ¹³ Lilyo gulu lili hutogolwa wa mtima gwage; Uboo wage ulihugitunga ndowa gyine gilihugya abilo. ¹⁴ Loola, gino mmibimbi ka gya madila mage; Na bya gili macho macho tung'eneng'ene twatuli huhulicha yuluya mwano gwage! Biino uukula wa uosha wage mnanyi gunaosha uumana nao?