¹ Bibyo machina ma baana ba Isilaeli bene bagingile Misili noo mano; kila mtu ma ibushi yagebene bachwile hamwechi na Yakobo. ² Reubeni, na Simeoni, na Lawi, na Yuda; ³ na Isakali, na Zabuloni, na Benyamini; ⁴ na Dani, na Naftali, na Gadi, na Asheli. ⁵ Na bichuli-chuli biya byose bya mwego byine bihumine mlubunda lwa Yakobo bibele bichuli-chuli bya mwego maumi njwii; na gugo Yusufu gubele masugo mage mose uya Misili. ⁶ Yusufu gee nuuwa, na bashiwabo bose, nabatu bose ba iya ibushi. ⁷ Na baanaba Isilaeli babele na lubuto lwiingi, na ubula abisa, na ubula uoma ; na giya sii gibele gibuchu na lwenge, gibele hululu gishibele nabatu beengi, boo noo bagigiluche wa abilo. ⁸ Haho haginyuwe linge oolo lya lihya uhyilila Misili, gushibele gwammane Yusufu. ⁹ Gubasambile batu bage, Lingalinywe, batu babaaana ba Isilaeli bali beengi iyaka bali na uona utuhima beswe. ¹⁰ Bino! Na tubagilile wa lwenyi, bashichwe ubula; iyaka habechwa bita, boo nabo bashichwe ulilunga na tumangu twetu na ulwa netu, na uhuma mnda gino sii. ¹¹ Bibyi babiile bagimenyi yulu yabo babasusule wa ubaswiya michigo gyabo. Nabo bamgubaile Falao mabuga ma ubiila tuhombo, Pithomu na Lamesesi. ¹² Wa ulamanana biya bya babasusule noo byababulile naugulilila udagalala.Nabo bachigililwe yulu ya baaba ba Isilaeli. ¹³ Bamisili babagidiche baana ba Isilaeli wa buhuchi; ¹⁴ baitile mwego gwabo uba bululu na migilogya gigumu; mgilo gwa luhembana gwa mabiliki, na mioga gyose gya mgilo gwa mabala; wamigilo gyabo gyose gyababagidiche gibele wa buhuchi kaa. ¹⁵ Hanyuma oolo lya ba Misili gudogomine na bagumba ba Baeblania, gumwe china lyage gubele hugiswa Shifla, na gwa bubili china lyage gugisilwe Pua; ¹⁶ guganine, Mengo mamwibusha mmachana gwa Ieblania na hamwimona bali huenga ubuta, uba ii mwaanagwa mlumyana, haho mmagwe, na uba ii mwaanagwa mmachana mlewe na mwego. ¹⁷ Bibyo babo bagumba babele humnyemya Abetcha, bashigilile nahi bibasambile guya oolo lya ba Misili, ata bibyo bababisile baya ba balumyana uba na mwego. ¹⁸ bibyo oolo gubagishile baya bagumba na ubabucha, Bululi bwai uhisha ini ihisho, na ubabisa baana ba balumyana uba na mwego? ¹⁹ Bagumba bamsambile Falao, Iyulu ya babo baachana ba Baeblania bashi nahi baachana ba Bamisili; bululi babo bali na uoma, nabo basubuta mgumba gushinahiya nage nuubuta. ²⁰ Bibyo Abetcha abagilile bisoga baya bagumba; na babo batu babulile abisa, bagililile na uba uoma wiingi. ²¹ Ibele ibalo baya bagumba babele humnyemya Abetcha, gubahele bubushi. ²² Hanyuma Falao gubasambile batu bage,guganine, Mwaana gegese gwa mlumyana mine gwibuswa mtelwe mmaahya, na mwaanagegese gwa mmachana mlewe na mwego.