¹ Nimmonine Mlume mgimanyu alibu na butambikilo; guganine, okomewe mahanda ma ihanda, ata lukuta ludigile; ubibele bibaa bibaahegulu ha mswe gwa kila gumwechi gwabo; na nenenimaga mtu gwabo gwa isuli wa ahilu; hashi ata gumwe gwabi mine chwisina, na hashi ata gumwe gwabo gwihogononywa. ² Inangwa bidaba bagingile usinda, uboo wanyi wibahihya ubo; nabo inangwa banasela hegulu ha gulu, nibasacha uhuma ubo. ³ Nbo inangwa banalibisa u songo gya loono Kalmeli, nibaenda na ubahunya ubo; inangwa balibisa mmabenga na bahali nishibamone, nigihila ndowa uya nagyo gyibachiga. ⁴ Inangwa boo banagya bahambwe u ba tumangu twabo, nihilaahilu ubo, nao ibahaga; na nene nihila meso manyi wabali nabagile biibi, na bishi bisoga. ⁵ Wa yulu Mlume, ABETCHA,a bilume pambwa, gee noo guliuuda sii, naya noo usumbuluwa, na bose bene bali husha mnda mwage babi na malilo; nagyo gyiginyuwagyose nahi Ludi, nalo lwigilula iyaka nahi Luudi lwa Misili. ⁶ Gee noo gusugubaa byumba byage hegulu ha gulu, na ugubaa mishingi gyage gya butato hegulu ha sii; gee noo gusugilucha madi ma bahali, na umagesa hegulu ha ibaloo; Mlume noo china lyage. ⁷ Wi wii! Benywe mushi nahi baana ba Bakushi wandi nene, benywe baana ba Isilaeli, gwagana Mlume? Wi wii! Nene nishimmuminye Isilaeli mnda sii gya ba Misili, na Bafilisiti mnda sii gya Kaftoli, na Bashami uhuma Kili? ⁸ LIngaminywe, meso ma Mlume ABETCHA malihubulola buolo bwa guya gwa buubi, na nene nibudiga buhume mgino sii; inangwa bibyo nishidiga nduu gya Yakobo, gwagana Mlume. ⁹ Wa bibyo , lingaminywe, nihila alago, na nene nihula ndu gya Isilaeli hawingi ha mioga gyose, nahi biya ngano byachisuhulwa mluhe inangwa bibyoata mtuchi gumwechi gwa gucho gucho gushiila hasi. ¹⁰ Beene bina buubi m'batu banyi biwaa wa ahilu, babo balihugana, asusu ashitupata uba a unyuma na ata a umbele. ¹¹ Mamo masugu niginuna bushamo bwa Daudi bwene bugwile, na uchiba hene habeleile; na nene niginuna bibunduguchu byage, na ubugubaa nahi masugu ma alaa; ¹² bahewe ubahyilila baya bashigele ba Edomu, na mioga gyose gilihugiswa wa china lyanyi, gwagana Mlume, gulihugila bibyo. ¹³ Lingaminywe, masugu malihuchwa, gwagana Mlume, mene ma guya gulihulima gwimmengelecha msochi, na guya mine gulihuhula zabibugwimmengecha guya gulihuuna biguma; nacho koono chihinyuwa divai cha saa, na tuono tose twisumbuluwa. ¹⁴ Na nene nubagiwicha iyaka batu banyi Isilaeli bene babululwe, nabo bigubaa mabuga mashigele mamabelebu na mauwa, na ushama mbda mwage; nabo biuna mizabibu mnda mabala, na unywa divai chage, nabo biita ma bushitani, na uyaa biliwa byage.