¹ Binywa bya Yelemia mwaana gwa Hilikia, gomwe gwa bibuli bibele Anathothi, mnda sii gya Benyamini; ² guya inywa ya MLUME imchwilile ha masugu ma Yosia mwaana gwa Amoni, oolo lya Yuda, ha mwaa gwa umi na butatu gwa uhyilila wage. ³ Iyaka ichwile masugu ma Yehoyakimu, mwaana gwa Yosia, oolo lya Yuda, ndaa na isula ya mwaa gwa umi na gumwechi gwa Sedekia, mwaana gwa Yosia, oolo lya Yuda; ndaa namengo mene hagiwashilwe kole Yelusalemu, ha mwechi gwa butano. ⁴ Inywa ya MLUME ichwilile, ugana, ⁵ Hambele nishinaubumba mnda gumo niumanine, na hambele ushinahuma mnda mwa mnobe, niuhahache; niubiile ube mbuwa gya mioga. ⁶ Hahao handiganine, Aa, Mlume ABETCHA! Loola, nishinaosha udogoma; bululi nene nilii mwaana. ⁷ Haho MLUME gusambile, Ushigane, Nene niili mwaana; bululi wigya uli mtu gegese gwandiuhila weli, na gogwe widogoma inywa yoyose yandiusambila. ⁸ Ushimone booba wa yulu ya babo bululi nene nili hamwechi nobe nuuhogonone, MLUME gwagana. ⁹ Bibyo MLUME gugolwele uboo wage, nuukuda wanywa anyi; MLUME gusambile, Loola nabiya binywa byanyi mnda anywa obe; ¹⁰ lingamina, nuubiya lino hegulu ha mioga na hegulu ha maoolo, yulu ya uchula, na ubela, na udogya, na udiga; yulu ya ugubaa na uuna. ¹¹ Iyaka inywa ya MLUME injwilile, ugana, Yelemia, wamona ii? Niganine, namona chigi lya mlozi. ¹² Haho MLUME gusambile, Wamona bosoga, bululi nilihuilola inywa yanyi, yulu naiwiliche. ¹³ Inywa ya MLUME injwilile lwendo lwa bubili, ugana, Wamona ii? Niganine namona lweso lwine lwina maadi mamabichu, na mlomo gwalo gulihulola luubi lwa uboo uachi. ¹⁴ Haho MLUME gusambile, Uhuma luubi lwa uboo wa uachi buubi bwichwa, na ubabanga batu bose bene bali bashame mnda gino sii. ¹⁵ Wa bibyo, loola, nigigita milongo gyose na maoolo mose ma luubi lwa uboo wa uachi, MLUME gwagana; nabo bichwa na ubiwa mtu gegese iti yage ya buoolo ha ihana ya bugingililo u michango gya Yelusalemu, na ulola bibambacha byage ngubi chose, na ugyau mabuga mose ma Yuda. ¹⁶ Na nene nigana yulu ya uonona wanyi wa yulu ya mwano gwa buuli bwabo bose; bululi bashiga nene, na utambikila lutangi u tubetcha tunge, batambikile migolo gya maboo mabo boo bene. ¹⁷ Bino mndi, gogwe ulihambe mlubunda, wachuwe wabasambile binywa byose byandiusambile; ushiwe iduba wa yulu yabo, nashichwe uumonya iduba gogwe u meeso mabo. ¹⁸ Bululi, loola, nuita lino uba mbuga gyina mgumbo, na ihanda ya igela, na bibambache bya lusuu, hegulu ha sii gyose; hegulu ha maoolo ma Yuda, na hegulu ha bauulu bage, na hegulu ha biboli byage, na hegulu ha batu ba gino sii. ¹⁹ Nabo bihulana nobe; ata bibyo bashiuhima; bululi nene nili hamwechi nobe, gwagana MLUME, yulu nuuhogonone.