¹ Itabo iya itangi niigolile, Theofile, mwano gwa bigilanyua biose bitulile Yesu ugila na ugigie. ² Ota lusugu luya lueliguhilwe ugia hekulu, helihuile ubalaga bahilwa yulu ya mtima guhaha baya belisobobile. ³ Baya belilimoninye gee mine, wa bihisho bingi, hanyuma ha uhua ususulwa wake, bino gwina mwego, gubatobuele umasugu maumi mana, na udogoma mwano gwa bwolo bw'Abeca. ⁴ Hesambene nabo gubalakile bashihume ii Yelusalemu, bahembe malagano na Tata, mamuhuliche mwano guke wandi, ⁵ ugana Yohana guchundile wa madi, benywe mwichunjwa wa mtima guhaha hanyuma ha masugu macho. ⁶ Bibyo, habasambene, bampudiche, bakanine, mlume mano mengo noo mengo moligiwidicha ba Isilaeli bwolo bwabo? ⁷ Gubasambile, gushi mkilo gwenyu umana mengo na bihindi bya chuba, Tata melibiile hasi ugila wage na malanga make gemine. ⁸ hamwihua uhewa uoma, helihua uchua hegulu henyu mtima guhaha, na benywe mubi batu mumonine wa meso banyi ii Yelusalemu, ii bayahudi bose, na ubasamalia, na isula ya ibaloo. ⁹ Hehuile udogoma bibyo, hababele hulolo, gukinuilwe, timba ligaile umeso mabo. ¹⁰ Hababele hucheelecha hegulu, gee hebele hugya lola, batu babili bagi nene hoka nabo, bachuale bya bihaha. ¹¹ Baganine, benywe bashami ba Galilaya, yulu yai mwakimana na ulola hekulu? guno Yesu gwakuhua uhuma wamli na ugia haya hekulu, gwichua byoka bibyo biamwammona gulihukia lwake hegulu. ¹² Bagiwili yelusalemu uhuma uluya lono lwa Mizeituni, luli alibu na Yelusalemu lwendo lwa lusugu lwa ulitucha (magulu maumi njui). ¹³ Habagingile, baselile m'yumba ya hegulu, mwababele hushama, Pedelo, na Yohana, na Yakobo, na Andele Filipo na Tomaso, Baltelemayo, na Matayo, Yakobo. ¹⁴ Bano bose babele balungene wa mtima gumwechi wa usaba, hamwechi na baya baachana, na Maliamu mnake gwa Yesu nabashiwabo. ¹⁵ Maya masugu Pedelo gukimene hawingi ha babo babusua (Babele alibu uki na maumi mopi) guganine. ¹⁶ Babuswe, bilingie mkolo guwilile, gwelidogomine mtima guhaha uwanywa a Daudi, u mwano gwa Yuda, gubago lwele baya bampuatile Yesu. ¹⁷ Yulu gubele m'balwe hamwechi mtu, guhelwe nage gno mgilo. ¹⁸ (Guno mtu gukulile lubala ulamana na bubi bwake, guwilile mswe, gubeleye gumo mila gwake gose gisaliye. ¹⁹ Bamanyiye na batu bose bashamiba Yelusalemu, luya lubala lugitilwe mlidi lyabo Akeldma, nuugana, lubala lwa mashi). ²⁰ Bululi bili bigolwe m'itabo ya ngimbo, bushamo bwage na bube mauwa, na hashibe mtu gwishama ho, iyaka bielibele hugimena gunge kabikuhe. ²¹ Batu bose bene batulomine besu mengo mose mlume Yesu hebele hugingila na utoboa wetu. ²² utula uchunda wa Yohana, nda na luya lusuku lweli guhile ukia hekulu, m'bisoga gumwe gwabo gobe shahidi gwa uchuwa wage hamwechi netu. ²³ Babiile babili, Yusufu gulihugiswa Balshaba, gubele na china lya bubili Yusta, na Matiya. ²⁴ Bo nusaba, baganine, gogwe, mlume, ugidi mitima gya batu bose, utumonye ii nanyi gwawasobala ha bano babili, ²⁵ gaguhe ihana ya mgilo guno gwa uhilwa uno, welichiminye Yuda, na ugia ndila gya uchimina. ²⁶ Babatelele luti, lumguilila Matiya, nage kubalilwe uba hamwechi na bahilwa umi na kumwechi.