¹ Mwechi gwa njwii, masugu maumi mopi na lumwechilwa mwechi, inwa ya Mlume ichile wa anwa a Hagai mbuwa, ugana. ² Ubedogoma na Zelubabeli, mwana gwa Shealtieli, mlochi gwa Yuda, na Yoshua mwanagwa Yehosadaki, ibuli ya yata, na bibyo bisunga bya batu ugana. ³ Hawigi henyu ii nanyi gushigele mine gumonine ugengeda wa gino nduu wa utangi? na benwe muli hugimona wii hano? Wii ! U meso menyu, ati nahi ushi atu? ⁴ Bino mndi ube ilume pambwa,Gogwe Zelubabeli Mlume gwagana, na gogwe ubeilumepambwa, Gogwe Yoshua mwanagwa Yehosadaki, ibuli ya yata, na benywe mube bilume pambwa ,batu bose ba gino sii,Mlume gwagana; mwagile mgilobululi nene nilihamwechi neenyu, gwagana Mlume gwa bilume pambwa. ⁵ Wa iyainwa handilagene nenyu hamuhumine msii gya ba Misli, na mtima gwanyi guli gushame hamwechi nenyu, mushiwe iduba ⁶ Bululi Mlume ilume pambwa gwagana bino; Lwendo lumwechi iyaka, ii mengo macho ka, nene nidigicha lilyo gulu, na ino ibaloo, na bahali na mibega gyose. ⁷ Na nene nidigicha mioga gyose, na bitu byose byine bilihubenjiwa na mioga gyose byichwa; na nene nigilucha gino ndu ugenguda, Mlume gwa bilume pambwa gwagana. ⁸ Bitundu ii bunona bwanyi, na nolo ii bumona bwanyi,gwagana Mlume gwa bilume pambwa. ⁹ Bugengeda bwa isulabwa gino ndu bubi bwati uhima ugengeda wage wa utangi, gwagana Mlume gwa bilume pambwa; na wi ino ihana niima talala, gwagana Mlume gwa bilume pambwa. ¹⁰ Lusugu lwa maumi mopi na mana ma mwechi gwa yahabula, m mwaa gwa bubili gwa Dalio, inwa ya Mlume ichile mmanwa mwa Hagai mbuwa ugana. ¹¹ Mlume gwa bilume pambwagwagana bino; Babuchiwe hano babibuli yulu ya mwano gwa m'bindo, mwi hugana; ¹² Mtu gabeguha nyama cha chihaha u pindo gya bichwalaganywa, nage gabeuda u pindo gyage na mkate, ao bugali au divai, ao mauta, ao iliwa yoyose, wii ! Iyo ibya ibi ihaha? Babibuli bagaile, baganine nangu. ¹³ Haho Hagai guganine, Nambo mtu gwahulibiya bunyenyewa uuda mtando gwa lubu, gwahuuda imwe itu yoyose, Wii ! ibi ya bunyenye? Babibuli baganine, baganine ibi bunyenye. ¹⁴ Haho Hagai guganine, Bibyo noo byabali bano batu, na bibyo noo bili guno mmoga umeso manyi, gwagana Mlume, na bibyo noo bili migilo gya maboo mabo; na iyo itu ibehanwa lutangi ibi bunyenye. ¹⁵ Bino nilihumsaba; langwe; utla luno lusugu na masugu mahitile; utula haya hene hashibele nabiwa liwe hegulu ha liwe u ndu gya Mlume; ¹⁶ Ha mamo mengo mose, mtu heli hiila bilego maumi mabili, habele na bilego umi kaa, ma mtu gabehia habudendelo bwa malwa yulu gatahe divai m'bilego maumi matano, habele na bilego maumi mopi bya divai. ¹⁷ Nibahulile wa chuba ligumu, uhulwaa imundi-mundi, mbula gya mawe, wa migilo gyenyu gyose gya maboo menyu; ata bibyo mushinjililenene; gwagana Mlume. ¹⁸ Laangwe; nuhumsaba, utula chuba lya lino na masugu michwa; utula masugu maumi mopi na mana ma mwechi gwa yahabula. Ehe, utula iya chuba libiilwe mshingi gwa lubunga lwa Mlume langwe bibyo. ¹⁹ Wii ! biguma byili mmahombo? Ehe, gugo mzabibu, nambo mtini, wala iokole, wala mzeituni, bishihuha atu, utula liino ni mmalila mihaa. ²⁰ Hanyuma inwa ya Mlume imchilile Hagai lwendo lwa bubili,masugu maumi mabili na mana ma mwechi. ugana. ²¹ Dogoma na Zelubabeli, mlochi gwa Yuda, ugane, nidigicha gulu na sii; ²² Na nene nibindula isuba ya buoloo, nanidogya uoma wa maolo ma mioga; na nene nibindula tubili-bili twabo, na baya bali hutuchina mnda mwato, farasi na baya bene balihuchina biigwa hasi; kila mtu wa wigi wa ahilu a mshiwabo ²³ Ha maya masugu, gwagana Mlume gwa bilime pambwa, niuguha gogwe, Ee Zelubabeli, mgichi gwanyi mwana gwa Shealtieli, Mlume gwagana, na nene niuita ube nahi lupete lwa ubangisiya; bululi niusobole, Mlume gwa bilume pambwa gwagana.