¹ Bino noo binywa Musa byelibasmbile baana ba Isilaeli m'bwala mwa Yolodani mgala, uya Alaba libele hulolela Sufu, hawingi ha Palani, na Tofeli, na Labani, na Hazelothi, na Dizahabu. ² M lwendo lwa masugu umi na lumwechi uhuma loono lwa Holebu wa ndila gya loono lwa Seili ndaa na Kadesh-balnea. ³ Hagusubele mwaa gwa maumi mana, mwechi gwa umi na gumwechi, lusugu lwa lutangi lwa mwechi, Musa gubasambile baana ba Isilaeli nahi byose byelisambilwe na Mlume bibalingye; ⁴ Mlume helihwile ulwa na Sihoni oolo lya Baamoli, mine gubele hushama Heshboni, na Ogu oolo lya Bashani, mine gubele hushama Ashtalothi gyine gili mnda Edlei; ⁵ M m'bwala mwa Yolodani mnda sii gya Moabu, Musa helitulile uununa guno m'bindo, guganine, ⁶ Mlume, Abetcha etu, gutusambile uya Holebu, guganine, Byamushamine ha luno loono byahwa; ⁷ galuwe mutule lwengo lwenyu mugye sii gya koono cha Baamoli, na bihana byo byose byine bili hoka na haho, uya u Baalabu, na sii gya tubandagulu-tubandagulu, na uya Shefela, na Negebu, na wibega-bega, sii gya Bakanaani, na Lebenoni, ndaa na u lulo luudi lwa Lwata, luudi Flati. ⁸ Lingaminywe, nam'biila sii u mbele wenyu, gingilwe mugihyilile sii yulu ya Mlume gyelibalahile pa bamasenyu, Iblehimu, na Isaka, na Yakobo, ugana gwobaha na bibushi byabo hanyuma habo. ⁹ Na nene maya mengo nimsam,bile, niganine, Nishinaosha nene bushima umguha nene achiye. ¹⁰ Mlume, Abetcha enyu, ammitile mubule uba beengi, na benywe, lingaminywe, musili lino nahi mlingilisho gwa tumbala-mbala twa gulu wa bwingi. ¹¹ Mlume, Abetchaa bamasetu, na am'buche uba beengi nyendo uki uhima byamli, na ummalila mihaa, nahi byalilagile. ¹² Ninaosha wi nene buchima uguha tuhonasonga twenyu, na michigo gyenyu, na tususu twenyu? ¹³ Liguhilwe batu hawingi henyu bene bali na lwenyi na malango, batu ba bamanyiye, ulamana na bilongo byenyu, nene ninibaita babe miswe hegulu henyu. ¹⁴ Benywe mwambuche, mwasambile, Ikoko yoliganine yawagila myisoga beswe tuyiite. ¹⁵ Bino nigihile batu miswe gya bilongo byenyu bene bali na lwenyi, babamanyiye, nibabiile babe miswe hegulu henyu, bigimaninyi ba uki uki, na bagimaninyi ba sambi sambi, na bagimaninyi ba maumi matano maumi matano, na bagimaqninyi ba umi umi, bene bali na alago, ulamana na bilongo byenyu. ¹⁶ Maya mengo nibalagile ba tululiya twenyu, nibasambile, Benywe hulichiwe binywa hawingi ha bashiwenyu, mwaluliye wa kiine hawingi ha mtu na mshiwabo, na ata wa mginyi mine guli hawingi henyu. ¹⁷ Mushilochi bichuli-chuli bya mwego bya batu ha uonona; mwahuliche tulela na miungu lulingo lumwechi; mushinyemye yenyi ya mtu ge gese; beluli uonona m wa Abetcha; na iya inywa yo yose yine yimmima ndushiwe yo nene. ¹⁸ Nimsambile maya mengo bihisho byose byine bilingye banywe ubigila. ¹⁹ Tuchiwile uhuna Holebu, tuhitile hawingi ha luya lwanaganywa luya lwa lwata lwa ubabuula mitima lwamumonine, giya ndila gya ugya mnda sii gya tubandagulu twa Baamoli, nahi Mlume, Abetcha etu byaatusambile, tuhiile Kadesh-balnea. ²⁰ Nene nimsambile, Mwahuhiya mnda sii gya tubandagulu twa Baamoli, gyagatuha beswe Mlume, Abetcha etu. ²¹ Loowe, Mlume, Abetcha obe, gwagibiya sii u mbele obe; bino seela, gishamine, nahi Mlume, Abetcha a bamasobe, byeliusambile; ushimone booba, ushididibuwe. ²² Benywe munjwilile ge gese gwenyu wandi, muganine, Bino tuhile batu hambele hetu, yulu batudindile giya sii na batuchwile na mwano gwa ndila gyatulingye uhitila, na gwa mabuga mene matwihyiila. ²³ Iyo inywa niibenjiche abisa; niguhile batu umi na bopi, mtu gumwechi wilongo imwechi. ²⁴ Nabo bagaluwile, baselile koono bahiile ibetabeta ya Eshkoli, baidindile. ²⁵ Baguhile bimwe biguma bya giya sii mmaboo mabo, batuchwilile nabyo uno hasi, batuchilile na mwano iyaka, baganine, Gino sii gyatuha Mlume, Abetcha etu, m sii gisoga. ²⁶ Alakini mushibenjiche usela uya, munenune inywa ya Mlume, Abetcha enyu; ²⁷ mununine m bitula byenyu, muganine, M wa ibalo Mlume gwtuonywa, noo yulu gutuhuminye mnda sii gya Misili, yulu gatubiya mnda maboo ma Baamoli, yulu ya utuchimya. ²⁸ Tuysele tugye uhi? Bashiwetu batunogile mitima gyetu, batusambile, Baya batu m beengi, m balahu utuhima bwswe; mabuga mabo m mata, mmagubawe bibambacha ndaa na ha gulu; na bya uhima bibyo uya twabamonine Baanaki. ²⁹ Haho nibasambile, Mushididibuwe, na mushibasine. ³⁰ Mlume, Abetcha enyu, ene alihubalombwela hambele henyu, gee noo gwimlwila, wa mlingilisho gwa byose byine byelimgilile uya Misili u mbele wa meeso menyu. ³¹ na uya mlwanaganywa, byolimonine byuswalile Mlume, Abetcha obe, nahi mtu byesuswala mwanage, ndila gyose byamuhitile, ndaa na byamuhiile ino ihana. ³² Alakini yulu ya iyo ihisho mushengelecha Mlume, Abetcha enyu. ³³ gumgolwele m ndila, m'busugu wa aahya, umlamyila ndila gyamwigila, na mchuba wa liya timba, yulu mwaoshe umona ihana yamwigimyila bitula byenyu. ³⁴ Mlume guhuliche madi ma binywa byenyu, guchigililwe, gulahile pa, guganine, ³⁵ Chigilwe gyanyi hashi ata gumwechi hawingi Ha bano batu ba ino ibushi ya isone mine gwigimona gigyo sii gya gisiga, gyandibalahile pa bamasenyu ubaha. ³⁶ Nambo Kalebu mwana gwa Yefune, gugo gwigimone; nene nimma gee na baana bage gigyo sii gyeligyatile; bululi gummudagile Mlume wa binywa byose. ³⁷ Na Mlume guchigilwe yulu yanyi bululi bwenyu, guganione, Ata gogwe ushigigingila mo; ³⁸ Yoshua mwaana gwa Nuni mine guli mgimanyu u mbele obe noo gwigingila; mtyeamanye mtima; bululi gee noo gwibahyanya Baisilaeli. ³⁹ Iyaka, banuna benyu, bamuganine biwaswa kole, na baana banyu, bene bashi lino na malango mabi na masoga, noo bene bigingila, nabo noo bandiha, nabo bigihyilila. ⁴⁰ Na benywe bino galuwe, m'bechuwa mugye, ndila gya mlwnaganywa gya Bahali lya Shamu. ⁴¹ Haho mungaile, musambile, Beswe twagila buubi uli Mlume, twisala ugya ulwa wa mlingilisho gwa byose byatusambilwe na Mlume. Twiguha ge gese gwetu alume gele age a bita, mugilikle bisoga usala u loono. ⁴² Mlume gusambile, Ubasambile, Mushigya, na mushilwe, bululi nene nili hawingi henyu; mushichwe uchingwa u mbekle wa tumangu twenyu. ⁴³ Haho nimsambile, mushipuliche, yulu mubengile alago a Mlume, mulimonine, na usala u loono. ⁴⁴ Na Baamoli bene babele hushama u lulo loono, bachwile itunga yulu yenyu, bamchingile nahi nduwi, bamchingile uhuma Seili ndaa na Holma. ⁴⁵ Mugiwile mulihulila u mbele wa Mlume; Mlume gushihuliche madi menyu, na gushitegile matu mage wamli. ⁴⁶ Haho noo hene hamushamine Kadeshi masugu meengi, nahi ulamana na masugu mene mamushamine haya.