¹ Hatuhuile uhoma, noo hatumanine ugana iya ichiba ilihugiswa Melita. ² Bene na mbuga batugilile bisoga bya lingililo. Baluminye ahia na batulubule beswe bose, yulu habele hunya mabula na habele peho. ³ Paulo hebele huongola iyama ya kunyi na uchibiya wahia, ndoa gihumine mchia kunyi yulu ya Yuda ya ahia na umchinga uboo. ⁴ Bene na mbuga habagimonine giya ndoa gilihudembela uboo, basambilene, guno mtu ii mmaganyi, inangwa gwahona lwa bahali, winene gushilingie uba na mwego. ⁵ Paulo gugiukumwine waahia yuli gishimchige. ⁶ Boo balangile uboo wihila na guigwa hasi na uwa lubu lwa uutuwa, habamlolile abisa na umona ndoa gisamchiga, baebuile, baganine guno mtu ii mmaganyi, inangwa guahona lwa bahali, winene gushilingie uba na mwego. ⁷ Hoka na haya habele na lubala lwa mmosobu nine na iya ichiba china lyake Publio, gugo mtu gutugaile wage wa mtima gwa bugenda, gutuitile tube bagenyi bage masugu matatu. ⁸ Habele sage naPublio gubele husumwa na ihupu na uhala mashi. Paulo gugingile mndu gyake, kusabile, kum'biile maboo hegulu hake, na ummonya. ⁹ Habihuile ugilia bibyo bange bene babele na basumwa ha iya ichiba bachuile nabahonine. ¹⁰ Nabo batunyeminye wabunyemu bwingi, hatubele hulilongia wa lwendo batuhele bitundu bya tubele hubenja. ¹¹ Hanyuma ha miechi gitatu, tugile na bwato bwa Isikandelia bubele hushama ha iya ichiba mengo ma peho, na bashiichi babele Bamahasa. ¹² Tuhiile Silakusa, tushamine masugu matatu. ¹³ Uhuma uya tuchunguluile na uhiila legio, hanyuma ha chuba limwechi mnaga gwa ihindagala ya mmanda goo noo ututa, na chuba lya mabili lyake tuhiile Puteoli. ¹⁴ Ubo tubangile babusua, batubongele ibumbu tushame nabo masugu njui, na bibyo tuhiile Lumi. ¹⁵ Uhuma uya babuswa, habahuliche mwano getu, bachuile utugaa mpaga sogo lya Apio na Madu matatu ma ulacha bagenyi. Paulo helibamonine gumtonine Abeca, gulihele mtima. ¹⁶ Hatugingile Lumi Paulo guhelwe alago a ushama wage hamwechi na solokoto gummusa. ¹⁷ hanyuma ha masugu matatu gubagitile baosobu ba Bayahudi basambane, na habachuile usambana gubasambile, bashiwetu, inangwa nisagila itu inyume ya batu betu wala inywa ilihuhanya mishaminyi gya bamasetu, nibiile mmabo ma Baloma, nihambilwe uhuma Yelusalemu. ¹⁸ Nabo habahuile umbucha babendiche uupamba, yulu bahele ibalo yoyose wandi ya upaga. ¹⁹ Bayahudi habahuile uhunga mmungo na uumunga nasabe ugia usamba wa Kaisalia. Ushi wa ugana nibele na inywa ya ushitaki mmoga guuni. ²⁰ Yulu ya bibyo namgita muchwe undola na udogoma nanyi, yuli nihambilwe ino ihambo bululu bwa maudagilo nma Isilaeli. ²¹ Baya bamsambile, beswe tushipatile mikanda giene gina miano, ata wa ulisamba mwano gogose gubi yulu yobe. ²² Bino tulihubenja uhulicha oligogwe mine ulihumona wii, nayulu ya bibyo binyumbia m'bimanyie wetu ugana bilihudogomwa ose bibe. ²³ Habahuile ulagana nage, bamsambile tumonana linge chuba. Bamchilile undu giebele hushama, batu bengi abisa gubasambile wa lemba lemba na ubasambila yulu ya buolo bw'Abeca, na ubaganina mwano ga Yesu, yulu ya binywa bya m'bindo gwa Musa na bya bambua, utula lwelo mpaga na igolo. ²⁴ Bamwe bawashiche bielidogomine, bange bashibiwashiche. ²⁵ Na habashihulichane boo wa boo, bagile lwabo, Paulo helihuile udogoma iyo inywa imwechi, ugana, mtima guhaha gudogomine bisoga na bamasetu, wa anywa ambwa Isaya. ²⁶ Guganine, ukie wa bano batu, ubasambile, uhulicha, mwihulicha wala mushimana, na umona, muimona wala mushilangulwa. ²⁷ Yulu mitima gya batu baba mgihugi, na mtu nabo mmagumu wa uhulicha, nameso mabo mmawile, bashichwe umona wa meso mabo, nauhulicha wa matu mabo, na ulangulwa wa mitima gyabo, na ugalula malanga mabo, nabahonye. ²⁸ Na bimanyie wenyu ugana uhonauno w'Abeca wahilua uba mioga, nabo bihulicha. ²⁹ [Helihuile udogoma bibyo, Bayahudi bagile lwabo, balihulibucha biingi boo wa boo]. ³⁰ Paulo gushamine miaa kiopi mndu gyake gielibele mpange, gubaile batu bose bene babele hummenena. ³¹ Gubele huisamba mwano gwa buolo bw'Abeca, na ugikia yulu ya bihisho bya mlume Yesu Kelesitu, wa nangu na boba, nangu uchibilwa na mtu.