¹ MLUME gudogomine na Musa, gumsambile, ² Basambile baana ba Isilaeli, ugana bagiwile na ugubaa bitula byabo mbele gya Pi-hahilothi, hawingi ha Migdoli na bahali, hoka na Baal-sefoni; mwishama umbele wagyo hoka na bahali. ³ Nage Falao gwigana yulu ya mwano gwa baanaba Isilaeli, bali huhubagana-hubagana mnda sii, luya lwanaganywa lwabachibila bashitobowe. ⁴ Nene nigubiya gugumu mtima gwa Falao, nage gwibalama hanyuma habo; na nene niliha ugengeda yulu ya Falao, na u basolokoto bage bose; na Bamisili bimana ugana nene noo MLUME. Bino bigila bibyo. ⁵ Oolo lya Misii libasambile ugana baya batu bahuhwa usina; na mtima gwa Falao, na mitima gya bagichi bage, gigalulwe uba igalu galu yulu ya babo batu, nabo baganine, M'yii ino ihisho yatwagila, wa ubalecha Baisilaeli bagye lwabo bashitugilile iyaka? ⁶ Falao gulongechiwe abili bili age, guguhile basolokoto bage hamwechi nage; ⁷ iyaka guguhile tubili bili sambi mtuba twine tosobolwe, na tubili bili tose twa Bamisili, na baulu ba basolokoto bashinine tubili bili tuto tose. ⁸ Na MLUME gugubiile mtima gwa Falao oolo lya Misili uba gugumu, nage gubalamine baana baIsilaeli; bululi baana ba Isilaeli bahumine wa buhuli huli. ⁹ Bamisili babalamine hanyuma habo, falasi chose na tubili bili tose twa Falao, na basolokoto bage bene bali bachine falasi, na bilume pambwa byage, nabo babangile bali bashame hoka na bahali, hoka na Pi-hahilothi, hoka na Baal-sefoni. ¹⁰ Na Falao helishenine, baanaba Isilaeli baginune meeso mabo, na loola, Bamisili balihuchwa mnyuma mwabo; bamwene booba abisa; baana ba Isilaleli bamlilile MLUME. ¹¹ Bamsambile Musa, Wi wii! Yulu hashibele nasenda mnda Misili utuhuminye uya yulu tuchwe uwa mlwanaganywa? Yulu yai watugilila bino, utuhunya mnda sii gya Misili. ¹² Ino inywa nooishi iyabyine yatuusambile uya Misili, tuganine, Tuleye tubagilile Bamisili? Bululi m'bisoga ubagilile Bamisili uli uchwa uwa mlwanaganywa. ¹³ Musa gusambile batu, mushione booba, gimanywe ka, mwamone uhugonona wa MLUME welimgilila lino; bululi babo Bamisili bamumonine lino mushibamona iyaka milumbu. ¹⁴ MLUME gwimmulanina benywe, benywe mwishama pii. ¹⁵ MLUME gumsambile Musa, Yulu yai ulihundilila nene? Ubasambile baana ba Isilaeli bagililile umbele. ¹⁶ Gogwe ginuna lubango lobe, wagolole uboo obe hegulu ha bahali, na uligabula; nabo baana ba Isilaeli bihita hawingi ha bahali bitete bigumu. Nene, loola, niita mitima gya Bamisili uba gigumu, nabo, bigingila na umlama benywe, nene niliha ugengeda uli Falao, na basolokoto bage bose, wa tubili bili twage na wa bachinyi bage ba falasi. ¹⁸ Na Bamisili bimanaugana nene noo MLUME, handihwa uliha ugengeda uli Falao, na tubili bili twage na falasi chage. ¹⁹ Hanyuma malaika ma Abetcha, gulombole hambele ha mwalo gwa Isilaeli, guchuwile na ugya unyuma wa wabo; na iya ihanda ya timba ichumine uya umbele wabo, yoo nugimana unyuma wabo; ²⁰ ihiile hawingi ya basolokoto ba Bamisili na mwalo gwa Isilaeli; haho habele na liya timba na guya mdoo, libahele lwenge mrngo ma busugu; na baya Bamisili bashibabangile babo na biyele busugu. ²¹ Musa; gugolole uboo wage hegulu ha bahali; MLUME guitile bahali liligabule unyuma wa mnaga gwa guomu guhuma mlugulu, na biyele busugu, guitile bahali uba bitete bta bugumu, maadi maligabule. ²² Baana ba Isilaeli bagingile mnda hawingi ha bahali u bitete bya bigumu; namo maadi mabele ibambacha lubi lwa uboo wa ulume na uboo wa uachi. ²³ Na baya Bamisili babalamine, bagingile nabo hawingi ha bahali, falasi chose cha Falao, na tubili bili twage, na bashinyi ba falasi bage, ²⁴ Hasibele mengo ma lwelo, MLUME gubalolile basolokoto ba Bamisili mnda iya ihanda ya aahya na ya timba, gubadidibuye basolokoto ba Misili. ²⁵ Gubihuminye bishigi bya tubili bili twabo, haho tugyatile wa ulibula; na Bamisili baganine, Na tuhinge abilo tugye umbele wa Isilaeli; bululi MLUME gulihubalwila, wa ugalwila Bamisili. ²⁶ MLUME gumsambie Musa, Golola uboo obe hegulu ha bahali,yulu maadi magiwile iyaka na ubaunina Bamisili, hegulu ha tubili bili twabi na hegulu ha falasi chabo. ²⁷ Musagugolole uboo wage hegulu ha bahali, na habuyele,bahali ligiwile wa uoma wage; Bamisili balembile usina umbele walyo; na MLUME gubachindiche koo babo Bamisili m'bwingi na bahali. ²⁸ Maya maadi magiwile maunie tubili bili na bachinyi ba falasi, ndaa nabasokotoka bose ba Falao bene bagingile mnda bahali hanyuma habo; gushishigele ata mtu gumwechi guuhona. ²⁹ Haho baana ba Isilaeli bagyatile u bitete bya bigumu hawingi ha bahali; mamo maadi mabele mibega luubi lwabo lwa uboo wa ulume na wa uachi. ³⁰ Bibyo noo bihogonone MLUME baana ba Isilaeli luya lusugu mmaboo ma Bamisili; Baisilaeli babamonine Bamisili wibamba wa bahali babaube. ³¹ Isilaeli gumonine guya mgilo gweligilile MLUME uli Baisili, bibyo batu bamnyeminye MLUME, na Musa mgichi gwage lulo lusugu.