² Mmunjwa, nihusaba uginunwe u byose na uba na mwego gusoga, nahi bilibiginunwe mtima gobe. ³ Yulu niseelele abisa habachwile bashiwetu na ulisamba kiine gyobe, nahi byoli hushama mnda kiine. ⁴ Nishi na linge saso nahi uhima lilyo, wa uhulicha baana banyi bali bagimanyu mnda mwa kiine. ⁵ Mmunjwa, guya mgilo ii gwa uwilila byolihubagila babo bashiwetu na babo bagenyi nabo, ⁶ byabalisambile luundo lobe uu lubunga; wiita bisoga ubebalongola nahi bilihubenja Abetcha. ⁷ Bibyo ya wa yulu ya lilyo China, bahumine , bashigaile itu uu Bamioga. ⁸ Bina bilingye beswe ubagaa batu nahi babo, yulu tube bagichi ba mgilo hamwechi na kiine. ⁹ Nilugolele lubunga inywa, mndi Diotrefe, gwa ubenja uba gwa mtangi wa hawingi habo, tushihubenja. ¹⁰ Wa bibyo, nabechwa, nibyengelecha bihisho byage byeli hugila, byeli humonya buhuli huli yulu yeetu wa binywa bihugi; na gushi hutoleleshwa na bibyo, na ge mine gushihugaa babo bashiwetu, na baya bene balihubenja ubagaa, gulihubachulila, na ubachinga m'lubunga. ¹¹ Mmunjwa, nangu ulilingilisha na na bubii, ulilingilishe na busoga, Guya gulihugila bisoga ii gwa Abetcha, yulu guya gulihugila bibii gushimmonine Abetcha. ¹² Demetrio gulihusambwa na batu bose, iyaka na giya kiina gyogine. Na beswe tulihusamba, na gogwe ugudiugana ulisamba wetu ii wakiina yulu yage. ¹³ Naba na binywa biingi bya uugolela, bino nishihubenja uugolela wa wino na wa kiliyo. ¹⁴ Bino nilihubenja uumona wa hoka, na beswe twigombola anywa wa anywa. ¹⁵ Talala oli, Magenda metu buutanya. Ubatanye mamo magenda metu, batu bose wa machina mabo salamwa.